រាជធានីភ្នំពេញ ៖ ក្នុងរយៈពេល៥ ឬ៦ខែកន្លងទៅនេះ បន្ទាប់ពីកម្ពុជារងផលប៉ះពាល់ពីជំងឺកូវីដ-១៩ អ្នកជំនាញមើលឃើញថា នៅវិស័យសំណង់ និងអចលនទ្រព្យរបស់កម្ពុជាបាននឹងកំពុងរងផលប៉ះពាល់ ស្ថិតក្នុងកម្រិតមធ្យម វាមិនទាន់ឈានទៅដល់កម្រិតធ្ងន់ធ្ងរនៅឡើយនោះទេ តែបើតាមសេចក្តីព្រាងក្របខណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ ឆ្នាំ២០២១ របស់ក្រសួងសេដ្ឋកិច្ច និងហិរញ្ញវត្ថុបានបង្ហាញការព្យាករណ៍ថា កំណើននៅក្នុងអនុវិស័យទាំងនេះបានធ្លាក់ចុះកំហុកមិនធ្លាប់មាន ។
លោក ច្រឹក សុខនីម អ្នកជំនាញ និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានប្រសាសន៍ថា «ខ្ញុំមើលឃើញវិស័យសំណង់ នាពេលបច្ចុប្បន្ននេះ វាកំពុងរងផលប៉ះពាល់រយៈពេលខ្លី ។ តែមកដល់សព្វថ្ងៃនេះ ខ្ញុំមើលសន្ទុះអ្នកមានតម្រូវការចាប់ផ្តើមមានបន្តិចម្តងៗ ហើយ ។
បើតាមអ្នកជំនាញរូបនេះ នៅក្នុងវិស័យអចលនទ្រព្យកម្ពុជាជាទូទៅវាមានកម្រិតកំណើន នៅចន្លោះពី១០ទៅ១៥% ក៏ប៉ុន្តែបើឱ្យវាថយចុះមិនកើនថ្លៃ មើលទៅវាមិនទាន់ទេ នៅពេលបច្ចុប្បន្ន ។
ស្ថិតក្នុងរយៈពេល៥ទៅ៦ខែកន្លងទៅនេះ សេដ្ឋកិច្ចរបស់កម្ពុជារងផលប៉ះពាលពីជំងឺកូវីដ-១៩ តែសម្រាប់នៅក្នុងវិស័យសំណង់ និងអចលនទ្រព្យ បើតាមលោកច្រឹក សុខនីម យល់ឃើញថា«វាចូលដល់កម្រិតហាក់ធ្ងន់ធ្ងរ នៅពេលបច្ចុប្បន្ននេះ ព្រោះការងារមួយចំនួន ជាពិសេសគម្រោងអភិវឌ្ឍន៍មួយចំនួនមិនបានដំណើរការនូវគម្រោងថ្មីនោះទេ ។
ម្ចាស់គម្រោងខ្លះគាត់នៅបន្តគម្រោងចាស់របស់ពួកគាត់ដែលរងផលប៉ះពាល់ ។ ក៏ប៉ុន្តែឱ្យធ្លាក់ចូលទៅដល់វិបត្តិធ្ងន់ធ្ងរវាមិនទាន់ទៅដល់ទេ ។ ខ្ញុំមើលឃើញថា វិស័យសំណង់និងអចលនទ្រព្យកម្ពុជាទទួលរងផលប៉ះពាល់កម្រិតមធ្យម» ។
លោកបញ្ជាក់ថា «វិបត្តិនៃជំងឺកូវីដ-១៩នេះ វាធ្វើឱ្យប៉ះពាល់ដល់វិស័យសំណង់ និងអចលនទ្រព្យនេះនៅត្រង់ថា ចំនួននៃការទិញ- លក់វាមានការថយចុះច្រើន បើប្រៀបធៀបគ្រាដូចគ្នាកាលឆ្នាំទៅ ។ អីចឹងវាជា សញ្ញាមួយធ្វើឱ្យយើងរងផលប៉ះពាល់ ឬជាបញ្ហាប្រឈមសម្រាប់យើង ។ តែដោយឡែកបើថា កូវីដ-១៩ នេះវាធ្វើឱ្យតម្លៃវាធ្លាក់ថ្លៃ ខ្ញុំមើលមិនទាន់ឃើញទេ» ។
យោងតាមសេចក្តីព្រាងក្របខណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈឆ្នាំ២០២១ របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា អនុវិស័យសំណង់ត្រូវបានប៉ាន់ស្មានថា នឹងមានកំណើនអវិជ្ជមាន៥,៣% ក្នុងឆ្នាំ២០២០ និងរំពឹងថា ងើបឡើងវិញជាមួយ និងកំណើនទាបក្នុងអត្រា៣,៣% ក្នុងឆ្នាំ២០២១ ។
តាមប្រភពដដែលព្យាករណ៍ថា ក្នុងឆ្នាំ២០២០ អនុវិស័យនេះមានការធ្លាក់ចុះយ៉ាងកំហុកមិនធ្លាប់មាន ចាប់តាំងពីវិបត្តិហិរញ្ញវត្ថុសកលអំឡុង ឆ្នាំ២០០៨-២០០៩ ដែលបណ្តាលមកពីការរំពឹងទុកនៃការធ្លាក់ចុះរំហូរទុនវិនិយោគពីបរទេស ជាពិសេសពីប្រទេសចិន និងតម្រូវការសាងសង់អគារបម្រើឱ្យវិស័យទេសចរណ៍ និងពាណិជ្ជកម្ម ព្រមទាំងការធ្លាក់ចុះទំនុកចិត្តវិនិយោគក្នុងស្រុក ដោយសារការរីករាលដាលនៃជំងឺកូវីដ -១៩ ។
ក្នុងឆ្នាំ២០២១ អនុវិស័យសំណង់ត្រូវបានរំពឹងថា នឹងងើបឡើងវិញក្នុងអត្រាកំណើនទាប ដោយហេតុថា អនុវិស័យនេះត្រូវការពេលវេលាដើម្បីស្តាទំនុកចិត្តសម្រាប់អ្នកវិនិយោគ ។ ជាមួយគ្នានេះ អនុវិស័យនេះពឹងផ្អែកលើទុនវិនិយោគពីខាងក្រៅ ដូចនេះផលប៉ះពាល់អវិជ្ជមានពីវិបត្តកូវីដ-១៩និងបញ្ហាណាមួយដែលបង្អាក់ដល់កំណើនសេដ្ឋកិច្ចពិភពលោក នឹងបង្កជាហានិភ័យដល់អនុវិស័យសំណង់នៅកម្ពុជា។
ក្នុងន័យនេះរាជរដ្ឋាភិបាលកម្ពុជានឹងឃ្លាំមើលដោយយកចិត្តទុកដាក់ និងធ្វើការសិក្សាឱ្យបានស៊ីជម្រៅ ពីការវិវត្តនៃអនុវិស័យសំណង់និងអចលនទ្រព្យនៅកម្ពុជាដើម្បីដាក់ចេញគោលនយោបាយអន្តរាគមន៍បានទាន់ពេលវេលាក្នុងការបញ្ចៀសហានិភ័យដែលអាចកើតឡើង។
បើសេចក្តីព្រាងក្របខណ្ឌ័គោលនយោបាយម៉ាក្រូសេដ្ឋកិច្ចខាងលើនេះ អនុវិស័យអចលនទ្រព្យត្រូវបានព្យាករថានឹងមានកំណើនអវិជ្ជមានក្នុងអត្រា៥,១% ក្នុងឆ្នាំ២០២០និងរំពឹងថាងើបឡើងវិញជាមួយអត្រាកំណើនទាប ២,៦% ឆ្នាំ២០២១។ នៅក្នុងឆ្នាំ២០២១ អនុវិស័យអចលនទ្រព្យត្រូវរំពឹងថានឹងងើបឡើងវិញកម្រិតទាបដោយសារតែការរំពឹងទុកនៃការកើនឡើងវិញយឺតនៃរំហូរទុនវិនិយោគ និងសកម្មភាពសេដ្ឋកិច្ចទាំងក្នុងនិងក្រៅប្រទេសដែលជំរុញសកម្មភាពអចលនទ្រព្យ និងតម្រូវការក្នុងស្រុក ៕
ចែករំលែកព័តមាននេះ