ខេត្តកណ្ដាល ៖ អ្នកបើកបររថយន្តម្នាក់បានបាត់បង់ជីវិត ចំណែកកម្មករ កម្មការិនីចំនួន១៤នាក់ផ្សេងទៀតបានរងរបួសធ្ងន់ស្រាល ក្នុងហេតុការណ៍ថ្នាក់ចរាចរណ៍រវាងរថយន្ត៣គ្រឿងបុកបន្តគ្នា ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៦និង២០នាទីយប់ថ្ងៃទី២៤ ខែមិថុនា ឆ្នាំ២០២០ ស្ថិតតាមបណ្ដោយផ្លូវជាតិលេខ១ ត្រង់ចំណុចគីឡូម៉ែត្រលេខ៤៨-៤៩ ចំណុចភូមិពោធិមៀវ ឃុំគគីរធំ ស្រុកកៀនស្វាយ ខេត្តកណ្តាល។
រថយន្តទាំង៣គ្រឿងខាងលើរួមមាន ១-រថយន្តម៉ាក KIA FRON TIER ពណ៌ខៀវ ប្រភេទបែន គ្មានផ្លាកលេខ បើកបរដោយឈ្មោះ ម៉ម ប៉ិចសារក្ស ភេទប្រុស អាយុ៣៦ឆ្នាំ មានទីលំនៅភូមិសំរោងក្អែរ២ ឃុំសំរោងធំ ស្រុកកៀនស្វាយ ខេត្តកណ្តាល បានបាត់បង់ជីវិត ២-រថយន្តដឹកកម្មករម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ 3D-5841 បើកបរដោយឈ្មោះ ផាន់ ភេទប្រុស អាយុ ៣៨ឆ្នាំ ជនជាតិខ្មែរ មានទីលំនៅភូមិក្រាំងក្អក ឃុំកំពង់សឹង្ហ ស្រុកព្រះស្តេច ខេត្តព្រៃវែង ចំណែកកម្មករដែលជាអ្នករួមដំណើររងរបួសធ្ងន់ស្រាលទាំង១៤នាក់ មិនស្គាល់អត្តសញ្ញាណនោះទេ និង៣-រថយន្តម៉ាកស៊ាំយ៉ុង ពណ៌លឿង ប្រភេទដឹកអ្នកដំណើរ ពាក់ផ្លាកលេខ ភ្នំពេញ 2I-6439 បើកបរដោយឈ្មោះ ផន មនោរម្យ ភេទប្រុស អាយុ ៣១ឆ្នាំ មានទីលំនៅភូមិក្រាំងក្អក ឃុំកំពង់សឹង្ហ ស្រុកព្រះស្តេច ខេត្តព្រៃវែង ។
តាមប្រភពពីសាក្សីបានអោយដឹងថា មុនពេលកើតហេតុ មានរថយន្តម៉ាក KIA FRON TIER ពណ៌ខៀវ ប្រភេទបែន បើកបរក្នុងទិសដៅពីអ្នកលឿងទៅភ្នំពេញតាមផ្លូវជាតិលេខ១ លុះមកដល់ចំណុចកើតហេតុខាងលើ បានបុកជាមួយរថយន្តម៉ាកហ៊ីយ៉ាន់ដាយ មានដឹកកម្មករ ដែលកំពុងបើកបរក្នុងទិសផ្ទុយគ្នា បណ្តាលក្រឡាប់ ហើយស្របពេលនោះមានរថយន្តម៉ាកស៊ាំយ៉ុង ពណ៌លឿង ប្រភេទដឹកអ្នកដំណើរ មានទិសដៅពីភ្នំពេញទៅអ្នកលឿងមកបុករថយន្តបែននោះបន្ថែមទៀត បណ្តាលឲ្យអ្នកបើកបររថយន្តបែនម៉ាក KIA FRON TIER បាត់បង់ជីវិតនៅនឹងកន្លែងកើតហេតុ។
ក្រោយពេលកើតហេតុ រថយន្តទាំង៣គ្រឿងត្រូវបានសមត្ថកិច្ចយកមករក្សាទុកនៅអធិការដ្ឋានស្រុកកៀនស្វាយដើម្បីបន្តតាមនីតិវីធី ចំណែកសពជនរងគ្រោះត្រូវបានសាច់ញាតិយកទៅធ្វើបុណ្យតាមប្រពៃណី ។ ករណីនេះបណ្តាលមកពីអ្នកបើកបររថយន្តម៉ាក KIA FRONTIER ធ្វេសប្រហែស ខ្វះការប្រុងប្រយ័ត្ន បើករំលោភទៅលើចំណែកផ្លូវនៃយានយន្តដែលបើកមកពីទិសដៅផ្ទុយគ្នា ៕ (កែសម្រួលដោយ ៖ ធីតា)
ចែករំលែកព័តមាននេះ