ប្រទេសកូរ៉េទាំង២ ៖ ទីភ្នាក់ងារព័ត៌មានផ្លូវការកូរ៉េខាងជើង KCNA រាយការណ៍នាថ្ងៃទី២៤ មិថុនាថា មេដឹកនាំកូរ៉េខាងជើងលោកគីម ជុងអ៊ុន បានដឹកនាំកិច្ចប្រជុំពេញអង្គមួយរបស់គណៈកម្មាធិការយោធាកណ្ដាល បក្សពលករកូរ៉េ ហើយសម្រេចផ្អាកបណ្ដាផែនការសកម្មភាពយោធា
ប្រឆាំងកូរ៉េខាងត្បូង ។
កិច្ចប្រជុំនោះប្រព្រឹត្តទៅនាព្រឹកថ្ងៃទី២៤ មិថុនា តាមរយៈវីដេអូខេនហ្វេរេន បន្ទាប់ពីកូរ៉េខាងជើងបានគំរាមចាត់វិធានការសងសឹកមួយចំនួនប្រឆាំងកូរ៉េខាងត្បូងដែលបរាជ័យក្នុងការទប់ស្កាត់ពួកអ្នករត់ចោលជួរកូរ៉េខាងជើងមិនឲ្យបញ្ជូនបណ្ដាខិត្តប័ណ្ណឃោសនាទៅកាន់ប្រទេសកុំមុយនីស្តនោះ ។ លោកគីម ជុងអ៊ុន អះអាងថា ភាពលម្អិតត្រូវកំណត់ក្នុងឱកាសនៃកិច្ចប្រជុំមួយ របស់គណៈកម្មាធិការយោធាកណ្ដាលក្នុងពេលដ៏ឆាប់មួយ ។
KCNA បន្តថាកិច្ចប្រជុំដំបូងរបស់គណៈកម្មាធិការយោធាកណ្ដាលបក្សពលករកូរ៉េ បានវាយតម្លៃសភាពការណ៍បច្ចុប្បន្ន និងបានផ្អាកផែនការសកម្មភាពយោធាប្រឆាំងកូរ៉េខាងត្បូង ដែលគ្រោងដោយសេនាធិការដ្ឋាន កងទ័ពប្រជាជនកូរ៉េ ។
កូរ៉េខាងជើងបានបង្កើនភាពតានតឹង ដោយចាត់បណ្ដាវិធានការសងសឹកប្រឆាំងគូរ៉េខាងត្បូង ដោយសារការបញ្ជូនសារឃោសនាប្រឆាំងខ្លួនចេញពីដែនដីប្រទេសនោះ ។ ក្រុងព្យុងយ៉ាងបានចាត់ទុកកូរ៉េខាងត្បូងជាសត្រូវមួយ និងកាត់ផ្ដាច់រាល់ខ្សែទាក់ទងអន្តរកូរ៉េ និងដោយព្រមានពីផែនការដាក់ទណ្ឌកម្មធំមួយនាពេលខាងមុខ ។
កាលពីសប្ដាហ៍មុន ក្រុងព្យុងយ៉ាងបានបំផ្ទុះការិយាល័យទំនាក់នងអន្តរកូរ៉េនៅកាអឺសុង និងគំរាមដាក់ពង្រាយជាថ្មីកងទ័ព ក្នុងបណ្ដាតំបន់នៅតាមខ្សែបន្ទាត់ព្រំដែន ហើយនឹងធ្វើឡើងវិញរាល់សមយុទ្ធយោធាទៀងទាត់នៅជិតព្រំដែន ។ កូរ៉េខាងជើងនាពេលថ្មីៗនេះក៏ដាក់ឡើងវិញ បណ្ដាប្រដាប់បំពងសំឡេងឃោសនាយោធា តាមបណ្ដោយតំបន់ហាមមិនឲ្យមានកងទ័ព ក្រោយដកយកចេញបន្ទាប់ពីកិច្ចព្រមព្រៀងមួយដែលចុះហត្ថលេខាក្នុងឱកាសនៃកិច្ចប្រជុំកំពូលឆ្នាំ២០១៨ ។ មុននេះដែរក្រុងព្យុងយ៉ាងគ្រោងបាចខិត្តប័ណ្ណប្រមាណជា១២លានតាមរយៈបាល់ឡុងហោះប្រមាណជា៣០០០ទៅកាន់កូរ៉េខាងត្បូង ។
តាមព័ត៌មានចុងក្រោយថាប្រដាប់បំពងសំឡេងដែលកូរ៉េខាងជើងដាក់ឡើងវិញត្រូវបានដកចេញដែរហើយ ៕ ដកស្រង់ចេញពីវេបសាយ ៖ yna (កែសម្រួលដោយ ៖ បុប្ផា)
ចែករំលែកព័តមាននេះ