ខេត្តកណ្ដាល ៖ បើតាមសេចក្តីរាយការណ៍បានឱ្យដឹងថា បុរសជាឪពុកម្នាក់បានបង្ខំកូនស្រីខ្លួនឯងអាយុ១៥ឆ្នាំ ដើម្បីបំពានសេពសន្ថវៈអស់ពេលជាយូរខែណាស់មកហើយ ទើបតែបែកធ្លាយដល់ម្ដាយក៏ប្តឹងសមត្ថកិច្ចឲ្យចាប់ខ្លួនតែម្ដង។ ហេតុការណ៍ឃាត់ខ្លួនធ្វើឡើងនៅថ្ងៃទី២៤ ខែមិថុនា ឆ្នាំ២០២០ ម៉ោង១០និង៣០នាទីព្រឹក ដែលករណីនេះបានកើតឡើងកាលពីកំឡុងខែមករា ឆ្នាំ២០២០ ម៉ោង១២និង៣០នាទី ចំណុចចំការពោតខាងកើតព្រែក(ព្រែកមុខកំពូល) ស្ថិតក្នុងស្រុកមុខកំពូល ខេត្តកណ្តល។
បើតាមនគរបាលស្រុកមុខកំពូលបានឲ្យដឹងថា ជនសង្ស័យជាឪពុកខាងលើឈ្មោះ អេម រី ភេទប្រុស អាយុ៤០ឆ្នាំ ជនជាតិខ្មែរ មុខរបរកសិករ រស់នៅស្រុកមុខកំពូល ខេត្តកណ្តាល ចំណែកក្មេងស្រីរងគ្រោះអាយុ១៥ឆ្នាំ ។
ប្រភពដដែលបន្តថា ជនសង្ស័យគឺជាមុខសញ្ញាធ្លាប់ជាប់ពន្ធនាគារខេត្តកណ្ដាលចំនួន៥ឆ្នាំ កាលពីឆ្នាំ២០០០ ពីបទលួចមានស្ថានទម្ងន់ទោស ក្រោយពីចេញពន្ធធនាគារជនសង្ស័យមិនកែប្រែនោះទេ ហើយប្រើប្រាស់គ្រឿងញៀន និងហិង្សាក្នុងគ្រួសារទៀត ។ លុះមកដល់កំឡុងខែមករា ឆ្នាំ២០២០ ជនសង្ស័យក៏បានបង្ខំកូនស្រីខ្លួនឯងដែលទើបមានអាយុ១៥ឆ្នាំរហូតបានសម្រេច និងគំរាមក្មេងស្រីរងគ្រោះថា បើហ៊ានប្រាប់ម្ដាយឲ្យដឹង និងត្រូវច្របាច់កឲ្យក្មេងស្រីរងគ្រោះ។
ប្រភពដដែលបន្តទៀតថា ដោយសារតែក្មេងស្រីរងគ្រោះមានភាពភ័យខ្លាច ទើបមិនហ៊ានប្រាប់អ្នកណាឲ្យដឹងនោះទេ លុះរហូតមកដល់ថ្ងៃទី២០ ខែមិថុនា ឆ្នាំ២០២០នេះ ក្មេងស្រីរងគ្រោះបានដេកលើផ្ទះម្នាក់ឯង ខណៈនោះជនសង្ស័យបានយកកូនតូចម្នាក់ទៅដេកជាមួយ ដោយឲ្យប្រពន្ធដេកនៅក្រោមផ្ទះម្នាក់ឯង ខណៈដែលដេកនោះជនសង្ស័យបានធ្វើសកម្មភាពលូកលាន់ច្របាច់ដោះ ស្ទាបអង្អែលក្មេងស្រីរងគ្រោះម្តងទៀត ។
ប្រភពដដែលបន្តថា រហូតដល់ថ្ងៃទី២១ ខែមិថុនា នៅម៉ោង៧ព្រឹក ជនសង្ស័យបានហៅក្មេងស្រីរងគ្រោះឲ្យជាន់ចង្កេះ ប៉ុន្តែជនរងគ្រោះមិនមក ជនសង្ស័យក៏ប្រើហិង្សាដោយយកមែកក្រខុប មកវាយជនរងគ្រោះចំភ្លៅ និងកំភួនជើងឆ្វេង បណ្ដាលឱ្យជាំ ហើយជនសង្ស័យបានជេរប្រមាថជនរងគ្រោះថា «អញស្ទាបមិនបានទេ ង៉ែងទុកឲ្យប្រុសង៉ែងស្ទាប?»។
ប្រភពដដែលបន្តទៀតថា លុះដល់ថ្ងៃទី២៤ ខែមិថុនា ម៉ោង១០និង៣០នាទីព្រឹក ដោយសារជនរងគ្រោះទ្រាំមិនបានក៏ប្រាប់ម្ដាយឱ្យដឹង ទើបរឿងនេះត្រូវបែកធ្លាយ ក្រោយពីដឹងរឿងនេះ ជនរងគ្រោះ និងម្តាយក៏បានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលស្វាយអំពារតែម្ដង។
ក្រោយពីសមត្ថកិច្ចប៉ុស្តិ៍ទទួលពាក្យបណ្ដឹងរួចមក ក៏បានចុះស្វែងរកជនសង្ស័យ ហើយក៏បាននាំខ្លួនជនសង្ស័យមកប៉ុស្តិ៍ដើម្បីធ្វើការសាកសួរ។ នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានរំលោភសេពសន្ថវៈលើជនរងគ្រោះជាកូនពិតមែន។ ករណីនេះកម្លាំងជំនាញកំពុងកសាងសំណុំរឿង ដើម្បីបញ្ជូនមកកាន់អធិការដ្ឋាននគរបាលស្រុក ចាត់ការតាមនីតិវិធី៕ (កែសម្រួលដោយ ៖ បុប្ផា)
ចែករំលែកព័តមាននេះ