រាជធានីភ្នំពេញ ៖ នេះមិនមែនជាការបន្តុះសង្អាប់ចំពោះស្ថាប័នសមត្ថកិច្ចទេ ជាក់ស្តែងនៅថ្ងៃសៅរ៍ (ថ្ងៃក្រហម) ជាថ្ងៃមន្ត្រីរាជការសម្រាកពីការងារ ម្ល៉ោះហើយទំនងមធ្យោបាយទាំង ឡាយអាចជាប់រវល់តាមសាមីខ្លួនផងដែរ ទើបធ្វើឲ្យអង្គភាពនគរបាលខណ្ឌកំបូលមួយក្រុម បង្ខំចិត្តជួលតាក់ស៊ីកង់បីឥណ្ឌា ដឹកជនសង្ស័យម្នាក់ចេញពីសាលាដំបូងរាជធានីភ្នំពេញ ទៅកាន់ពន្ធនាគារព្រៃ.ស នាវេលាម៉ោង១០ព្រឹក ថ្ងៃទី២៧ ខែមិថុនា ឆ្នាំ២០២០ ។
សេចក្តីរាយការណ៍ឲ្យដឹងថា ស្ត្រីម្នាក់មានឈ្មោះ អ៊ុន ស៊ីមន អាយុ៣៥ឆ្នាំ ជាកសិករ រស់នៅភូមិគោកខ្សាច់ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ត្រូវបានកម្លាំងសមត្ថកិច្ចនគរបាលខណ្ឌកំបូល ចាប់ឃាត់ខ្លួនតាមអំណាចសាលក្រមរបស់សាលាដំបូងរាជធានីភ្នំពេញ ដែលបានផ្តន្ទាទោសរួចហើយ នឹងតម្រូវឲ្យចាប់ឃុំខ្លួនដាក់ពន្ធនាគារតាមអំណាចសាលក្រមនោះ ពាក់ព័ន្ធសំណុំរឿងពីបទ. រំលោភលើទំនុកចិត្ត ។
បទ.រំលោភលើទំនុកចិត្តនោះ បើតាមស្ត្រីជាប់សង្ស័យបានរៀបរាប់មុនឡើងកង់បីឥណ្ឌា ទៅកាន់ពន្ធនាគារព្រៃ.សថា រឿងនេះជារឿងរបស់ប្តីអ្នកស្រីទេ កាលពីគាត់នៅរស់គាត់បានជំពាក់លុយកាក់ជាមួយអ្នកដទៃ ប៉ុន្តែមុនពេលគាត់ស្លាប់ទៅ គាត់បានលក់ដីស្រែសងទៅដើមបណ្តឹងអស់ហើយ គ្រាន់តែមិនបានទទួលលិខិតស្នាមដែលប្តីគាត់ និងភាគីម្ខាងទៀតធ្វើឡើងដើម្បីបញ្ចប់រឿងនោះទេ ។
លុះក្រោយមកស្រាប់តែមានបណ្តឹងចោទប្រកាន់មកលើរូបគាត់ រហូតត្រូវបានតុលាការកាត់ទោសឲ្យជាប់ពន្ធនាគារយ៉ាងដូច្នេះទៅ ។
ជនសង្ស័យត្រូវបានសមត្ថកិច្ចនាំខ្លួនទៅបង្ហាញមុខនៅសាលាដំបូង បន្ទាប់មកស្ថាប័នអយ្យការក៏បានចេញដីកាឃុំខ្លួន ទើបនគរបាលខណ្ឌកំបូល បានជួលម៉ូតូកង់បីឥណ្ឌាដឹកជនសង្ស័យទៅកាន់ពន្ធនាគារព្រៃ.សតែម្តងទៅ ៕
ចែករំលែកព័តមាននេះ