រាជធានីភ្នំពេញ ៖ ស្បែកជើងចំនួន៤គូដែលម្ចាស់ទុកនៅមាត់ទ្វារផ្ទះ ស្ថិតនៅតាមមហាវិថីឈ្នះឈ្នះ ក្នុងខណ្ឌពោធិ៍សែនជ័យ រាធានីភ្នំពេញ នាពេលយប់ ត្រូវបានជនមិនស្គាល់មុខលួចយកតែ១ចំហៀងៗទៅបាត់ ដោយគូខ្លះលួចយកខាងឆ្វេង បន្សល់ទុកខាងស្ដាំ និងគូខ្លះទៀតលួចយកតែខាងស្ដាំ បន្សល់ទុកខាងឆ្វេង។
បន្ទាប់ពីក្រោកពីដំណេកនាព្រឹកថ្ងៃទី២៥ ខែមិថុនា ឆ្នាំ២០២០ បាត់ស្បែកជើងអស់១ចំហៀងៗបែបនេះម្ចាស់មានការហួសចិត្តយ៉ាងខ្លាំង ដោយខឹងផងនិងអស់សំណើចផងទៅនឹងទង្វើរបស់ជនមិនស្គាល់មុខ ហើយ ក៏បានថតរូបស្បែកជើងដែលនៅសល់៤ចំហៀងនោះរួចបង្ហោះនៅក្នុងអាខោនហ្វេសប៊ុកមួយឈ្មោះHeng Ly Heng ថា «វាមិនដែលឆ្កែណាគេយកតាមួយចឹង ស្បែកជើង៤គូបាត់មួយចំហៀងទាំអស់ មនុស្ស ឬក៏ឆ្កែធ្វើសុី»។
ក្រោយពេលបង្ហោះរូបភាពអមដោយសារបែបនេះ ក៏មានអ្នកចូលខមិនជាច្រើននាក់ផងដែរ ដោយអ្នកខមិននោះបានសរសេរទាំងអស់សំណើចដូចជាពាក្យថា «មនុស្សធ្វើសុីច្រើនជាងឆ្កែ ។បាត់ទ្រង់ទ្រាយធំហ្មងអូន ។ ល្ងាចមិញជិះកាត់និងឃើញដែរ គួរតែដាក់ក្នុងផ្ទះទៅទិញទ្រនើដាក់ស្បែកជើងមួយមក ចោរឥឡូវច្រើនណាស់ស្អីក៏លួចដែរឲ្យតែអាចលក់បានលុយ»។ រីឯអ្នកខ្លះទៀតខមិនថា «លួចយកទៅបង្កាត់ភ្លើង ឬពេលយប់វាប្រមូលៗអត់បានមើល» ជាដើម ។ ចំណែកម្ចាស់បានឆ្លើយតបទៅអ្នកខមិនយ៉ាងខ្លីវិញថា «មួយចំហៀងនិងលក់ម៉េចកើតបង ស្បែកជើងចាស់ៗដែរនិង» ។
ដោយឡែកមតិមួយចំនួនបានលើកឡើងថា ចំពោះស្បែកជើងខាងលើមើលទៅមិនថ្មីឬម៉ូដម៉ាកប្រែនឡើយ ហើយបើទោះបីជាលួចយកទាំងអស់ក៏មិនអាចលក់បានថ្លៃដែរ ម្យ៉ាងទៀតប្រសិនបើចោរមែន ច្បាស់ជាលួចយកទៅទាំងអស់ ទើបលក់កើតមានអ្នកទិញប្រើប្រាស់ឬអាចយកទៅពាក់ខ្លួនឯងកើត ពុំមែនយកតែ១ចំហៀងទុក១ចំហៀងទៀតចោលបែបនេះទេ ។
ដូច្នេះករណីខាងលើនេះអាចមានជនណាម្នាក់លេងសើច ពេលដែលឃើញម្ចាស់ទុកស្បែកជើងទាំងនោះនៅក្រៅផ្ទះក៏លួចយក១ចំហៀងៗជាការព្រមានកុំឲ្យថ្ងៃក្រោយទុកនៅក្រៅផ្ទះទៀត ។ រីឯម្ចាស់វិញ ប្រសិនបើស្បែកជើងថ្មីថ្លៃៗក៏ប្រហែលមិនហ៊ានទុកនៅក្រៅផ្ទះដែរ ប៉ុន្តែដោយសារតែស្បែកជើងមិនថ្មីហើយមិនថ្លៃទើបទុកនៅខាងក្រៅហើយមិនបាននឹកស្មានដល់ថាត្រូវចោរលួចបាត់បែបនេះសោះ៕ (កែសម្រួលដោយ ៖ ធីតា)
ចែករំលែកព័តមាននេះ