រាជធានីភ្នំពេញ ៖ បើតាមសេចក្តីបឋមឲ្យដឹងថា អតីតប្រធានសមាគម សិស្ស និស្សិតបញ្ញវន្តក្មេងវត្ត ដែលបច្ចុប្បន្នជាអនុរដ្ឋលេខាធិការក្រសួងយុត្តិធម៌ ត្រូវបានកម្លាំងសមត្ថកិច្ចនាយកដ្ឋាននគរបាលសន្តិសុខផ្ទៃក្នុង ឃាត់ខ្លួនបញ្ជូនទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី២៦ ខែមិថុនា ឆ្នាំ២០២០ ពាក់ព័ន្ធករណីធ្វើឲ្យប៉ះពាល់ដីសាធារណៈរបស់រដ្ឋរាប់សិបហិកតា នៅខេត្តមណ្ឌលគិរី ។
សេចក្តីរាយការណ៍បន្តថា អនុរដ្ឋលេខាធិការរូបនោះមានឈ្មោះ សេង សុវណ្ណារ៉ា ភេទប្រុស អាយុ៥៣ឆ្នាំ មានអាសយដ្ឋាននៅរាជធានីភ្នំពេញ តែបច្ចុប្បន្នលោកមានដីធ្លី ធ្វើស្រែចំការរាប់សិបហិកតានៅខេត្តមណ្ឌលគិរី ។
សេចក្តីរាយការណ៍បន្តថា លោក សេង សុវណ្ណារ៉ា ត្រូវបាននាយកដ្ឋានសន្តិសុខផ្ទៃក្នុង ចេញលិខិតអញ្ជើញឲ្យមកសាកសួរ ពាក់ព័ន្ធការចោទប្រកាន់ដូចខាងលើនេះ ខណៈពេលលោក សេង សុវណ្ណារ៉ា ចូលដល់ដែនសមត្ថកិច្ចក៏ត្រូវឃាត់ខ្លួនបញ្ជូនទៅកាន់សាលាដំបូងរាជធានីភ្នំពេញ តែម្តងទៅ ។
ពេលនេះលោក សេង សុវណ្ណារ៉ា កំពុងស្ថិតនៅដំណាក់កាលស៊ើបសួររបស់ស្ថាប័នអយ្យការ ដែលរឿងរ៉ាវលំអិតយ៉ាងណានោះ គឺមានតែរង់ចាំព័ត៌មានលំអិតនៅលើកាសែតកោះសន្តិភាព។ (កែសម្រួលដោយ ៖ បុប្ផា)
ចែករំលែកព័តមាននេះ