ខេត្តកំពង់ស្ពឺ ៖ កម្លាំងជំនាញការិយាល័យប្រឆាំងការជួញដូរមនុស្ស និងការពារអនីតិជន ដឹកនាំដោយលោកស្រីវរសេនីយ៍ទោ មួន មល្លិកា នាយការិយាល័យ បានឆ្មក់ចូលបង្ក្រាបទីតាំង បង្កប់សេវាផ្លូវភេទ ជ្រកក្រោមផ្លាកម៉ាស្សាកោសជប់ ស្ថិតក្នុងភូមិកាយៀវ ឃុំជង្រុក ស្រុកគងពិសី ខេត្តកំពង់ស្ពឺ ។
ប្រតិបត្ដិការធ្វើឡើងកាលពីវេលាម៉ោង១៦និង៣០នាទីថ្ងៃទី២៤ ខែមិថុនា ឆ្នាំ២០២០ ដោយកម្លាំងជំនាញ ឃាត់ខ្លួនម្ចាស់ទីតាំងម្នាក់ មានឈ្មោះ ឈួន ប៊ុនថន ភេទប្រុស អាយុ៤០ឆ្នាំ មុខរបរ បើកម៉ាស្សាកោសជប់ ។
លោកស្រី មួន មល្លិកា បានឲ្យដឹងថា ក្រោយទទួលបានព័ត៌មាន លោកស្រីបានគោរពស្នើសុំគោលការណ៍ដឹកនាំពីលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ និងបានការឯកភាពពីលោកស្រី ចាតសូ រស្មី ព្រះរាជអាជ្ញាអយ្យការ អមសាលាដំបូងខេត្ដកំពង់ស្ពឺ ដើម្បីប្រតិបត្ដិការរំដោះនារីរងគ្រោះ ដោយសារការចាញ់កលល្បិចលួងលោមពីថៅកែ អោយរកស៊ីទទួលសេវាផ្លូវភេទផង និងឲ្យធ្វើជាអ្នកម៉ាស្សាកោសជប់ ។
បច្ចុប្បន្ន ម្ចាស់ទីតាំងបង្កប់ សេវាផ្លូវភេទ ត្រូវបានជំនាញកសាងសំណុំរឿងបញ្ជូនទៅអយ្យការអមសាលាដំបូងខេត្ដកំពង់ស្ពឺចាត់ការនីតិវិធីបន្ដ រីឯនារីរងគ្រោះបានបញ្ជូនទៅជំនាញជួយដល់ស្ដ្រីងាយរងគ្រោះ ៕
ចែករំលែកព័តមាននេះ