ខេត្តត្បូងឃ្មុំ ៖ លំនៅឋានចំនួន១០ខ្នងនៅឃុំអញ្ចើម ស្រុកត្បូងឃ្មុំ បានរងការខូចខាតដោយ សារខ្យល់កន្ត្រាក់ កាលពីវេលាម៉ោងប្រមាណ៩យប់ថ្ងៃទី២៥ ខែមិថុនា ឆ្នាំ២០២០ ។ ទោះជាយ៉ាងណា គ្រោះធម្មជាតិនេះមិនបណ្ដាលឱ្យមនុស្សណាម្នាក់មានគ្រោះថ្នាក់ទេ ចំណែកមន្ត្រីសាខាកាកបាទក្រហមកម្ពុជាខេត្ត ក៏បានត្រៀម នាំយកអំណោយមនុស្សធម៌ទៅផ្តល់ជូនដល់ពលរដ្ឋរងគ្រោះដែរ ។
វរសេនីយ៍ឯក សួស សៀងលី អធិការនគរបាលស្រុកត្បូងឃ្មុំ បានឲ្យដឹងថា ក្នុងចំណោមលំនៅឋានទាំង១០ខ្នងដែលខូចខាតនេះ មាន៣ខ្នងខូចខាតធ្ងន់ ឯ៧ខ្នងទៀតខូចខាតតិចតួច ។
ចំពោះតំបន់ដែលមានការខូចខាតផ្ទះសម្បែងនេះ មិនមានសម្បូរដើមឈើព័ទ្ធជុំវិញទេ ពោលគឺមានតែវាលស្រែប៉ុណ្ណោះ ។
លោកអធិការ ឲ្យដឹងទៀតថា ចំពោះលំនៅឋានដែលទទួលរងការខូចខាតមាន ១-ភូមិតាត្រាវ
ចំនួន៦ខ្នង ២-ភូមិពន្លៃផ្សារ២ខ្នង និង៣-ភូមិក្រោយវត្ត២ខ្នង ។ នៅព្រឹកថ្ងៃទី២៥ ខែមិថុនានគរបាលប៉ុស្តិ៍ បានទៅពិនិត្យនិងស្រង់ទិន្នន័យនៃការខូចខាត។
លោក រស់ សុខន អនុប្រធានសាខាកាកបាទក្រហមកម្ពុជាខេត្តបានឱ្យដឹងថា រូបលោកបានចាត់ឱ្យមន្ត្រីអនុសាខាកាកបាទក្រហមស្រុកទៅពិនិត្យមើលទំហំនៃការខូចខាត ដើម្បីត្រៀមនាំយកអំណោយយកទៅចែកជូនដល់ពួកគាត់តាមការណែនាំរបស់ឯកឧត្តមអភិបាលខេត្ត ៕
ចែករំលែកព័តមាននេះ