អភិបាលខេត្ត ទៅពិនិត្យសហគមន៍ធ្វើនំបញ្ចុក
- សៀមរាប
ខេត្តសៀមរាប ៖ ថ្ងៃទី២៥ ខែមិថុនា ឆ្នាំ២០២០ ឯកឧត្តម ទៀ សីហា អភិបាលខេត្តរួមនឹងគណៈ ប្រតិភូ…
ខេត្តសៀមរាប ៖ ថ្ងៃទី២៥ ខែមិថុនា ឆ្នាំ២០២០ ឯកឧត្តម ទៀ សីហា អភិបាលខេត្តរួមនឹងគណៈ ប្រតិភូ បានអញ្ជើញទៅពិនិត្យមើលសកម្មភាពប្រជាសហគមន៍ធ្វើនំបញ្ចុកប្រកបដោយភាពអនា ម័យ នៅក្នុងភូមិព្រះដាក់ ឃុំព្រះដាក់ ស្រុកបន្ទាយស្រី ព្រមទាំងបានទទួលទាននំបញ្ចុកដែលជាស្នាដៃរបស់កូនខ្មែរអង្គរទៀតផង ។ បន្តមក គណៈប្រតិភូបានទៅពិនិត្យមើលការងារកសិកម្ម ដែលអាជ្ញាធរស្រុកបានធ្វើស្រែបង្ហាញ នៅក្នុងភូមិសាស្ត្រឃុំព្រះដាក់នេះផងដែរ ។
លោក ឃឹម ហ្វីណង់ អភិបាលស្រុកបន្ទាយស្រី ក៏ដូចប្រជាកសិករដែលជាម្ចាស់ស្រែ បានឲ្យដឹងថា ការដែលអាជ្ញាធរធ្វើស្រែបង្ហាញនៅលើដីស្រែរបស់បងប្អូននារដូវវស្សានេះ គឺជាការក្រើនរំឭកដល់បងប្អូននៅក្នុងឃុំព្រះដាក់ទាំងមូល សុំកុំពឹងផ្អែកទៅលើវិស័យទេសចរណ៍ខ្លាំងពេក យើងត្រូវគិតពីការងារបង្កបង្កើនផលផង មិនត្រូវទុកឲ្យដីទំនេរគ្មានទទួលបានផលអ្វីនោះទេ ។
ម្យ៉ាងទៀត ដោយនៅលើពិភពលោកបានជួបនូវវិបត្តិជំងឺកូវីដ-១៩ ដែលធ្វើឲ្យប៉ះពាល់យ៉ាងខ្លាំងលើវិស័យទេសចរណ៍នៅខេត្តសៀមរាប សំខាន់បងប្អូនស្ថិតនៅក្នុងតំបន់រមណីយដ្ឋានអង្គរតែម្តង ។
លោកអភិបាលស្រុក ថ្លែងទៀតថា ដោយកត្តានេះហើយបានអាជ្ញាធរស្រុកធ្វើការក្រើន រំឭកដល់បងប្អូនឲ្យប្រកបការងារបង្កបង្កើនទៅតាមប្រពៃណីទំនៀមទម្លាប់របស់ដូនតាយើង ដោយប្រើ ប្រាស់នូវជីធម្មជាតិជាចម្បង ក្នុងការបង្កើនទន្និផលស្រូវ បន្ទាប់ពីការងារប្រចាំថ្ងៃរបស់បងប្អូន ។
ឯកឧត្តម ទៀ សីហា បានកោតសរសើរបង ប្អូនប្រជាពលរដ្ឋ ដែលបានចាប់យកការធ្វើនំបញ្ចុកជារបរប្រចាំគ្រួសារ បន្ទាប់ពីការងារធ្វើស្រែចម្ការ ក្នុងការលើកកម្ពស់ជីវភាពក្រុមគ្រួសារ ក្នុងពេលដែលខេត្តសៀមរាបទទួលរងផលប៉ះពាល់ពីការធ្លាក់ចុះភ្ញៀវទេសចរដោយសារវិបត្តិជំងឺកូវីដ-១៩ ។
ឯកឧត្តមអភិបាលខេត្ត បានធ្វើការណែនាំបងប្អូនប្រជាកសិករទាំងអស់ ដោយបញ្ជាក់ថា ទោះបីបងប្អូនមិនបានទទួលចំណូលពីវិស័យទេសចរណ៍ ក្នុងពេលជួបវិបត្តិជំងឺកូវីដ-១៩ក៏ពិតមែន តែបងប្អូនមានដីស្រែធ្វើការបង្កបង្កើន ផលដើម្បីផ្គត់ផ្គង់ជីវភាពក្រុមគ្រួសារ ប្រសើរជាងអ្នកដែលគ្មានដីបង្កបង្កើនផល ។
ម្យ៉ាងទៀត លើការងារបង្កបង្កើនផល សូមបងប្អូនគោរពទៅតាមបច្ចេកទេសរបស់មន្ត្រីបច្ចេក ទេសកសិកម្មដែលបានណែនាំ ដើម្បីធានានូវគុណភាពដីស្រែកុំឲ្យរេចរឹលខ្សោះជីជាតិ ដែលនាំឲ្យទិន្នផលស្រូវមានការធ្លាក់ចុះ ព្រមទាំងធ្វើឲ្យដំណាំស្រូវមិនលូតលាស់បានល្អ ដោយការប្រើប្រាស់ជីគីមីលើសកំណត់ និងខុសបច្ចេកទេសរបស់កសិកម្ម ។
បន្ទាប់មក ឯកឧត្តមអភិបាលខេត្ត និងប្រតិភូ បានបន្តដំណើរទៅពិនិត្យកសិដ្ឋានចិញ្ចឹមមាន់ នៅក្នុងភូមិត្បែងខាងជើង ឃុំត្បែង ស្រុកបន្ទាយ ស្រី បន្ទាប់ពីការដាំដុះបន្លែរួមផ្សំ ។
តាមការរៀបរាប់របស់ម្ចាស់កសិដ្ឋាន ដើមឡើយគឺចិញ្ចឹមក្នុងរូបភាពជាគ្រួសារទេ តែដោយបានឆ្លងកាត់ការសិក្សារៀនសូត្រពីបច្ចេកទេសនៃការចិញ្ចឹមមាន់ គាត់ក៏ពង្រីកការចិញ្ចឹមមាន់នេះរហូតក្លាយជាកសិដ្ឋានមួយនៅក្នុងឃុំត្បែង ។ មិនតែប៉ុណ្ណោះ គាត់ថែមទាំងបានធ្វើការបង្កាត់ពូជជាលក្ខណៈមាន់ស្រែ ភ្ញាស់បានជាកូនលក់ចែកចាយដល់ប្រជាពលរដ្ឋជិតឆ្ងាយដែលមាន បំណងចិញ្ចឹមមាន់នេះ ។ និយាយរួម ចាប់តាំងពីមានការដ្ឋានចិញ្ចឹមមាន់នេះមក ធ្វើឲ្យជីវភាពគ្រួសារគាត់ប្រែប្រួលខ្ពស់ឡើងថែមទៀត ។
ឯកឧត្តម ទៀ សីហា បានធ្វើការកោតសរសើរក្រុមគ្រួសារម្ចាស់កសិដ្ឋានខាងលើ ដែលមាន
គំនិតកែច្នៃការចិញ្ចឹមមាន់ ចាប់តាំងពីជាលក្ខណៈគ្រួសារ រហូតបង្កើតបានជាកសិដ្ឋានមួយ ដោយមិនបាននាំយកពូជមាន់ពីខាងក្រៅមកចិញ្ចឹមឡើយ គឺធ្វើការភ្ញាស់កូនដោយខ្លួនឯង និង ផលិតពងពូជនៅក្នុងកសិដ្ឋានផ្ទាល់ ព្រមទាំងចែកចាយដល់ប្រជាកសិករដែលមានបំណងក្នុងការចិញ្ចឹមមាន់ផងដែរ ។ ការចិញ្ចឹមមាន់របស់គាត់ ក៏បានបង្កើននូវចំណូលគ្រួសារមួយកម្រិតថែមទៀត ។
ដើម្បីឲ្យបងប្អូនប្រជាកសិករមានភាពជឿជាក់លើការចិញ្ចឹមមាន់នេះ ឯកឧត្តមអភិបាលខេត្ត
ក៏បានធ្វើការណែនាំមួយចំនួនចំពោះលោកប្រធានមន្ទីរពាណិជ្ជកម្មខេត្ត ត្រូវយកចិត្តទុកដាក់ខ្ពស់ក្នុងការរកទីផ្សារជូនដល់បងប្អូនប្រជាកសករនូវគ្រប់មុខកសិផលដែលបងប្អូនផលិតបាន ។ ម្យ៉ាងទៀត ទោះបីមានបញ្ហាវិបត្តិជំងឺកូវីដ-១៩ក៏ពិតមែន តែការដាំដុះដំណាំ និងការចិញ្ចឹមសត្វនេះ មិនបានពាក់ព័ន្ធទនឹងបញ្ហាជំងឺកូវីដ-១៩ទេ តែការងារចិញ្ចឹមសត្វនេះគឺដើម្បីបំពេញតម្រូវ
ការនៅតាមទីផ្សាររបស់ប្រជាពលរដ្ឋទៀតផង ។
ឯកឧត្តមអភិបាលខេត្ត ក៏បានណែនាំម្ចាស់កសិដ្ឋាន ត្រូវធ្វើអនាម័យឲ្យបានជាប្រចាំ ដើម្បីប្រយុទ្ធប្រឆាំងបង្ការទប់ស្កាត់ជំងឺកូវីដ-១៩ ឬជំងឺផ្សេងៗទៀត ៕
ចែករំលែកព័តមាននេះ