រាជធានីភ្នំពេញ ៖ កញ្ញារ៉ាវី ជាបុគ្គលិកធ្វើការនៅសណ្ឋាគារមួយក្នុងខេត្តសៀមរាប កាលពីសប្តាហ៍មុនកញ្ញា ទទួលបានសារពីក្រសួងការងារ និងបណ្តុះបណ្តាលវិជ្ជាជីវៈឲ្យទៅបើកប្រាក់ឧបត្ថម្ភ នៅពេលនាងត្រូវបានព្យួរការងារដោយសារជំងឺកូវីដ១៩នេះ ។ រ៉ាវី…
រាជធានីភ្នំពេញ ៖ កញ្ញារ៉ាវី ជាបុគ្គលិកធ្វើការនៅសណ្ឋាគារមួយក្នុងខេត្តសៀមរាប កាលពីសប្តាហ៍មុនកញ្ញា ទទួលបានសារពីក្រសួងការងារ និងបណ្តុះបណ្តាលវិជ្ជាជីវៈឲ្យទៅបើកប្រាក់ឧបត្ថម្ភ នៅពេលនាងត្រូវបានព្យួរការងារដោយសារជំងឺកូវីដ១៩នេះ ។
រ៉ាវី បាននិយាយថា គាត់ត្រូវបានគេព្យួរការងារតាំងពីដើមខែមីនា មក ប៉ុន្តែគាត់ទើបទទួលបានប្រាក់ឧបត្ថម្ភនៅក្នុងខែឧសភា ហើយប្រាក់ឧបត្ថម្ភ៤០ដុល្លារ ត្រូវបើកពីរដង គឺម្តងបានតែ ៨១ ០០០រៀល ។ អតីតបុគ្គលិកសណ្ឋាគាររូបនេះត្អូញត្អែរថា ក្រៅពីការលំបាកខាងជីវភាពនៅពេលគ្មានការងារធ្វើ គាត់មានបន្ទុកធ្ងន់មួយទៀត គឺត្រូវបង់ធនាគារក្នុងមួយខែជាង២០០ដុល្លារ ដោយសារគាត់បានទិញដីមួយកន្លែងបង់រំលោះ ។ «ពិបាកនោះ គឺវាពិបាកណាស់ហើយ រឿងហូបចុកខ្ញុំអាចរឹតត្បឹតបាន តែរឿងដែលត្រូវធ្វើមិនអាច រឹតត្បឹតបាន គឺត្រូវបង់ឲ្យធនាគារ ។ ខ្ញុំចង់ឲ្យរដ្ឋជួយឲ្យខាងធនាគារព្យួរការបង់ប្រាក់របស់ខ្ញុំសិន ចាំពេលមានការងារវិញចាំបងបន្ត ។ ខ្ញុំខានបង់ពីរខែហើយ ហើយពេលនេះ ខ្ញុំប្រកាសលក់ដីវិញ តែគ្មានអ្នកទិញសោះ» ។
បន្ថែមពីការលើកឡើងដូច្នេះ រ៉ាវី បន្តថា «រាល់ថ្ងៃនេះបន់ សូមកុំឲ្យខ្លួន និងឪពុកម្តាយឈឺទេ បើឈឺទៀតកាន់តែយ៉ាប់ហើយ» ។ មកដល់ពេលនេះ កម្មករនិយោជិតក្នុងឧស្សាហកម្មកាត់ដេរ និងទេសចរណ៍ចំនួន១៦៩ ១៦១នាក់ហើយ បានបើកប្រាក់ឧបត្ថម្ភពីរដ្ឋ ។
ក្នុងចំនួនអ្នកព្យួរការងារខាងលើនេះ រដ្ឋបានចំណាយថវិកា ប្រមាណ៣.៩លានដុល្លារ ។ នេះបើតាមឲ្យដឹងរបស់លោក ហេង សួរ អ្នកនាំពាក្យក្រសួងការងារ ដែលសារព័ត៌មានបានផ្សាយ ។
រដ្ឋាភិបាលតាមរយៈក្រសួងការងារ បានបើកប្រាក់ឧត្ថម្ភដល់កម្មករនិយោជិត ដែលបាតបង់ការងារបានចំនួន៧លើកហើយ ។ លើកទី៧ គឺក្រសួងបានជួនដំណឹង កាលពីថ្ងៃទី២៣ មិថុនា ដោយមានកម្មករនិយោជិតចំនួន១២ ៧៦០នាក់ នៅក្នុងសហគ្រាស រោងចក្រ ៣៤ក្នុងវិស័យកាត់ដេរ និងទេសចរណ៍ ។
កម្មករនិយោយជិតមានឈ្មោះ បើកប្រាក់ឧបត្ថម្ភ នឹងទទួលបានសារតាមទូរស័ព្ទដៃ ។ កញ្ញារ៉ាវី ថា ថៅកែសណ្ឋាគាររបស់គាត់គ្រោងបើកសណ្ឋាគារវិញ នៅក្នុងខែសីហា ប៉ុន្តែកញ្ញាមិនមានសង្ឃឹមថា មានភ្ញៀវមកដើរកម្សាន្តឡើយ ពីព្រោះសណ្ឋាគារដែលគាត់ធ្វើការនោះពឹងលើភ្ញៀវបរទេសចូលសម្រាក ។
រ៉ាវី បានអះអាថា «កូវីដ១៩បានធ្វើឲ្យប៉ះពាល់សេដ្ឋកិច្ចទូទៅ ដូច្នេះក្រោយជំងឺនេះ ធូរស្រាល អ្នកផ្សេងក៏គេត្រូវស្តាសេដ្ឋកិច្ច ជីវភាពរបស់គេវិញសិនដែរ ទើបអាចដើរកម្សាន្តវិញបាន» ។
ខណៈដែលអ្នកត្រូវបានព្យួរការងារមួយចំនួនទទួលប្រាក់ឧបត្ថម្ភពីរាជរដ្ឋាភិបាលបងប្អូនមួយចំនួនដែលធ្វើការងារជាមគ្គុទេសទេសចរណ៍រង្វង់ពី ៤០០០ ទៅ ៥០០០ នាក់កំពុងរងគ្រោះធ្ងន់ធ្ងរផងដែរ ព្រោះអស់រយៈពេល៤ ទៅ ៥ ខែហើយដែលបងប្អូនអត់មានចំណូលទាល់តែសោះ រហូតខ្លះបង្ខំចិត្តទៅរត់ម៉ូតូឌុប និងខ្លះទៀតក្លាយជាកម្មករសំណង់ ដែលចំណូលខុសគ្នាឆ្ងាយពេលធ្វើជា មគ្គុទេសទេសចរណ៍ដែលអាចរកបានចន្លោះពី ៧០០ ទៅ ១០០០ ដុល្លារក្នុងមួយខែ តែពេលនេះរកបានត្រឹម ២០០ ដុល្លារក្នុងមួយខែអីប៉ុណ្ណោះ ។
សូមបញ្ជាក់ថា បងប្អូនជាមគ្គុទេសទេសចរណ៍ដែលមិនមានប្រាក់ខែត្រឹមត្រូវនោះទេ គឺមានន័យថាសឹងតែ ៩៧ភាគរយនៃមគ្គុទេសទេសចរណ៍ គឺធ្វើការតាមម៉ោង ដូច្នេះនៅពេលគ្មានភ្ញៀវទេសចរបរទេស គឺគ្មានចំណូលតែម្តង ៕
ចែករំលែកព័តមាននេះ