ខេត្តបាត់ដំបង ៖ សមត្ថកិច្ចនៅមិនទាន់មានតម្រុយពីមុខសញ្ញាជនសង្ស័យដែលចូលលួចសម្ភារៈនៅក្នុងបន្ទប់ទីចាត់ការរបស់លោកនាយក «វិទ្យាល័យជ្រៃ» ស្ថិតនៅក្នុងឃុំជ្រៃ ស្រុកថ្មគោល នៅឡើយទេ រហូតមកដល់ព្រឹកថ្ងៃទី២៦ ខែមិថុនា ឆ្នាំ២០២០នេះ។ នេះបើតាមការលួចផ្ដល់ព័ត៌មានពីមន្ត្រីជំនាញ ដែលមេៗមួយចំនួនព្យាយាមលាក់បាំង។
ប្រភពពីសមត្ថកិច្ចបានឱ្យដឹងថា អំពើចោរកម្មដែលផ្ដើមចេញពីការគាស់ទំលុះទម្លាយខាងលើនេះ គេសង្ស័យបានកើតឡើងនៅរសៀលថ្ងៃទី២៤ ខែមិថុនា នៅក្នុងទីចាត់ការនៃវិទ្យាល័យជ្រៃ ស្ថិតក្នុងភូមិក្បាលខ្មោច ឃុំជ្រៃ ស្រុកថ្មគោល ដែលបង្កឡើងដោយជនមិនស្គាល់មុខ។
ប្រភពបានបញ្ជាក់ថា គេមិនទាន់ដឹងថា តើជនដៃដល់មានគ្នាប៉ុន្មាននាក់នោះទេ ? ប៉ុន្តែជនដៃដល់បានធ្វើសកម្មភាពគាស់សោរបន្ទប់ទីចាត់ការរបស់លោក រឿង ភីរុណ ជានាយកវិទ្យាល័យនេះ រួចចូលលួចយកសម្ភារៈអស់គ្មានសល់ ខណៈវិទ្យល័យ និងទីចាត់ការនេះ ត្រូវបានបិទទ្វារនៅក្នុងអំឡុងកូវីដ១៩។
បើតាមព័ត៌មានដែលកោះសន្តិភាពទទួលបានកាលពីថ្ងៃទី២៥ ខែមិថុនា ពីសម្ភារៈដែលបាត់បង់ រួមមាន ៖ កុំព្យូទ័រម៉ាក DeLL Destop ចំនួន១ឈុត, កុំព្យូទ័រម៉ាក Asus Destop ចំនួន១គ្រឿង, ម៉ូនីទ័រចំនួន១, Speker ចំនួន២ រួមទាំងសម្ភារៈបន្ទាប់បន្សំមួយចំនួនទៀតដែលទុកនៅក្នុងបន្ទប់ទីចាត់ការនោះ។
វិទ្យាល័យជ្រៃ ក៏ដូចជាវិទ្យាល័យដទៃទៀតដែរ ត្រូវបានបិទទ្វារជាច្រើនខែកន្លងមកហើយដោយសារការរីករាលដាលនៃជំងឺកូវីដ១៩ ហើយក៏ជាឱកាសល្អសម្រាប់ចោរធ្វើសកម្មភាព មិនរំខានដល់សមត្ថកិច្ចឡើយ។
កោះសន្តិភាពមិនទាន់អាចទំនាក់ទំនងសុំការបញ្ជាក់បន្ថែមបានទេ នៅព្រឹកថ្ងៃទី២៦ មិថុនា នេះ។ ប៉ុន្តែសមត្ថកិច្ចបានបង្ហើបឱ្យដឹងថា កន្លងទៅ នៅក្នុងវិទ្យាល័យជ្រៃនេះ ធ្លាប់មានជម្លោះផ្ទៃក្នុង តែគេមិនដឹងថា ផ្ដើមពីរឿងអ្វីទេ ហើយក៏គេមិនទាន់ដឹងថា តើករណីគាស់ទំលុះទម្លាយទ្វារទីចាត់ការចូលលួចសម្ភារៈធ្វើការរបស់លោកនាយកវិទ្យាល័យជ្រៃ នេះមានពាក់ព័ន្ធនឹងវិវាទផ្ទៃក្នុងដែរឬយ៉ាងណានោះទេ ? ព្រោះសមត្ថកិច្ចកំពុងស៊ើបអង្កេតនៅឡើយ។
ពាក់ព័ន្ធនឹងបញ្ហាវិវាទផ្ទៃក្នុងនៃវិទ្យាល័យនេះ បើតាមមន្ត្រីម្នាក់បាននិយាយថា សម្ភារៈដែលបាត់បង់នោះមិនមែនជារបស់លោក រឿង ភិរុណ នាយកវិទ្យាល័យទេ តែជារបស់លោកនាយករងម្នាក់ ដែលទុកនៅក្នុងទីចាត់ការនោះរួមគ្នាដែរ។ ហើយលោកធំៗដែលអង្គុយធ្វើការនៅទីនោះ មើលមុខគ្នាមិនសូវចំទេ។
ជុំវិញករណីនេះ សមត្ថកិច្ចហាក់មិនទាន់បើកទូលាយក្នុងការផ្ដល់ព័ត៌មានទេ ព្រោះវាជារឿងដែលគេព្យាយាមលាក់បាំងមិនចង់ឱ្យមានការផ្សព្វផ្យាយចេញក្រៅ។ ប៉ុន្តែមានប្រភពជាច្រើនដែលដឹងរឿងនេះ ហើយចង់ទម្លាយជាសាធារណៈ។
មន្ត្រីជំនាញបានប្រាប់ដែរថា ពេលនេះសមត្ថកិច្ចហាក់មិនទាន់កំណត់នូវមុខសញ្ញាជនសង្ស័យណាម្នាក់ឱ្យប្រាកដនៅឡើយទេ តែយ៉ាងណា សមត្ថកិច្ចមូលដ្ឋានកំពុងធ្វើការស្រាវជ្រាវលើករណីនេះហើយ៕
ចែករំលែកព័តមាននេះ