មន្ត្រីជាន់ខ្ពស់ក្រសួងសុខាភិបាលបានលើកឡើងពីស្ថានភាពជំងឺកូវីដ១៩ មកបង្ហាញឲ្យសាធារណជនបានដឹងថា វីរុសកូវីដ-១៩ វ៉ៃលុកផ្លូវដង្ហើមសាហាវណាស់ធ្វើឲ្យមនុស្សពិបាកដកដង្ហើមណាស់ រហូតដល់ ត្រដរខ្យល់ដោយខ្វះអុកស៊ីហ្សែន ដែលក្រុមគ្រូពេទ្យក៏ពិបាកនឹងជួយសង្គ្រោះឲ្យផុតពីសេចក្តីស្លាប់ ។
លោកស្រី ឱ វណ្ណឌីន អ្នកនាំពាក្យ និងជារដ្ឋលេខាធិការក្រសួងសុខាភិបាលបានបញ្ជាក់ថា «ជ្រោះមរណ:ដោយសារជំងឺកូវីដ-១៩ ស្ថិតនៅក្នុងស្ថានភាពគួរឲ្យមានការព្រួយបារម្ភណាស់ នៅលើសាកលលោក នៅក្នុងតំបន់ នៅតាមបណ្តាប្រទេស នៅតាមសហគមន៍ និងសម្រាប់បុគ្គល ។ ដូច្នេះ សូមបងប្អូនប្រជាពលរដ្ឋយើង ជាពិសេសបុគ្គលគ្រប់រូប ត្រូវតែខិតខំបន្តកិច្ចការពារខ្លួនពីការចម្លងវីរុសដ៏កាចសាហាវនេះ ដើម្បីសុខភាពផ្ទាល់ខ្លួន ក្រុមគ្រួសារខ្លួន និងសហគមន៍របស់ខ្លួន គ្មានការចម្លងវីរុសកូវីដ-១៩» ។
នៅថ្ងៃនេះកម្ពុជាបានរកឃើញករណីវិជ្ជមានថ្មីចំនួន៩នាក់ ដែលធ្វើចំនួនអ្នកកើតជំងឺកូវីដ១៩ នៅកម្ពុជាមានដល់១៣៩នាក់ តែមាន១០នាក់ប៉ុណ្ណោះកំពុងសម្រាកព្យាបាល ។ ១២៩នាក់បានសះស្បើយ ។ ទោះយ៉ាងណា មន្ត្រីនៅតែសម្តែងការព្រួយបារម្ភជាប្រចាំ ចំពោះការឆ្លងដល់សហគមន៍ឬ រលកទី២ ។
លោករដ្ឋឳ វណ្ណឌី បានដាស់តឿនពលរដ្ឋឲ្យមានការប្រុងប្រយ័ត្នឲ្យបានខ្ពស់ ចំពោះជំងឺកូវីដ១៩ ។ លោកស្រីបានលើកឡើងថា គ្មាននណាស្គាល់ដឹងបានទេ ថា វីរុសកូវីដ-១៩ មានអត្តចរិកបែបណា និងនៅកន្លែងណាដែរ ។ លោកស្រីបញ្ជាក់ថា គេក៍មិនមិនអាចដឹងបានដែរថា អ្នកឆ្លងជំងឺនេះ គាត់បានប៉ះពាល់អ្វីខ្លះ ដែលមានវត្តមានវីរុសនេះ? សូម្បីតែបុគ្គលផ្ទាល់ក៏គាត់ប្រហែលជាមិនបានដឹងខ្លួនផង ។
រដ្ឋលេខាធិការក្រសួងសុខាភិបាល បានបញ្ជាក់ថា អ្វីដែលអាចដឹងបាននោះ ការឆ្លងជំងឺកូវីដ១៩ គឺបណ្តាលមកពីកង្វះខាតក្នុងការអនុវត្តន៍វិធានការការពារខ្លួនបានត្រឹមត្រូវ ជាពិសេស ហានិភ័យខ្ពស់នៅពេលដែលបុគ្គលចល័ត ធ្វើដំណើរពីកន្លែងមួយទៅកន្លែងមួយដោយភ្លេចអនុវត្តន៍វិធានការការពារខ្លួន។
«ខ្ញុំសូមធ្វើការអំពាវនាវ ហើយអំពាវនាវទៀត ដល់បងប្អូនប្រជាពលរដ្ឋយើងទាំងអស់ឲ្យចេះការពារខ្លួន កុំភ្លេចខ្លួនឲ្យសោះ ដោយត្រូវចេះផ្លាស់ប្តូរទម្លាប់របស់ខ្លួនឲ្យស្របតាម »ការរស់នៅធម្មតា តាមបែបគន្លងថ្មី«នេះជាការលើកឡើងរបស់លោកស្រីឱ វណ្ណឌីន »។
មន្ត្រីជាន់ខ្ពស់ក្រសួងសុខាភិបាលរូបនេះ បានបន្តថា «ខ្ញុំធ្លាប់បានពន្យល់ហើយថា ការធ្វើតេស្តឃើញ អវិជ្ជមាន មិនមែនមានន័យថា យើងអត់មានវីរុសនេះរហូតនោះទេ ។ អវិជ្ជមានពេលម៉ោងដែលធ្វើតេស្ត តែចប់ពីពេលធ្វើតេស្តទៅ គឺអាចឆ្លងចូលខ្លួនបុគ្គលនៅគ្រប់ពេលវេលា គ្រប់កាលទេស: និងគ្រប់ទីកន្លែង ប្រសិនបើភ្លេចខ្លួន ឫមិនបានការពារខ្លួនទេនោះ»៕
ចែករំលែកព័តមាននេះ