ខេត្តមណ្ឌលគិរី ៖ អគ្គីភ័យយ៉ាងសន្ធោសន្ធៅបានបំផ្លាញលំនៅដ្ឋានប្រជាពលរដ្ឋមួយគ្រួសារអស់ទាំងស្រុងរួមមានទាំងគ្រឿងអលង្ការ ប្រាក់ និងសម្ភារៈមួយចំនួនទៀត សរុបប្រមាណ១ម៉ឺនដុល្លារ គឺត្រូវភ្លើងឆេះគ្មានសល់ ខណៈម្ចាស់ផ្ទះមិននៅ និងបានចាក់សោចោល ។
ហេតុការណ៍ខាងលើនេះបង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីព្រឹកថ្ងៃទី២៥ មិថុនា ២០២០នេះ ក្នុងភូមិស្វាយចេក សង្កាត់សុខដុម ក្រុងសែនមនោរម្យ ខេត្តមណ្ឌលគិរី។
ម្ចាស់ផ្ទះកើតហេតុខាងលើឈ្មោះ នើម ឡាង ភេទប្រុស អាយុ៣១ឆ្នាំ ជនជាតិព្នង ជាកសិករ និងប្រពន្ធឈ្មោះ ធី ហ៊ាប ភេទស្រី អាយុ២៦ឆ្នាំ ជនជាតិព្នង ជាកសិករ ។ គ្រួសារនេះមានទីលំនៅក្នុងភូមិឃុំកើតហេតុខាងលើ ។
តាមប្រភពពីប្រជាពលរដ្ឋដែលជួយពន្លត់អគ្គីភ័យនេះបានឲ្យដឹងថា គេមិនបានដឹងពីមូលហេតុពិតប្រាកដបណ្ដាលឱ្យកើតមានអគ្គីភ័យឆាបឆេះផ្ទះខាងលើនេះទេ ព្រោះផ្ទះកើតហេតុខាងលើនេះម្ចាស់មិននៅ ដោយពួកគាត់នាំគ្នាទៅចំការអស់ហើយ ក្រោយពេលមានការភ្ញាក់ផ្អើល គឺលំនៅដ្ឋានខាងលើនេះត្រូវភ្លើងឆាបឆេះយ៉ាងសន្ធោសន្ធៅបាត់ទៅហើយ ។
លោក កាន់ ពេញ អធិការនគរបាលក្រុងសែនមនោរម្យបានប្រាប់ថា បន្ទាប់ពីទទួលបានដំណឹងខាងលើ ភ្លាម លោកបានចាត់ឲ្យរថយន្តពន្លត់អគ្គីភ័យចំនួន៣គ្រឿងចេញទៅពន្លត់អគ្គិភ័យខាងលើនេះដែរ ប៉ុន្តែដោយស្ថានភាពផ្លូវចូលទៅទីតាំងកើតហេតុតូចចង្អៀត ទើបធ្វើឱ្យរថយន្តពន្លត់អគ្គីភ័យពិបាកបន្តិចដែរ តែទោះជាយ៉ាងណា កម្លាំងនគរបាលបានប្រើទឹកបាញ់ពន្លត់អស់ចំនួន២រថយន្ត ហើយអគ្គីភ័យបានរលត់ទាំងស្រុងនៅវេលាម៉ោង១១ព្រឹកថ្ងៃដដែល។
លោកឧត្តសេនីយ៍ត្រី អ៊ូច វុធ ស្នងការរងទទួលផែនអគ្គីភ័យបានថ្លែងដែរថា ផ្ទះដែលត្រូវភ្លើងឆេះខាងលើមានទំហំ១០ម៉ែត្រគុណនឹង៧ម៉ែត្រ ប្រភេទផ្ទះឈើប្រក់ស័ង្កសី ចំពោះមូលហេតុគឺបណ្ដាលមកពីទុស្សេខ្សែភ្លើង ។ លោកបន្តថា ទ្រព្យសម្បត្តិដែលបាត់បង់ រួមមានលុយ៣៦០០ដុល្លារ លុយចំនួន៦លានរៀល មាស២តម្លឹង និងអង្ក៦បេ និងសម្ភារមួយចំនួនទៀត ៕ (កែសម្រួលដោយ ៖ ធីតា)
ចែករំលែកព័តមាននេះ