ខេត្តបាត់ដំបង៖ «ផ្ទះប្រចៀវ» ដែលអាជ្ញាធរអះអាងថា បានសាងសង់ ដើម្បីធ្វើអាជីវកម្មជាលក្ខណៈឯក ជន ដោយគ្មានច្បាប់អនុញ្ញាតនៅក្បែរជើងភ្នំសំពៅ ដែលជាតំបន់ទេសចរណ៍ដ៏ល្បីនៅក្នុងឃុំភ្នំសំពៅ ស្រុកបាណន់ ពេលនេះ…
ខេត្តបាត់ដំបង៖ «ផ្ទះប្រចៀវ» ដែលអាជ្ញាធរអះអាងថា បានសាងសង់ ដើម្បីធ្វើអាជីវកម្មជាលក្ខណៈឯក ជន ដោយគ្មានច្បាប់អនុញ្ញាតនៅក្បែរជើងភ្នំសំពៅ ដែលជាតំបន់ទេសចរណ៍ដ៏ល្បីនៅក្នុងឃុំភ្នំសំពៅ ស្រុកបាណន់ ពេលនេះ ត្រូវបានអាជ្ញាធរខេត្តសម្រេចបញ្ជាឲ្យរុះរើចោលវិញទាំងចម្រូងចម្រាស់ បន្ទាប់ពីធ្វើអាជីវកម្មលក់ដូរ និងទទួលស្វាគមន៍ភ្ញៀវគ្រប់ជាតិសាសន៍បានរយៈពេលប្រហែល២ឆ្នាំ ។
ក្រុមជាងដែលកំពុងរុះរើ«ផ្ទះប្រចៀវ»នេះ បាននិយាយថា ពួកគេបានធ្វើការរុះរើ«ផ្ទះប្រចៀវ» នេះជាងមួយសប្ដាហ៍ហើយ។ ប៉ុន្តែពួកគេមិនបានប្រាប់អំពីមូលហេតុនៃការរុះរើផ្ទះប្រចៀវនេះចោលនោះទេ។ ហើយពួកគេក៏មិនបានប្រាប់ពីឈ្មោះម្ចាស់កម្មសិទ្ធិកាន់កាប់ផ្ទះប្រចៀវនេះឲ្យបានច្បាស់លាស់ដែរ តែបានបង្ហើបតិចៗថា « អ្នកធ្វើផ្ទះប្រចៀវនេះ គឺជាបុរសម្នាក់សំបូរលុយម្នាក់ នៅម្ដុំផ្សារភ្នំសំពៅ ឈ្មោះ ម៉ាន់ ដែលគាត់ស្គាល់ស្និទជាមួយមន្ត្រីទេសចរណ៍ខេត្ត និងអាជ្ញាធរស្រុកបាណន់។
«ផ្ទះប្រចៀវ» ត្រូវបានសាងសង់ឡើងមានចម្ងាយប្រហែល២០ម៉ែត្រ ពីជើងភ្នំសំពៅ ប៉ែកខាងកើត ឈមនិងរូបចម្លាក់ព្រះពុទ្ធលើជញ្ជាំងភ្នំ និងល្អាងប្រចៀវ ដើម្បីធ្វើអាជីវកម្មលក់ម្ហូបអាហារ និងគ្រឿងស្រវឹងផ្សេងៗ ជូនដល់ភ្ញៀវទេសចរជាតិ និងអន្តរាជាតិ ដែលធ្វើដំណើរទៅទស្សនាតំបន់ទេសចរណ៍«ភ្នំសំពៅ»នោះ ។ «ផ្ទះប្រចៀវ» នេះ ត្រូវបានគេតុបតែងលំអទៅដោយផ្កាភ្ញី បំពាក់ភ្លើងគ្រប់ពណ៌បំភ្លឺនៅពេលរាត្រី ដែលផ្នែកខាងលើមានសរសេរថា «ផ្ទះប្រចៀវ» ដែលមានលក្ខណៈទាក់ទាញភ្ញៀវបំផុត ។ នៅជាន់ផ្ទាល់ដី និងផ្នែកខាងមុខ មានតុកៅអី សម្រាប់ទទូលផង និងនៅខាងក្នុងជាច្រកឡើងទៅខាងលើ។ ភ្ញៀវទេសចរនានាអាចអង្គុយមើលហ្វូងសត្វប្រចៀវនៅខាងក្រោមក៏បាន ឬ អាចឡើងទៅជាន់ខាងលើ ទទួលទានអាហារ និងផឹកស្រាទស្សនាហ្វូងសត្វប្រចៀវក៏បាន ។ ភាគច្រើន នៃភ្ញៀវទេសចរតែងមានវត្តមានកកកុញនៅជាន់ខាងលើនៃផ្ទះប្រចៀវនេះ នាពេលថ្ងៃហៀបលិច ដើម្បីមើលហ្វូងសត្វប្រចៀវ រាប់រយលានក្បាលហោះចេញពីក្នុងល្អាងយ៉ាងសប្បាយភ្នែក។
ពាក់ព័ន្ធនឹងសំណង់ផ្ទះប្រចៀវនេះ បើតាមមន្ត្រីមួយរូបបាននិយាយថា «ផ្ទះប្រចៀវ » នេះ បានសាងសង់ឡើងនៅលើដីដែលគ្រប់គ្រងដោយអាជ្ញាធរអប្សារា ដែលធ្វើនៅក្នុងអំឡុងរាជកាល លោកជុំ ញ៉ ជាអធិរាជនៃអភិបាលស្រុកបាណន់ (បច្ចុប្បន្នចូលនិវត្តន៍)។ គេសង្ស័យថា លោកជុំ ញ៉ ជាអ្នកអនុញ្ញាតឲ្យ
ធ្វើ «ផ្ទះប្រចៀវ» នេះ ហើយក៏មានការផ្ដល់សញ្ញាភ្លើងខៀវពីមន្ទីរពាក់ព័ន្ធខ្លះៗផងដែរ ដើម្បីប្រមូលផលប្រយោជសម្រាប់បុគ្គលឬមន្ត្រីមួយចំនួន។ ប្រភពដដែលបានបញ្ជាក់ថា កាលចាប់ផ្ដើមកសាងដំបូង ក៏មានភាពចម្រូងចម្រាសខ្លះៗដែរ តែក្រោយមកក៏ស្ងាត់ទៅវិញ ទំនងអាចត្រូវរ៉ូវគ្នា ទើបផ្ទះប្រចៀវនេះ បានសង់រួចរាល់ និងបើកធ្វើអាជីវកម្មរហូតមកដល់ថ្ងៃរុះរើនេះ ។ ប៉ុន្តែលោក ជុំ ញ៉ អតីតអភិបាលស្រុកបាណន់ ត្រូវបានគេស្រង់សំដីថា គាត់មិនជាប់ពាក់ព័ន្ធនឹងសំណង់ផ្ទះប្រចៀវនោះទេ។
លោកប៉ែន សារីយូ អភិបាលស្រុកបាណន់ ដែលកំពុងកាន់ដំណែងសព្វថ្ងៃនេះ បានថ្លែងប្រាប់កោះសន្តិភាព នៅរសៀលថ្ងៃទី២៥ មិថុនា នេះថា «ផ្ទះប្រចៀវ» នេះ គ្មានច្បាប់អនុញ្ញាតតឲ្យសាងសង់ទេ។ ពេលនេះ ត្រូវបានលោកអភិបាលខេត្ត សម្រេចឲ្យរុះរើចោលហើយ។ ប៉ុន្តែលោកមិនបានបញ្ជាក់ថា តើក្រោយពីធ្វើការរុះរើផ្ទះប្រចៀវនេះចោល ត្រូវសាងសង់អ្វីឲ្យប្រាកដ ដើម្បីជំនួសផ្ទះប្រចៀវនោះទេ ?។ លោកអភិបាលស្រុករូបនេះ ក៏មិនបានប្រាប់ឈ្មោះ ម្ចាស់កម្មសិទ្ធិនៃផ្ទះប្រចៀវនេះដែរ ដោយគ្រាន់តែបញ្ជាក់យ៉ាងខ្លីថា «អ្នកធ្វើផ្ទះប្រចៀវនេះ គឺ អ្នកនៅភ្នំសំពៅនោះតែម្ដង ហើយកាលណោះអាជ្ញាធរមិនបានដឹងពីសកម្មភាពសាងសង់នោះទេ ដោយសារតែគេលួចធ្វើ»។
នៅពេលសួរថា ផ្ទះប្រចៀវនេះធំ ហើយសាងសង់នៅក្នុងតំបន់ទេសចរណ៍ (ដីរដ្ឋ) ទៀត ហើយដំណើរការយ៉ាងរលូនរហូតមកដល់ពេលនេះ តើហេតុអ្វីបានជាអាជ្ញាធរមិនដឹង ? លោកប៉េន សារិយូ បានឆ្លើយយ៉ាងដូច្នេះថា «នេះជាការខ្វះចន្លោះរបស់អាជ្ញាធរ ដែលមិនបានត្រួតពិនិត្យឲ្យបានដិតដល់»។ ចំពោះសំនួរថា ម្ចាស់ផ្ទះប្រចៀវមានប្រតិកម្ម និងទាមទារសំណងយ៉ាងតិច២ម៉ឺនដុល្លាផង តើរឿងនេះយ៉ាងម៉េចដែរ ? លោកអភិបាលស្រុករូបនេះ ហាក់ស្ទាក់ស្ទើរនឹងការផ្ដល់ចម្លើយ តែយ៉ាងណា លោកបានប្រាប់ថា «ខ្ញុំមិនច្បាស់លាស់ដែរ តែរឿងនេះប្រហែលខាងខេត្ត ដោះស្រាយរួចហើយ ទើបម្ចាស់សំណង់នេះព្រមរុះរើចេញ ដូច្នេះទាល់តែសួរទៅខាងខេត្ត ទើបដឹងច្បាស់»។
នៅលើទីតាំងនៃសំណង់ផ្ទះប្រចៀវនេះ បើតាមព័ត៌មាននានាបានឲ្យដឹងថា ក្រោយពីធ្វើការរុះរើផ្ទះប្រចៀវនេះចោល ទំនងអាជ្ញាធរអនុញាតឲ្យមានការសាងសង់សាសនា សម្រាប់ជាទីគោរពបូជា។ ប្រភពបានបញ្ជាក់ថា សំណង់នោះជា«សាលាឆទាន» ដ៏ធំមួយ នៅទល់មុខចម្លាក់ព្រះពុទ្ធរូបដ៏ធំសម្បើមនៅលើជញ្ជាំងថ្មភ្នំសំពៅ។ ជាមួយគ្នានោះ គេឃើញគំនូសប្លង់សំណង់«សាលាឆទាន»ដ៏ធំមួយ ត្រូវបានគេតាំងបង្ហាញជាសាធារណៈនៅក្បែរទីតាំងនោះ។ គំនូសប្លង់នោះ ត្រូវបានគេសរសេរនៅផ្នែកខាងលើ នៃរូបសំណងថា «សាលាសម្រាប់គោរពបូជា ចំពោះព្រះពុទ្ធ និងពុទ្ធប្រវត្តិ ជើងភ្នំសំពៅ»។
យ៉ាងណាក៏ដោយ ពាក់ព័ន្ធនឹងសំណង់«ផ្ទះប្រចៀវ» នេះ បើតាមព័ត៌មាន ដែលកោះសន្តិភាពទទួលបានចុងក្រោយ ប្រភពបានបង្ហើបឲ្យដឹងថា អ្នកភ្នំសំពៅ ម្នាក់ឈ្មោះ ម៉ាន់ ដែលបានសាងសង់ផ្ទះប្រចៀវនៅលើដីតំបន់ទេសចរណ៍នេះ ក៏មានការអនុញាតពី អតីតអភិបាលស្រុកបាណន់មុន គឺលោក ជុំ ញ៉ ដែលគេអះអាងថា កាលនោះមានធ្វើកិច្ចសន្យាទៀតផង។ ពេលនេះកិច្ចសន្យានោះ ត្រូវបានលោកប៉ែន សារីយូ អភិបាលស្រុកបាណន់ សព្វថ្ងៃនិរាករចោលហើយ មុនពេលអាជ្ញាធរខេត្ត ចេញសេចក្ដីសម្រេចឲ្យរុះរើចោល។
ដោយឡែក ចំពោះសំណងការខូចខាត បើតាមប្រភពដដែលបានបញ្ជាក់ថា ម្ចាស់សំណង់បានទាមទារសំណងរហូតដល់ទៅ៣ម៉ឺនដុល្លារ ហើយទំនងអាជ្ញាធរបានដោះស្រាយបញ្ចប់រួចរាល់ហើយ ទើបម្ចាស់សំណង់នេះយល់ព្រមរុះរើចេញ ។ ប៉ុន្តែយ៉ាងណា នេះគ្រាន់តែជាប្រភពព័ត៌មានដែលបានចង្អុលបង្ហាញ បែបព្រាវៗតែប៉ុណ្ណោះ។ ព្រោះកោះសន្តិភាព មិនទាន់អាចស្វែងរកម្ចាស់ផ្ទះប្រចៀវ ឈ្មោះ ម៉ាន់ នោះ ដើម្បីសុំការបំភ្លឺបាន ៕
ចែករំលែកព័តមាននេះ