ខេត្តប៉ៃលិន ៖ កម្លាំងប៉ុស្តិ៍នគរបាលរដ្ឋបាលសង្កាត់បរយ៉ាបានទទួលពាក្យបណ្តឹងពីជនរងគ្រោះម្នាក់ឈ្មោះ ម៉ៅ ខី ភេទប្រុស អាយុ៥៤ឆ្នាំ សញ្ជាតិខ្មែរ មុខរបរកសិករ រស់នៅភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ខេត្តប៉ៃលិន ដោយបានប្តឹងទៅសមត្ថកិច្ចថា មានករណីចោរគាស់ផ្ទះនៅក្នុងចំការមួយករណីបណ្តាលឱ្យបាត់សម្ភារៈជាច្រើន ។
ហេតុការណ៍នេះ បានកើតឡើងកាលពីវេលាម៉ោង០៧ និង៣០នាទីថ្ងៃទី២៦ ខែមិថុនា ឆ្នាំ២០២០ ស្ថិតក្នុងភូមិបរហ៊ុយត្បូង សង្កាត់បរយ៉ាខា ក្រុងប៉សលិន ខេត្តប៉ៃលិន ។
ប្រភពបន្តទៀតថា ក្រោយពីមានការលួចគាស់ផ្ទះ បណ្តាលឱ្យបាត់បង់សម្ភារៈរួមមាន ម៉ូតូ០១គ្រឿង ម៉ាកហុងដា (ឆាលី) ពណ៌ស្លែ ពាក់ផ្លាកលេខ បាត់ដំបង 1E-9681 និងអាគុយចំនួន០២គ្រឿង ។ ជនសង្ស័យមានឈ្មោះ លឿន សំណាង ភេទប្រុស អាយុ២០ឆ្នាំ មុខរបរ មិនពិតប្រាកដ មានទីលំនៅបច្ចុប្បន្នភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ខេត្តប៉ៃលិន ។
ប្រភពដដែលបន្តទៀតថា ក្រោយពីទទួលពាក្យបណ្ដឹងលោកអធិការនគរបាលក្រុងប៉ៃលិន បានចាត់អោយលោកអធិការរងដឹកនាំកម្លាំងផ្នែកព្រហ្មទណ្ឌ និងកម្លាំងផ្នែកសន្តិសុខនៃអធិការដ្ឋាននគរបាលក្រុងប៉ៃលិន សហការជាមួយកម្លាំងប៉ុស្តិ៍រដ្ឋបាលសង្កាត់បរយ៉ាខា ចុះទៅពិនិត្យមើលកន្លែងកើតហេតុ ។
បន្ទាប់ពីសាកសួរព័ត៌មានតាមដានស្រាវជ្រាវ និងកំណត់បានមុខសញ្ញារបស់ជនសង្ស័យជាមុខសញ្ញាចាស់ធ្លាប់ជាប់ពន្ធនាគារចំនួនពីរដងមកហើយ និងបានចុះទៅនាំខ្លួនជនសង្ស័យខាងលើនៅវេលាម៉ោង១ និង៥៥នាទីរសៀល និងបានយកមកធ្វើការសួរនាំនៅប៉ុស្តិ៍នគរបាលរដ្ឋបាល ។
ក្រោយពីសាកសួរួច ជនសង្ស័យបានឆ្លើយសារភាពថា ខ្លួនពិតជាបានគាស់ផ្ទះចំការរបស់ជនរងគ្រោះពិតប្រាកដមែន ដោយបានចូលលួចយកបាន ម៉ូតូ០១គ្រឿង ម៉ាកហុងដាឆាលី ពណ៍ស្លែ និងអាគុយចំនួន០២គ្រឿង ហើយក្រោយពេលដែលលួចបានសម្រេច ជនសង្ស័យបានយកម៉ូតូទៅលាក់ទុកនៅក្នុងព្រៃចំការតាង៉ែនក្បែរភូមិ និងបានលក់អាគុយទាំង០២គ្រឿងនោះទៅលក់អោយអ្នកទិញអេតចាយ (មិនស្គាល់អត្តសញ្ញាណ) ។
បច្ចុប្បន្នកម្លាំងជំនាញផ្នែកព្រហ្មទណ្ឌនៃអធិការដ្ឋាននគរបាលក្រុងប៉ៃលិន កំពុងធ្វើការសាកសួរបន្ត និងកសាងសំណុំរឿងចាត់ការតាមនីតិវិធីច្បាប់ ។
ចែករំលែកព័តមាននេះ