រាជធានីភ្នំពេញ ៖ លោក ឃួង ស្រេង សន្យាមិនឲ្យព្រះសង្ឃទាំង១៥០វត្ត ក្នុងរាជធានីភ្នំពេញដាច់ចង្ហាន់ឡើយ ទោះបីក្នុងរដូវវស្សា និងកំពុងជួបវិធានការទប់ស្កាត់កូវីដ-១៩ក៏ដោយ គឺអាជ្ញាធរមូលដ្ឋានត្រូវរាយការណ៍ភ្លាមៗ ប្រសិនបើគ្មានលទ្ធភាពជួយនោះ។ ការថ្លែងបែបនេះនៅក្នុងកម្មវិធីប្រគេនទៀនព្រះវស្សាទាំង១៥០វត្ត នៅរសៀលថ្ងៃទី២៦ខែមិថុនា ឆ្នាំ២០២០ នៅក្នុងវត្តទួលសន្តិវ័ន ហៅវត្តទួលអស់លោក។
លោក ឃួង ស្រេង បានលើកឡើងថា ក្រោមការដឹកនាំរបស់រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនៃកម្ពុជា បានធ្វើឲ្យវិស័យពុទ្ធចក្រ និងអាណាចក្រមានការរីកចម្រើនទន្ទឹមគ្នា ពិសេសពុទ្ធបរិស័ទ មានជីវភាពធូរធាបានចូលរួមកសាងទីវត្តអារាមឲ្យមានការអភិវឌ្ឍន៍យ៉ាងល្អប្រសើរ។ លោកបន្តថា សមិទ្ធផល ដ៏មានតម្លៃទាំងអស់នេះ គឺបានមកពីការខិតខំប្រឹងប្រែង និងលះបង់គ្រប់បែបយ៉ាងក្នុងស្មារតីទទួលខុសត្រូវខ្ពស់ ដោយតម្កល់អត្ថប្រយោជន៍ជាតិ និងប្រជាជនជាធំរបស់រាជរដ្ឋាភិបាលនៃព្រះរាជាណាចក្រកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី។
ក្នុងឱកាសនោះលោកក៏បានស្នើសុំឲ្យប្រជាពលរដ្ឋ និងពុទ្ធបរិស័ទទាំងអស់បន្តគាំទ្រគណបក្សប្រជាជនកម្ពុជា និងចូលរួមថែរក្សា ឲ្យបាននូវសុខសន្តិភាព ស្ថិរភាព និងសមិទ្ធផលរបស់ជាតិយើងឲ្យបានគង់វង្ស ប្រជាពលរដ្ឋរស់នៅប្រកបដោយ ភាពសុខក្សេមក្សាន្ត។ លោក ឃួង ស្រេង បានណែនាំដល់សង្កាត់ទាំង១០៥ត្រូវ ចុះពិនិត្យមើលជាក់ស្តែង នៅតាមវត្តនីមួយៗ នៅក្នុងមូលដ្ឋាន ក្រែងមានវត្តណាមួយជួបការខ្វះខាត សូមឱ្យយកចិត្តទុកដាក់ទំនុកបម្រុង បើគ្មានលទ្ឋភាព សូមផ្តល់ព័ត៌មានអាជ្ញាធរខណ្ឌ និងរាជធានី ដើម្បីចាត់វិធានការទាន់ពេលវេលា ដោយមិនទុកឱ្យវត្តណាមួយ ដាច់ចង្ហាន់ដោយអាជ្ញាធរមិនបានដឹងនោះឡើយក្នុងរដូវចូលព្រះវស្សានេះ។
សូមបញ្ជាក់ថា ក្នុងកម្មវិធីប្រគេនទៀនព្រះវស្សាទាំង១៥០វត្តនេះ ក្នុង១វត្តៗទទួលបានបច្ច័យ១០ម៉ឺនរៀល ទៀនវស្សា១គូ សាដក១កញ្ចប់ អង្ករចំនួន១០០គីឡូក្រាម ប្រេងមួយកាន ចំណុះ៣០លីត្រ ស្កស១បាវទំងន់២៥គីឡូក្រាម ទឹកដោះគោ ចំនួន១កេស ៤៨កំប៉ុង ទឹកក្រូច២កេស ទឹកបរិសុទ្ធ២កេស មី២កេស៕ ដោយ ៖ ចន ណារិទ្ធ
ចែករំលែកព័តមាននេះ