ខេត្តសៀមរាប ៖ ការបំពាក់អំពូលសូឡាបំភ្លឺតាមភូមិក្នុងយុទ្ធនាការ«ភូមិមួយកំពូលមួយ» របស់ស្រុកបន្ទាយស្រី ខេត្តសៀមរាប បានឈានទៅមុខបណ្តើរៗ បញ្ចប់ពីភូមិមួយទៅភូមិមួយ ពីដំបូងភូមិព្រះដាក់ឥឡូវបានដល់ភូមិត្រពាំងថ្ម ។ ភ្លើងបំភ្លឺពេលរាត្រី…
ខេត្តសៀមរាប ៖ ការបំពាក់អំពូលសូឡាបំភ្លឺតាមភូមិក្នុងយុទ្ធនាការ«ភូមិមួយកំពូលមួយ» របស់ស្រុកបន្ទាយស្រី ខេត្តសៀមរាប បានឈានទៅមុខបណ្តើរៗ បញ្ចប់ពីភូមិមួយទៅភូមិមួយ ពីដំបូងភូមិព្រះដាក់ឥឡូវបានដល់ភូមិត្រពាំងថ្ម ។ ភ្លើងបំភ្លឺពេលរាត្រី ដែលមិនធ្លាប់មានក្នុងភូមិបានធ្វើឲ្យពលរដ្ឋនៅស្រុកបន្ទាយស្រី មានក្តីសប្បាយរីករាយ ។ អ្នកស្រុកត្រេកអរថា ភូមិមានកំពូលបំភ្លឺនៅពេលយប់ធ្វើឲ្យមានសុវត្ថិភាព កក់ក្តៅ ការធ្វើដំណើរយប់ព្រលប់មិនបារម្ភ។ នៅពេលរាត្រី អ្នកភូមិអាចជួបជុំគ្នា ក្មេងអាចនាំគ្នាលេងកម្សាន្ត បានដល់យប់ជ្រៅ ខុសពីមុនព្រលប់មិនទាន់អ្នកស្រីបិទទ្វារផ្ទះចូលសម្រាក។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានវាយតម្លៃថា អ្វីដែលបានអនុវត្តនៅស្រុកបន្ទាយស្រី ខេត្តសៀមរាបនោះ បានកំពុងដើរលើផ្លូវវិមជ្ឈការដើម្បីកាត់បន្ថយគម្លាតទីក្រុងនិងជនបទ។ លោកបានបញ្ជាក់ថាអ្វីដែលបម្រើឲ្យផលប្រយោជន៍ពលរដ្ឋ ពលរដ្ឋនឹងចូលរួមហើយសប្បាយរីករាយ ។
សូមរម្លឹកថា កាលពីដើមឆ្នាំ២០២០ ក្រោយចូលកាន់តួនាទីជាអភិបាលស្រុកភ្លាម លោក ឃីម ហ្វីណង់ បានប្រកាសបង្កើត «យុទ្ធនាការកំពូលមួយផ្ទះ» យុទ្ធនាការបំពាក់កំពូលតាមភូមិទូទាំងស្រុក ដោយ កៀរគថវិកាតាមមធ្យោបាយផ្សេង មកទិញកំពូលភ្លើងដំឡើងឲ្យអ្នកភូមិ ។
យុទ្ធនាការនេះ បានផ្តើមចេញភូមិព្រះដាក់មុនគេ។ ភូមិព្រះដាក់ ដែលអ្នកទេសចរឆ្លងកាត់រាល់ថ្ងៃ ក្នុងដំណើរកម្សាន្តទៅប្រាសាទបន្ទាយស្រី និងភ្នំគូលែន ពិសេសការធ្វើដំណើរឆ្លងកាត់ភូមិព្រះដាក់មនុស្សជាច្រើនមិនរំលងនំបញ្ចុកអ្នកស្រុកដែលមានរស់ជាតិឆ្ងុញឆ្ងាញ់នោះឡើយ។ការបំពាក់កំពូលភ្លើងតាមភូមិបានដំណើរការទៅមុខជាលំដាប់ ចេញពីភូមិព្រះដាស់ ដល់ភូមិ ត្រពាំងថ្មហើយ។
លោក ឃីម ហ្វីណង់ អភិបាលស្រុកវ័យ៣៧ឆ្នាំ បានបញ្ជាក់នៅលើបណ្តាញសង្គមរបស់លោកថា«ការបំពាក់អំពូលតាមផ្ទះនៅភូមិត្រពាំងថ្មនេះ គឺជាផ្នែកមួយនៃយុទ្ធនាការ «ផ្ទះ១ អំពូល១» តែការផ្តល់ជូនលើកនេះ គឺជាការផ្តល់ជូនដែលមានអត្ថន័យបំផុត ព្រោះភូមិដែលមានប្រជាជនចំនួន២៤៥គ្រួសារមួយនេះ គឺជាភូមិដែលមានការខ្វះខាតខ្លាំងជាងគេនៅក្នុងស្រុកបន្ទាយស្រី ហើយក៏មិនទាន់មានបណ្តាញចែកចាយអគ្គីសនីចូលមកដល់នៅឡើយ» ។
ស្រុកបន្ទាយស្រី ខេត្តសៀមរាបមាន៦ឃុំ និង៣៦ភូមិ។ កំពូលភ្លើងភ្លើងដែលអាជ្ញាធរស្រុកបំពាក់តាមភូមិនេះ មួយចំណាយអស់ថវិកាប្រមាណ៥០ដុល្លារ សរុបទាំងកំពូល បង្គោលភ្លើង និងកម្លាំងពលកម្ម។ថ្នាក់ដឹកនាំស្រុកប៉ាន់ស្មានថាដើម្បីបានកំពូលភ្លើងភ្លីទូទាំងស្រុកប្រហែលត្រូវចំណាយអស់៥០ម៉ឺដុល្លារ។
ប្រការ ល្អរបស់មាននៅស្រុកបន្ទាយស្រីនេះ មានការលើកឡើងថាគួរក្លាយជាគំរូបមួយសម្រាប់ថ្នាក់ដឹកនាំមូលដ្ឋាន។ នៅមូលដ្ឋានដែលកម្មវិធី វិមជ្ឈការ និងវិសហមជ្ឈការកំពុងដំណើរការគួរមានការប្រកួតប្រជែងស្មារតីដឹកនាំស្រុក ខណ្ឌ ឃុំ សង្កាត់ ដើម្បីជំរុញការអភិវឌ្ឍន៍នៅមូលដ្ឋាន ។
យ៉ាងណាមិញ មហាជនបានលើកជាចម្ងល់ឡើងថា តើការបំពាក់ភ្លើងតាមភូមិនៅស្រុកបន្ទាយស្រីគួរក្លាយជាគំរូសម្រាប់ថ្នាក់ដឹកនាំមូលដ្ឋាននៅបណ្តាស្រុក និងខេត្តផ្សេងទៀតឬយ៉ាងណា?
ចែករំលែកព័តមាននេះ