ខេត្តមណ្ឌលគិរី ៖ មន្ត្រីឧទ្យានុរក្សទាំង៥ដែនជម្រកការពារសត្វព្រៃ ទូទាំងខេត្តមណ្ឌលគិរី បានបង្ក្រាបបទល្មើសធនធានធម្មជាតិជាច្រើនករណី កាលពីថ្ងៃទី២២ ខែមិថុនា ឆ្នាំ២០២០ ។
យោងតាមរបាយការណ៍របស់មន្ទីរបរិស្ថានខេត្ត នៅដែនជម្រកសត្វព្រៃស្រែពក មន្ត្រីឧទ្យានុរក្សបានចុះល្បាតទប់ស្កាត់ និងបង្ក្រាបបទល្មើសធនធានធម្មជាតិ តាមចំណុចគោលដៅរួមមាន នៅចំណុចដៃអូរតេ ប្រទះឃើញរណារយន្ត១គ្រឿង ដែលជនសង្ស័យលាក់ទុកក្នុងព្រៃ នៅចំណុចផ្លូវបំបែកអូរតេ រុះរើរោងប្រក់តង់១កន្លែង នៅចំណុចដៃអូរតេ ដោះអន្ទាក់ខ្សែគោបានចំនួន៣៨ខ្សែ និងនៅចំណុចអូរប៉ុល ប្រទះឃើញរណារយន្ត១គ្រឿង ដែលជនសង្ស័យលាក់ទុកក្នុងព្រៃ ដោយវត្ថុតាងដកហូតបាន ត្រូវបានបញ្ជូនមករក្សាទុក ។
ចំណែកនៅដែនជម្រកសត្វព្រៃណាមលៀរ មន្ត្រីឧទ្យានុរក្ស បានចុះល្បាតដល់ចំណុចអូររ៉ាលុងម៉ាំង ដកបង្គោលហ៊ុមព័ទ្ធដីព្រៃធ្វើកម្មសិទ្ធិខុសច្បាប់ ចំនួន១០បង្គោលនៅនឹងកន្លែង ។
ដោយឡែកនៅដែនជម្រកសត្វព្រៃកែវសីមា មន្ត្រីឧទ្យានុរក្ស បានចុះល្បាតតាមចំណុចគោលដៅរួមមាន នៅចំណុចក្រោយប៉ុស្តិ៍នគរបាលការពារព្រំដែនគោកអូរជុំ ប្រទះឃើញជនសង្ស័យកំពុងធ្វើសកម្មភាពកាត់ស្មៅ និងដាំដំឡូង ជាមួយវត្ថុតាងរួមមាន ម៉ាស៊ីនកាត់ស្មៅ១គ្រឿង និងចប៤ផ្លែ នៅចំណុចផ្លូវជាតិលេខ៧៥A គីឡូម៉ែត្រលេខ១៦៣ ចាប់ឃាត់ម៉ូតូកែច្នៃ១គ្រឿង មានដឹកឈើអារប្រណីត(បេង)៤កំណាត់ និងនៅចំណុចស្រែល្វី ចាប់ឃាត់ម៉ូតូកែច្នៃ១គ្រឿងទៀត មានដឹកឈើប្រភេទលេខ១(សុក្រម)៧សន្លឹក ។
ឯនៅដែនជម្រកសត្វព្រៃភ្នំព្រេច-លំផាត់ មន្ត្រីឧទ្យានុរក្ស បានចុះល្បាតនៅចំណុចជើងភ្នំកាច់ក ដកហូតរណារយន្ត១គ្រឿង និងនៅចំណុចដអូរពុងទូ ដកហូតរណារយន្ត១គ្រឿង និងម៉ូតូ១គ្រឿង មានដឹកសាច់សត្វជ្រូកព្រៃ ។
ជាមួយគ្នានេះផងដែរ នៅរបៀងអភិរក្សជីវៈចម្រុះ ប្រព័ន្ធតំបន់ការពារធម្មជាតិ(ភូមិសាស្ត្រស្រុកកោះញែក) មន្ត្រីឧទ្យានុរក្ស បានចុះល្បាតតាមចំណុចគោលដៅរួមមាន នៅចំណុចអូរព្រះ ប្រទះឃើញជនសង្ស័យម្នាក់ជិះម៉ូតូ១គ្រឿង មានដឹកស្បៃដាក់សត្វសំពោចដំណើប(រស់)៣ក្បាល ។
ពេលប្រទះឃើញក្រុមការងារ ជនសង្ស័យបានទំលាក់ស្បៃចោល ហើយជិះម៉ូតូគេចខ្លួន បន្ទាប់មកក្រុមការងារបានធ្វើការដោះលែងសត្វសំពោចទាំង៣ក្បាល ឲ្យចូលព្រៃធម្មជាតិវិញភ្លាមៗ ។ ចេញពីចំណុចនេះមក ក្រុមការងារបានបន្តល្បាតដល់ចំណុចដើមចំបក់ ប្រទះឃើញជនសង្ស័យ៦នាក់ បើកគោយន្តកន្ត្រៃ១គ្រឿង មានដឹកមងទាក់សត្វព្រៃ១ត្បូង ប្រវែង៥០ម៉ែត្រ ស្នាបាញ់សត្វ១ដើម និងគ្រាប់(ស្នា)៦គ្រាប់ បម្រុងចូលទៅរកសត្វព្រៃ ។ មងទាក់សត្វត្រូវបានដកហូត និងស្នាបាញ់សត្វ ត្រូវបានដុតបំផ្លាញចោលនៅនឹងងកន្លែង ៕
ចែករំលែកព័តមាននេះ