មូលហេតុអ្វីបានជាមហាសេដ្ឋីរូបនេះបរិភោគត្រីកំប៉ុង ៥កំប៉ុងក្នុងមួយថ្ងៃ ?
លោកមហាសេដ្ឋី ខ្រេក ឃូភើ (Craig Cooper) មានទម្លាប់ចម្លែកៗណាស់ក្នុងជីវិតរបស់លោក ។ លោកបានប្រាប់ដល់ CNBC Make…
លោកមហាសេដ្ឋី ខ្រេក ឃូភើ (Craig Cooper) មានទម្លាប់ចម្លែកៗណាស់ក្នុងជីវិតរបស់លោក ។ លោកបានប្រាប់ដល់ CNBC Make It ថា រាងកាយរបស់លោកនឹងចាប់ផ្តើមសម្រាករាល់យប់ម៉ោង ១០ និង ២៤នាទី ។ លើសពីនេះទៅទៀត លោកជាមនុស្សដែលចូលចិត្តការធ្វើលំហាត់ប្រាណដែលមិនចូលចិត្តកន្លែងហាត់ប្រាណ និងចូលចិត្តចូលដំណេក ២២នាទីរាល់ពេលរសៀលដើម្បីបង្កើនប្រសិទ្ធិភាពការងារ ។
សហស្ថាបនិករបស់ក្រុមហ៊ុន Boost Mobile ម្នាក់នេះក៏មានទម្លាប់ទទួលទានអាហារចម្លែកដែរ គឺលោកបរិភោគត្រីកំប៉ុង ៥កំប៉ុងជារៀងរាល់ថ្ងៃដើម្បីរក្សាសុខភាព និងកម្លាំងរបស់លោក ។
លោកបានប្រាប់ក្នុងបទសម្ភាសន៍មួយថា ត្រីសមុទ្រសារឌីន គឺជាអាហារលេខមួយសម្រាប់មនុស្សប្រុស ព្រោះវាមាននូវជីវជាតិបំប៉នច្រើនណាស់ ។ ជាក់ស្តែងត្រីទាំងនេះមានជាតិប្រូតេអ៊ីន និងសូដ្យូមច្រើនខណៈដែលមិនមានកាល់ឡូរីខ្ពស់ពេកទេ ។ ក្រៅពីនេះទៅទៀត ត្រីទាំងនេះមានជាតិខ្លាញ់អូមេហ្កា ៣ ដែលល្អសម្រាប់ការទម្លាក់កម្រិតកាឡេស្តូរ៉ូល និងមានវីតាមីន B12 ដែលល្អសម្រាប់ការផលិតគ្រាប់ឈាមក្រហម ។
លោកបានចែករំលែកមកថា សេចក្តីស្រលាញ់របស់លោកទៅលើត្រីទាំងនេះបានធ្វើឲ្យបុគ្គលិកដាក់ឈ្មោះឲ្យលោកថាត្រីសារឌីនថែមទៀត ។
លោក ឃូភើ បានប្រាប់មកថា ទម្លាប់នេះបានជួយដល់លោកជាច្រើន ហើយលោកពឹងផ្អែកលើសុខភាពរបស់លោកដើម្បីអាចបន្តធ្វើការយ៉ាងរវល់ពីមួយថ្ងៃទៅមួយថ្ងៃ ។ លោកគ្រប់គ្រងក្រុមហ៊ុន CooperativeHealth និងបានសរសេរសៀវភៅ Your New Prime មួយក្បាលផងដែរ ។
មហាសេដ្ឋីដែលមានអាយុ ៥៧ឆ្នាំខាងលើបានចែករំលែកមកថា ជីវិតរបស់លោកពេលដែលលោកចូលខ្ទង់ ៤០ និង ៥០ឆ្នាំជាពេលដែលលោករស់នៅបានល្អជាងគេ ហើយលោកសង្ឃឹមថា នឹងអាចជំរុញលើកទឹកចិត្តបុរសដទៃឲ្យរស់នៅជីវិតដូចលោកដែរ ៕
ចែករំលែកព័តមាននេះ