ខេត្តតាកែវ ៖ បើតាមសេចក្តីរាយការណ៍បានឱ្យដឹងថា អាសូរស្ត្រីម្នាក់យំសោកបោកខ្លួនស្ទើរតែគាំងបេះដូងទៅតាមប្តីរបស់ខ្លួនដ៏សែនក្រៀមក្រំ និងសោកសៅជាទីបំផុត ខណៈពេលប្តីដែលទើបតែរៀបការមិនទាន់ទាំងបានផ្សំដំណេកស្រួលបួលផង ក៏ត្រូវលាចាកលោកនេះទៅចោលហើយ។
សេចក្តីរាយការណ៍បន្តថា នាងពិតជាស្តាយស្រណោះ ខណៈពេលដែលប្តីជាទីស្រលាញ់របស់ខ្លួនឃើញខ្សែភ្លើងដាច់ក៏បានទៅតភ្ជាប់វិញ ប៉ុន្តែជាអកុសលក៏ត្រូវឆក់ដួលដេកនៅលើដី រួចត្រូវក្រុមគ្រួសារដឹកបញ្ជូនមកសង្គ្រោះនៅមន្ទីពេទ្យបង្អែកខេត្តដែរ តែក៏បានដាច់ខ្យល់តែម្តង ក្រោយមកក្រុមគ្រួសារក៏ដឹកសពយកទៅធ្វើបុណ្យនៅឯផ្ទះវិញ។ ករណីបុរសជាប្តីទើបតែរៀបការ ហើយត្រូវឆក់ខ្សែភ្លើងនេះ បង្កឱ្យមានការភ្ញាក់ផ្អើលកាលពីម៉ោង១១ព្រឹក ថ្ងៃទី២៧ ខែមិថុនា ឆ្នាំ២០២០ ស្ថិតនៅភូមិដូនទួត ឃុំគុស ស្រុកត្រាំកក់ ខេត្តតាកែវ ។
បើតាម Account Facebook ឈ្មោះ Nhet Sreyleap ត្រូវជាភរិយានៃសពជនរងគ្រោះបានបង្ហោះសារមួយឃ្លា ដែលមានខ្លឹមសារថា ៖ «បងចាកចេញលឿនពេកហើយ សូមវិញ្ញាណក្ខន្ធបងទៅកាន់សុគតិភព ប្រាថ្នាជួបបងគ្រប់ៗជាតិជាប្តីប្រពន្ធនឹងគ្នាទៀត អរគុណសម្រាប់ក្តីស្រលាញ់គ្រប់យ៉ាង អូនដឹងថាបងស្រលាញ់អូនខ្លាំងណាស់ ហើយអូនក៏ស្រលាញ់បងខ្លាំងដែរ។ បើយើងមានកូន អូននឹងថែរក្សាកូនយើងឲ្យបានល្អបំផុត កុំបារម្ភអីបងសម្លាញ់។ គាត់ឆក់ខ្សែភ្លើងម៉ោង១១ព្រឹក ថ្ងៃទី២៧ ខែមិថុនា ឆ្នាំ២០២០»។
សូមបញ្ជាក់ថា ជនរងគ្រោះខាងលើទើបតែរៀបចំមង្គលការកាលពីថ្ងៃទី២៦ ខែមិថុនា ឆ្នាំ២០២០ លុះមកដល់ថ្ងៃទី២៧ ខែមិថុនា ឆ្នាំ២០២០ ក៏បានជូបឧបទ្ទវហេតុឆក់ខ្សែភ្លើង បណ្តាលឱ្យបាត់បត់ជីវិតនៅវេលាម៉ោង១១ព្រឹក ស្ថិតនៅភូមិដូនទួត ឃុំញ៉ែងញ៉ង ស្រុកត្រាំកក់ ខេត្តតាកែវ ។
គួរបញ្ជាក់ទៀតថា ក្រោយទទួលបានដំណឹងមរណភាពនេះរួចមក ធ្វើឲ្យមហាជនជាច្រើន ដែលជាអ្នកនិយមប្រើប្រាស់បណ្ដាញសង្គមហ្វេសប៊ុក បានសម្ដែងការសោកស្ដាយជាពន់ពេក ចំពោះក្រុមគ្រួសារសព ដែលជួបរឿងអកុសលបែបនេះ ហើយក៏បាននាំគ្នាចូលរួមរំលែកទុក្ខដ៏សែនក្រៀមក្រំនេះផងដែរ។
ហើយក្រុមគ្រួសារសពក៏បានប្រាប់ដល់បងប្អូនយើងទាំងអស់គ្នាថា ដើម្បីកុំឱ្យមានវិបត្តិសេរី និងការសោកស្តាយដោយបាត់បង់ប្តី កូននឹងមនុស្សជាទីស្រលាញ់របស់ខ្លួននោះ គឺពេលក្នុងផ្ទះមានដាច់ខ្សែភ្លើងនោះ គួរណាស់ទៅហៅអ្នកជំនាញអគ្គិសនីឱ្យមកត ឬភ្ជាប់ឱ្យមក ព្រោះយើងចេះមិនដល់ទេ គឺដូចករណីនេះអញ្ចឹង នៅពេលឆក់បណ្តាលឱ្យបាត់បង់ជីវិតនោះ ទោះជាសោកស្តាយណាក៏ដោយ ក៏វាហួសពេលទៅហើយដែរ ។
ចែករំលែកព័តមាននេះ