រាជាធានីភ្នំពេញ ៖ រាជរដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជា និងរដ្ឋាភិបាលសហរដ្ឋអាមេរិក តាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USIAD) បានចុះហត្ថលេខា នៅថ្ងៃទី២៥ ខែមិថុនា…
រាជាធានីភ្នំពេញ ៖ រាជរដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជា និងរដ្ឋាភិបាលសហរដ្ឋអាមេរិក តាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USIAD) បានចុះហត្ថលេខា នៅថ្ងៃទី២៥ ខែមិថុនា ឆ្នាំ២០២០ លើកិច្ចព្រមព្រៀងវិសោធនកម្ម ស្តីពីហិរញ្ញប្បទានសហប្រតិបត្តិការអភិវឌ្ឍន៍ សម្រាប់ឆ្នាំ២០២០ ដែលជាហិរញ្ញប្បទានឥតសំណងប្រមាណ ៥៦ លានដុល្លារអាមេរិក ដោយក្នុងនោះចំនួន៣៨លានដុល្លារ សម្រាប់វិស័យសុខាភិបាល និងអប់រំ រីឯចំនួន១៨លានដុល្លារទៀតសម្រាប់វិស័យកសិកម្ម និងបរិស្ថាន។
លោក ជិន ប៊ុនស៊ាន ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា «ការបន្តកិច្ចសហប្រតិបត្តិការអភិវឌ្ឍទ្វេភាគីនេះ គឺជាមានសំខាន់ក្នុងការលើកកម្ពស់ និងពង្រឹងកិច្ចសហប្រតិបត្តិការ និងភាពជាដៃគូរវាងប្រទេសទាំងពីរ»។
តាមរយៈសហប្រតិបត្តិការជាមួយក្រសួងសុខាភិបាល ការគាំទ្រនេះនឹងបន្តរួមចំណែកកាត់បន្ថយអត្រាមរណៈភាពមាតា និងទារកដែលមានអាយុក្រោម៥ឆ្នាំ ក៏ដូចជាផ្តល់ការគាំទ្រលើកម្មវិធីនានាក្នុងការកាត់បន្ថយ ជំងឺក្រិន និងជំងឺខ្វះគ្រាប់ឈាមក្រហមរបស់កុមារ និងស្ត្រី និងកាត់បន្ថយអត្រាប្រេវ៉ាឡង់នៃជំងឺអេដស៍ ជំងឺរបេង និងជំងឺគ្រុនចាញ់នៅកម្ពុជា។
ចំពោះវិស័យអប់រំ ក្រសួងអប់រំ យុវជន និងកីឡា និងទីភ្នាក់ងារ USAID នឹងបន្តគាំទ្រ កិច្ចខិតខំប្រឹងប្រែងក្នុងការធ្វើឱ្យប្រសើរឡើងនូវសមត្ថភាពការអានរបស់កុមារ កាត់បន្ថយអត្រាបោះបង់ចោលការសិក្សា នៅថ្នាក់វិទ្យាល័យ និងបំពាក់បំប៉នបន្ថែមដល់ប្រជាជនកម្ពុជា ក្នុងការឈានចូលទៅក្នុងទីផ្សារពលកម្ម។
ក្នុងឱកាសនោះដែរ លោកឯកអគ្គរដ្ឋទូតវិសាមញ្ញ និងពេញសមត្ថភាពនៃសហរដ្ឋអាមេរិកប្រចាំនៅកម្ពុជា លោក W. Patrick Murphy ក៏បានគូសបញ្ជាក់ដែរថា «រដ្ឋាភិបាលសហរដ្ឋអាមេរិកប្តេជ្ញាបន្តការគាំទ្ររបស់ខ្លួនចំពោះប្រជាជនកម្ពុជា ក្នុងការសម្រេចឱ្យបាននូវការអភិវឌ្ឍសង្គមសេដ្ឋកិច្ចមួយប្រកបដោយចីរភាព បរិយាប័ន្ន និងសមធម៌»។
គួរបញ្ជាក់ផងដែរថា គិតត្រឹមខែមីនា ឆ្នាំ២០១៦ បូករួមទាំងកិច្ចព្រមព្រៀងដែល ទើបចុះហត្ថលេខានាថ្ងៃនេះ ភាគីអាមេរិកបានផ្តល់ហិរញ្ញប្បទានឥតសំណងសរុប២៥៣លានដុល្លារអាមេរិក សម្រាប់គាំទ្រដល់វិស័យអាទិភាពទាំង៤នេះ។ បន្ថែមពីលើនេះ រដ្ឋាភិបាលសហរដ្ឋអាមេរិក បានផ្តល់ការគាំទ្រអង្គការសង្គមស៊ីវិលដែលបានធ្វើការ ផ្តោតលើសិទ្ធមនុស្ស ការប្រឆាំងការជួញដូរមនុស្ស និងគណនេយ្យភាព និងតម្លាភាពនៅក្នុងប្រទេសកម្ពុជាផងដែរ៕
ចែករំលែកព័តមាននេះ