ក្រសួងផ្ដល់ប្រាក់ឧបត្ថម្ភជាង៧ពាន់នាក់ នៅរោងចក្រ សហគ្រាស៤៤ ក្នុងវិស័យកាត់ដេរ និងទេសចរណ៍
- ភ្នំពេញ
រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងនៅល្ងាចថ្ងៃទី២៥ ខែ មិថុនា ឆ្នាំ ២០២០ នេះ…
រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងនៅល្ងាចថ្ងៃទី២៥ ខែ មិថុនា ឆ្នាំ ២០២០ នេះ ក្រសួងបានបើកផ្ដល់ប្រាក់ឧបត្ថម្ភ (លើកទី ៨) ជូនបងប្អូនកម្មករនិយោជិតសរុបចំនួន ៧.០២៨នាក់ នៅរោងចក្រ សហគ្រាសចំនួន៤៤ ក្នុងវិស័យកាត់ដេរ និងវិស័យទេសចរណ៍ ដែលត្រូវបានព្យួរកិច្ចសន្យាការងារនេះ។
យោងតាម លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ក្នុងអំឡុងពេលជំងឺកូវីដ១៩ កំពុងតែវាយប្រហារជាសកល បង្កឲ្យមានផលប៉ះពាល់យ៉ាងធ្ងន់ធ្ងរទៅលើសេដ្ឋកិច្ចសង្គម ដំណើរការនៃសង្វាក់ផលិតកម្មជាដើម មិនថាបណ្តាប្រទេសជាច្រើន នៅលើពិភពលោកនេះទេដែលទទួលរងនូវផលប៉ះពាល់នេះ សូម្បីតែកម្ពុជាក៏ទទួលរងឥទ្ធិពលអស់ទាំងនេះដែរ។
លោក អ៊ិត សំហេង មានប្រសាសន៍ថា «នៅក្នុងបរិបទនៃរីករាលដាលការឆ្លងជាសកល នៃជំងឺកូវីដ១៩ រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន បានដាក់ចេញនូវវិធានការបង្ការ ទប់ស្កាត់ នឹងប្រយុទ្ធប្រឆាំងកូវីដ១៩ ប្រកបដោយប្រសិទ្ធភាពខ្ពស់។ ក្រសួងការងារ និងបណ្តុះបណ្តាលវិជ្ជាជីវៈ បានចេញនូវសេចក្តីណែនាំបន្ថែមជាបន្តបន្ទាប់ ថែមទាំងបានចាត់ក្រុមការងារឱ្យចុះធ្វើ សកម្មភាពផ្សព្វផ្សាយពីវីធីបង្ការទប់ស្កាត់ និងប្រយុទ្ធប្រឆាំងជំងឺកូវីដ១៩នេះ នៅតាមបណ្តារោងចក្រ សហគ្រាស និងនៅតាមមជ្ឈមណ្ឌលចត្តាឡីស័កផងដែរ»។
ការលេចឡើងនូវជំងឺកូវីដ-១៩ នាពេលថ្មីៗនេះ បានបង្កជាបញ្ហាប្រឈមដ៏ធំមួយទៀត បន្ថែមលើបញ្ហាដែលមានស្រាប់ ជាពិសេសគឺសង្គ្រាមពាណិជ្ជកម្ម និងការថមថយកំណើនសេដ្ឋកិច្ច សម្រាប់សកលលោកក៏ដូចជាកម្ពុជាយើង។ ដើម្បីកាត់បន្ថយផលប៉ះពាល់ រក្សាលំនឹងអាជីវកម្ម និង លំនឹងជីវភាពជូន កម្មករនិយោជិតទាំងអស់ រាជរដ្ឋាភិបាលបានដាក់ចេញវិធានការអន្តរាគមន៍បន្ទាន់ជាបន្តបន្ទាប់ ដល់វិស័យដែលទទួលរផលប៉ះពាល់ធ្ងន់ជាងគេ គឺវិស័យអាជីវកម្ម ទេសចរណ៍ និងវិស័យកាត់ដេរសំលៀកបំពាក់ ស្បែកជើង និងកាបូប។ លើសពីនេះរាជរដ្ឋាភិបាលក៏បានត្រៀមដាក់ចេញនូវវិធានការថ្មីៗបន្ថែមទៀត ក្នុងករណីដែលស្ថានភាពសេដ្ឋកិច្ចរងផលប៉ះពាល់កាន់តែធ្ងន់ធ្ងរ។
ទន្ទឹមនេះ លោករដ្ឋមន្ត្រី ក៏បានលើកទឹកចិត្ត និងជម្រុញដល់ អង្គភាពពាក់ព័ន្ធគ្រប់កម្រិតរបស់ក្រសួង បន្តសហការគ្នាឲ្យស្អិតរមួតបន្ថែមទៀតក្នុងការជួយដោះស្រាយនូវការលំបាក ក៏ដូចជាផ្តល់សេវាជូនដល់បងប្អូនកម្មករនិយោជិតបានទាន់ពេលវេលា និងប្រកបដោយប្រសិទ្ធភាពខ្ពស់។
គូរបញ្ជាក់ផងដែរថា កាលពីព្រឹកថ្ងៃទី២៤ ខែមិថុនា ក្នុងឱកាសអញ្ជើញ ប្រកាសអនុវត្តកម្មវិធីផ្តល់សាច់ប្រាក់ ជូនប្រជាពលរដ្ឋមានជីវភាពក្រីក្រ និងងាយរងគ្រោះដោយសារជំងឺកូវីដ១៩ នៅវិមានសន្តិភាព សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី បានលើកឡើងថា «រាជរដ្ឋាភិបាលនឹងបន្តតាមដាន និងធ្វើការវាយតម្លៃអំពីសភាពការណ៍ និងផលប៉ះពាល់ជាក់ស្តែងនៃជំងឺកូវីដ១៩នេះ តទៅទៀត ប្រសិនបើសភាពការណ៍ និងផលប៉ះពាល់ជំងឺកូវីដ១៩ នៅតែបន្តអូសបន្លាយ មិនមានភាពល្អប្រសើរ កម្មវិធីជំនួយសង្គមនេះនឹងត្រូវអនុវត្តក្នុងជុំថ្មីបន្តទៀត សម្រាប់រយៈពេល២ខែ។ ក៏ប៉ុន្តែ បើផលប៉ះពាល់នៃជំងឺនេះ បានធូរស្បើយ រាជរដ្ឋាភិបាលនឹងបញ្ឈប់នូវកម្មវិធីជំនួយសង្គមមួយនេះ នឹងបង្វែថវិកាទៅវិនិយោគលើកិច្ចការងារចាំបាច់នានា ដើម្បីស្តារសេដ្ឋកិច្ច និងលើកកម្ពស់ជីវភាពប្រជាជនជារួមវិញ»៕
ចែករំលែកព័តមាននេះ