ការផ្ទុះជំងឺកូវីដ ១៩ បានបង្កការប៉ះពាល់ដល់មនុស្សគ្រប់គ្នាជុំវិញពិភពលោក ប៉ុន្តែផលប៉ះពាល់លើស្ត្រីប្រៀបដូចជាមានធ្ងន់ធ្ងរជាងគេ ។ ក្រៅពីការបាត់បង់ការងារ ឬការកាត់ប្រាក់ខែហើយ ស្ត្រីដែលជាម្តាយនៅផ្ទះត្រូវទទួលរងបន្ទុកក្នុងការមើលថែកូនៗដែលមិនអាចទៅបន្តការសិក្សាព្រោះសាលារៀនមិនដំណើរការផងដែរ ។
លើសពីនេះទៅទៀត ស្ត្រីភាគច្រើនអាចរកប្រាក់ចំណូលបានទាបជាងបុរសៗ ហើយពួកគេត្រូវសន្សំលុយច្រើនសម្រាប់ថ្ងៃអនាគតព្រោះស្ត្រីជាច្រើនអាចរស់រានមានជីវិតយូរជាងបុរសផងដែរ ។ យោងទៅតាមអ្នកជំនាញមួយចំនួនបានឲ្យដឹងថា ស្ត្រីគួរតែអនុវត្តតាមយុទ្ធសាស្ត្រខាងក្រោមនេះដើម្បីចៀសវាងផលប៉ះពាល់ហិរញ្ញវត្ថុធ្ងន់ធ្ងរ ។
១. កាត់បន្ថយការចំណាយដែលមិនចាំបាច់
ប្រសិនបើប្រាក់ចំណូលរបស់អ្នកមានការផ្លាស់ប្តូរព្រោះតែកូវីដ ១៩ នោះការចាយវាយរបស់អ្នកក៏គួរតែផ្លាស់ប្តូរស្របទៅតាមគ្នាដែរ ។ ពេលនេះជាពេលល្អក្នុងការវាយតម្លៃឡើងវិញលើអ្វីដែលចាំបាច់ និងអ្វីដែលមិនចាំបាច់ក្នុងជីវិតរបស់អ្នក ។ អ្នកមិនគួរចាយវាយច្រើនពេកលើអ្វីដែលអ្នកមិនត្រូវការទេក្នុងកំឡុងពេលដែលមិនមានភាពប្រាកដប្រជានេះ ។
២. ផ្តោតស្មារតីលើការងារ
សម្រាប់អ្នកដែលនៅមានការងារធ្វើ អ្នកមិនត្រូវប្រលែងដៃចោលទេ ។ ទោះជាអ្នកត្រូវធ្វើការពីផ្ទះ ឬនៅការិយាល័យខណៈដែលព្យាយាមការពារខ្លួនពីជំងឺកូវីដ ១៩ ពិតមែនក្តី អ្នកត្រូវតែធានាថាលទ្ធផលការងាររបស់អ្នកមិនចុះខ្សោយឡើយ ។
លើសពីនេះទៅទៀត អ្នកត្រូវតែមានភាពសកម្មក្នុងការរក្សាទំនាក់ទំនងជាមួយនឹងចៅហ្វាយ និងក្រុមការងារដើម្បីបង្ហាញថា អ្នកនៅតែយកចិត្តទុកដាក់លើការងាររបស់អ្នកដដែល ។ ក្រៅពីនេះហើយ អ្នកត្រូវមានភាពបត់បែន ។ ប្រសិនបើចៅហ្វាយរបស់អ្នកកំពុងជួបបញ្ហាព្រោះតែការផ្លាស់ប្តូរបង្កឡើងដោយកូវីដ ១៩ អ្នកគួរតែចេញមុខជួយ ។
៣. កំណត់ព្រំដែនឲ្យបានច្បាស់លាស់
លំនឹងភាពរវាងការងារ និងជីវិតផ្ទាល់ខ្លួនគឺពិតជាសំខាន់ណាស់ប្រសិនបើអ្នកចង់ជោគជ័យនៅថ្ងៃមុខ ។ ជាក់ស្តែងអ្នកត្រូវតែកំណត់ព្រំដែនឲ្យបានច្បាស់លាស់ដើម្បីធានាថាការងាររបស់អ្នកនឹងមិនប៉ះពាល់ដល់សុខភាព ឬសុភមង្គលក្នុងគ្រួសារឡើយ ។ ដូច្នេះការរក្សាទំនាក់ទំនងជាមួយកន្លែងការងារទាក់ទិននឹងម៉ោងធ្វើការ គឺពិតជាសំខាន់ណាស់ ៕
ចែករំលែកព័តមាននេះ