ខេត្តស្វាយរៀង ៖ លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានថ្លែងប្រាប់ប្រជាការពារភូមិត្រូវបម្រើប្រជាពលរដ្ឋឲ្យបានល្អ ពេលមានករណីបទល្មើសផ្សេងៗកើតមានឡើង…
ខេត្តស្វាយរៀង ៖ លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានថ្លែងប្រាប់ប្រជាការពារភូមិត្រូវបម្រើប្រជាពលរដ្ឋឲ្យបានល្អ ពេលមានករណីបទល្មើសផ្សេងៗកើតមានឡើង ត្រូវនៅជាប់និងជួយដល់ប្រជាពលរដ្ឋជាប្រចាំ ដោយមិនប្រកាន់និន្នាការអ្វីឡើយ ។
លោកជំទាវឧបនាយករដ្ឋមន្ត្រី បានថ្លែងបែបនេះ ក្នុងឱកាសអញ្ជើញជួបសំណេះសំណាលជាមួយប្រជាការពារភូមិចំនួន៤១២នាក់ នៃស្រុកកំពង់រោទ៍ ដែលបានរៀបចំឡើងនៅវិទ្យាល័យ ហ៊ុន សែន កំពង់រោទ៍ កាលពីព្រឹកថ្ងៃទី២៥ ខែមិថុនា ឆ្នាំ២០២០ ។
លោកជំទាវបានផ្តាំផ្ញើសាកសួរសុខទុក្ខ ដោយក្តីនឹករឭកពីសំណាក់សម្តេចតេជោនាយករដ្ឋមន្ត្រី
ហ៊ុន សែន និងសម្តេចកិត្តិព្រឹទ្ធបណ្ឌិត ចំពោះបងប្អូនប្រជាពលរដ្ឋទាំងអស់នៅទូទាំងខេត្តស្វាយ
រៀង ដែលសម្តេចទាំងទ្វេតែងតែគិតគូរខ្ពស់ចំពោះជីវភាពប្រចាំថ្ងៃរបស់ប្រជាពលរដ្ឋ ។
លោកជំទាវមានប្រសាសន៍ថា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន ប្រទេសជាតិមានសុខសន្តិភាព និងបានដាក់ចេញនូវវិធានការជាច្រើន ក្នុងន័យពង្រឹងនិងធ្វើឲ្យប្រសើរឡើងនូវភូមិ ឃុំមានសុវត្ថិភាព ក៏ដូចជាគោលនយោបាយគាំពារសង្គមផ្សេងៗ ដើម្បីធ្វើឲ្យជីវភាពរស់នៅរបស់ប្រជាពលរដ្ឋកាន់តែប្រសើរឡើង ។ ជាពិសេស ការដាក់ឲ្យអនុវត្តនូវការផ្តល់សាច់ប្រាក់ជូនដល់ប្រជាពលរដ្ឋក្រកម្រិត១ និងក្រកម្រិត២ អំឡុងពេលដែលមេរោគកូវីដ-១៩ បាននិងកំពុងរាត្បាតនៅលើពិភពលោក ។
សម្រាប់តួនាទីប្រជាការពារវិញ លោកជំទាវ ឧបនាយករដ្ឋមន្ត្រី ម៉ែន សំអន បានចាត់ទុកជាកម្លាំងដ៏សំខាន់បំផុត ដើម្បីរក្សាសុវត្ថិភាព សន្តិសុខជូនប្រជាពលរដ្ឋក្នុងភូមិ ឃុំ របស់យើង ហើយកម្លាំងនេះក៏ជាសេនាធិការរបស់ប៉ុស្តិ៍នគរបាលរដ្ឋបាលឃុំ ដើម្បីទប់ស្កាត់រាល់បទល្មើស ដែលកើតមានឡើងក្នុងមូលដ្ឋាន ។
លោកជំទាវ ក៏បានស្នើឲ្យប្រជាពលរដ្ឋកម្ពុជាគ្រប់រូប ត្រូវបន្តរក្សាការប្រុងប្រយ័ត្នខ្ពស់ក្នុងការបង្ការ និងការពារនូវការឆ្លងរីករាលដាលនៃជំងឺកូវីដ-១៩នៃរលកទី២ ដោយគោរពនិងអនុវត្តឲ្យបានខ្ជាប់ខ្ជួននូវគោលការណ៍រក្សាគម្លាតសង្គមនិងវិធានការនានាតាមការកំណត់របស់ក្រសួង
សុខាភិបាល ។
លោកជំទាវឧបនាយករដ្ឋមន្ត្រី បានអំពាវនាវឲ្យប្រជាពលរដ្ឋទាំងអស់គ្នា ត្រូវបង្កើនការផលិតផ្នែកកសិកម្ម តាមរយៈការដាំដុះ ការចិញ្ចឹមសត្វជាដើម ។ ចំណែកឯអាជ្ញាធរ ត្រូវតែពង្រឹងឲ្យមានប្រសិទ្ធភាពនូវភូមិ ឃុំ មានសុវត្ថិភាព និងចូលរួមគោរពច្បាប់ចរាចរណ៍ទាំងអស់គ្នា ។ក្នុងពិធីសំណេះសំណាលនោះ លោកជំទាវ ម៉ែន សំអន ក៏បានផ្តល់សម្លៀកបំពាក់មួយសម្រាប់ និងប្រាក់មួយចំនួនដល់ប្រជាការពារទាំង៤១២នាក់ផងដែរ ៕
ចែករំលែកព័តមាននេះ