រាជធានីភ្នំពេញ ៖ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ដ្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងថា ប្រទេសកម្ពុជាក៏ដូចជា ពិភពលោកមានការព្រួយបារម្ភចំពោះបញ្ហា គ្រឿងញៀន ខណៈពិភពលោកមិនមានការថយចុះឡើយ ចំពោះការចរាចរណ៍គ្រឿងញៀន ។
ថ្លែងក្នុងពិធីដុតបំផ្លាញចោលគ្រឿងញៀនជិត៥០០គីឡូក្រាម នាឱកាសអបអរសាទទិវាអន្ដរជាតិប្រយុទ្ធប្រឆាំងគ្រឿងញៀន នៅថ្ងៃទី២៦ ខែមិថុនា ឆ្នាំ២០២០ នៅកោះពេទ្យ ។
លោក កែ គឹមយ៉ាន បាន ឲ្យដឹងថា ទោះបីមានការរីករាលដាលជំងឺកូវីដ-១៩ ក៏ដោយអាជ្ញាធរនូវតែបន្ដមានវិធានការនានា ដើម្បីទប់ស្កាត់គ្រឿងញៀននៅតាមព្រំដែន ។
លោកបានបញ្ជាក់ថា ៖«បើយើងមើលស្រុកខ្មែរយើងបារម្ភខ្លាំង ខ្ញុំក៏បារម្ភ អស់លោកក៏បារម្ភ ។ ប៉ុន្ដែយើងមើលស្ថានភាពទូទៅ ពិភពលោកអត់មានថយទេ គ្រឿងញៀន ហើយការបារម្ភរបស់យើង ត្រឹមត្រូវណាស់ រាជរដ្ឋាភិបាលមិនដែលមើលស្រាលរឿងគ្រឿង ញៀនទេ» ។
លោកថា ៖ ប្រទេសកម្ពុជាមិនមែនកន្លែងផលិតគ្រឿងញៀនឡើយ គ្រាន់តែជាប្រទេសឆ្លងកាត់តែប៉ុណ្ណោះ ខណៈអាជ្ញាធរ កំពុងមានវិធានការតឹងរឹង នៅតាមតំបន់ព្រំដែនផងដែរ ។ លោកថា ប្រទេសកម្ពុជាមានវិធានការយ៉ាងច្រើន ដើម្បីទប់ស្កាត់បទល្មើសគ្រឿងញៀន ។
ឆ្លៀតឱកាសនោះ នាយឧត្តមសេនីយ៍ កែ គឹមយ៉ាន បានធ្វើការណែនាំបន្ថែមលើចំណុចមួយចំនួននៃការណែនាំ របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាដូចជា ទី១-ត្រូវយកចិត្តទុកដាក់ខ្ពស់ចំពោះបញ្ហាអនាម័យផ្ទាល់ខ្លួន ក្រុមគ្រួសារ សហគមន៍ និងទីកន្លែងការងារស្របតាមការណែនាំ របស់ក្រសួងសុខាភិបាល និងអង្គការសុខភាពពិភពលោក និងមិនត្រូវធ្វេសប្រហែសចំពោះបញ្ហាគ្រឿងញៀននោះដែរ ។
ទី២-មន្ត្រីរាជការ កងកម្លាំងអនុវត្តច្បាប់គ្រប់ប្រភេទ ត្រូវយកចិត្តទុកដាក់ថែទាំ និងថែរក្សាខ្លួន ចូលរួមប្រយុទ្ធប្រឆាំងនឹងជំងឺកូវីដ-១៩ ដោយបង្ការការពារខ្លួនមិនឲ្យឆ្លង និងបង្ការមិនឲ្យឆ្លងរាលត្បាតចូលដល់កន្លែងការងារ និងពិសេស ទីកន្លែងព្យាបាល និងស្តារនីតិសម្បទា អ្នកញៀនគ្រឿងញៀន និងពន្ធនាគារ ។
ទី៣-គណៈកម្មាធិការត្រួតពិនិត្យគ្រឿងញៀន រាជធានីខេត្ត ទាំងអស់ ត្រូវបន្តយកចិត្តទុកដាក់អនុវត្តឲ្យមានប្រសិទ្ធភាព ស្តីពីការពង្រឹងវិធានការប្រយុទ្ធប្រឆាំងគ្រឿងញៀន និងគោលន យោបាយ «ភូមិឃុំមានសុវត្ថិភាព» ។
ទី៤-គ្រប់ក្រសួង ស្ថាប័ន អង្គភាព និងអាជ្ញាធរថ្នាក់ក្រោមជាតិ ពាក់ព័ន្ធទាំងអស់ត្រូវ ធ្វើការ គាំទ្រ និងបំផុសឱ្យគ្រប់សមាសភាពសង្គម ក្នុងមូលដ្ឋានចូលរួមក្នុងចលនានៃការព្យាបាល និងស្តារនីតិសម្បទាអ្នកញៀនគ្រឿងញៀន ក្នុងសហគមន៍ឱ្យទទួលបានជោគជ័យ ។
ទី៥-វិស័យឯកជនអ្នកវិនិយោគ ឬអាជីវករ ដែលមានមុខរបរពាក់ព័ន្ធនឹងទីកន្លែង ដែលងាយ នឹងទទួលរងនូវការពាក់ព័ន្ធនឹងបទល្មើសគ្រឿងញៀន ដាច់ខាតមិនត្រូវពាក់ព័ន្ធនឹងគ្រឿងញៀន ។
ទី៦-ដូចដែលនឹងឃើញនាពេលបន្តិចទៀតនេះគ្រឿងញៀនជាច្រើននឹង ត្រូវដុតបំផ្លាញ ដែលនេះជាសារមួយបញ្ជូនដល់ឧក្រិដ្ឋជនគ្រឿងញៀនឱ្យឃើញពីឆន្ទៈ មុតមាំរបស់រាជរដ្ឋាភិបាលកម្ពុជា ក្នុងការបង្ក្រាបគ្រឿងញៀន ។ និងទី៧- សូមអំពាវនាវដល់ប្រទេសក្នុងតំបន់ និងពិភពលោក ដៃគូអភិវឌ្ឍ អង្គការជាតិ និងអន្តរជាតិ សូមចូលរួមជាមួយរាជរដ្ឋាភិបាកម្ពុជា ដើម្បីប្រយុទ្ធប្រឆាំងនឹង បញ្ហាគ្រឿងញៀន។
សូមរំលឹកថា ក្នុងរយៈពេល៥ខែ ដើមឆ្នាំ២០២០ សមត្ថកិច្ចកម្ពុជា បង្ក្រាបគ្រឿងញៀន បាន៤.៥១០ករណី ឃាត់ខ្លួនជនសង្ស័យ ៨.៩២៧នាក់ រឹបអូសគ្រឿងញៀន បានជាង២០៩គីឡូក្រាម ៕
ចែករំលែកព័តមាននេះ