រាជធានីភ្នំពេញ ៖ ស្ត្រីម្នាក់បានជំពាក់លុយគេចំនួន១៦០ដុល្លារ ត្រូវម្ចាស់បំណុលមកទារទាំងព្រឹកទាំងល្ងាច លុះគ្មានលុយសង ហើយសង្ស័យធុញថប់ផង តូចចិត្តខ្លួនឯងផង ក៏ធ្វើដំណើរទៅលោតទឹកពីលើស្ពានបេឡេ តែមិនបានសម្រេច ត្រូវអ្នកដំណើរ និងសន្តិសុខនាំគ្នាជួយឃាត់ទាន់ ។
ហេតុការណ៍ខាងលើបង្កអោយមានការភ្ញាក់ផ្អើលកាលពីវេលាម៉ោង១១និង៣០នាទីព្រឹកថ្ងៃទី២៦ ខែមិថុនា ឆ្នាំ២០២០ ស្ថិតនៅចំណុចគល់ស្ពានបេឡេ ក្នុងភូមិដើមគ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
ស្ត្រីមានវិបត្តិខាងលើឈ្មោះយ៉េត អាយុជាង៣០ឆ្នាំ ស្នាក់នៅភូមិព្រែកតាសេក សង្កាត់ព្រែកសេក ខណ្ឌជ្រោយចង្វារ រាជធានីភ្នំពេញ។
តាមសាក្សីបានអោយដឹងថា នៅមុនពេលកើតហេតុ គេឃើញស្ត្រីរូបនោះបានធ្វើដំណើរឡើងទៅលើស្ពាន បេឡេ និងដើរបណ្តើរ យំបណ្តើរ ខណៈនោះមានអ្នកដំណើរម្នាក់បានសួរនាំ ហើយស្ត្រីរូបនោះបានប្រាប់ថា «មិនចង់រស់នោះទេ» ។ ភ្លាមៗនោះ អ្នកដំណើរក៏បានទៅប្រាប់សន្តិសុខ ហើយក៏បាននាំគ្នាឃាត់សួរនាំតែម្តង។
បន្ទាប់ពីនាំគ្នាជួយឃាត់ ស្ត្រីម្នាក់ខាងលើបានបានអោយដឹងថា គាត់មិនចង់រស់នៅនោះទេ ដោយធុញថប់ក្នុងខ្លួន ដោយសាតែជំពាក់ប្រាក់គេចំនួន១៦០ដុល្លារ ហើយត្រូវម្ចាស់បំណុលមកទារទាំងយប់ទាំងថ្ងៃ ក៏បានធ្វើដំណើរមកលោតទឹកតែម្តង ។
ក្រោយពេលកើតហេតុ ក្រុមសន្តិសុខក៏បានណែនាំស្ត្រីម្នាក់ខាងលើកុំអោយគិតខ្លី ហើយក៏បានទាក់ទងទៅបងប្អូនឱ្យមកទទួលយកត្រឡប់ទៅផ្ទះវិញ ៕ (កែសម្រួលដោយ ៖ ធីតា)
ចែករំលែកព័តមាននេះ