អន្តរជាតិ ៖ ព្រឹត្តិការណ៍ម៉ារ៉ាតុងនៅទីក្រុងញូវយ៉ក សហរដ្ឋអាមេរិក និងទីក្រុងប៊ែកឡាំង ប្រទេសអាល្លឺម៉ង់ ត្រូវបានប្រកាសលុបចោលជាផ្លូវការ ដោយសារតែការឆ្លងរាលដាលនៃវីរុសកូវីដ១៩។
ព្រឹត្តិការណ៍ម៉ារ៉ាតុងនៅទីក្រុងញូវយ៉ក គឺជាព្រឹត្តិការណ៍រត់ប្រណាំងធំបំផុត និងមានអ្នកចូលរួមច្រើនបំផុតលើពិភពលោក បន្ទាប់កាលពីឆ្នាំមានអ្នកចូលរួមរហូតដល់ ៥៣.៦៤០នាក់។ ដោយឡែកសម្រាប់ឆ្នាំ២០២០ ព្រឹត្តិការណ៍នេះគ្រោងនឹងប្រព្រឹត្តទៅនៅថ្ងៃទី១ ខែវិច្ឆិកា ឆ្នាំ២០២០ ដែលជាការប្រារព្ធលើកទី៥០ របស់ខ្លួន។ ប៉ុន្តែត្រូវបានសម្រេចលុបចោលតែម្តង បន្ទាប់ពីការឆ្លងរីករាលដាលនៃវីរុសកូវីដ១៩ នៅសហរដ្ឋអាមេរិកបន្តកើនឡើងពីមួយថ្ងៃទៅមួយថ្ងៃ។ ដោយបច្ចុប្បន្នមានអ្នកឆ្លងរហូតដល់ជាង ២,៤៦៣,០០០ករណី និងអ្នកស្លាប់សរុប ១២៤,២៨១នាក់។
លោក Michael Capiraso ប្រធាននិងជានាយកប្រតិបត្តិនៃព្រឹត្តិការណ៍រត់ប្រណាំងទីក្រុងញូវយ៉កបាននិយាយថា «ការលុបចោលការរត់ម៉ារ៉ាតុងទីក្រុងញូយ៉កនៅឆ្នាំនេះ ពិតជាគួរឱ្យខកចិត្តខ្លាំងណាស់ សម្រាប់អ្នកគ្រប់គ្នាដែលបានចុះឈ្មោះចូលរួម ប៉ុន្តែវាច្បាស់ណាស់ថា យើងត្រូវដើរតាមបញ្ហាសុខភាពជាតិ និងសុវត្ថិភាពជាចំបង»។
ដោយឡែកសម្រាប់ព្រឹត្តិការណ៍ម៉ារ៉ាតុងនៅទីក្រុងប៊ែកឡាំងវិញ ដែលគ្រោងនឹងធ្វើឡើងនៅថ្ងៃទី២៧ ខែកញ្ញា ឆ្នាំ២០២០ ក៏ត្រូវបានសម្រេចលុបចោលផងដែរ។ ដោយសារតែភាពសប្បាយរីករាយ រួមជាមួយសុវត្ថិភាពសុខភាពរបស់អ្នកចូលរួមទាំងអស់មិនអាចត្រូវបានធានា។ ខណៈដែលបច្ចុប្បន្នការឆ្លងមានក្នុងប្រទេសអាល្លឺម៉ង់មានជាង ១៩៣,០០០ករណី និងមានអ្នកស្លាប់សរុប ៩,០០៣នាក់៕ (ដកស្រង់ចេញពី៖ BBC)
ចែករំលែកព័តមាននេះ