ខេត្តបន្ទាយមានជ័យ ៖ អាជ្ញាធរថៃបានអនុញ្ញាតឲ្យភាគីកម្ពុជាយករថយន្ត៥០គ្រឿងដឹកទំនិញរបស់អាជីវករខ្មែរចេញពីផ្សាររុងក្លឿ ប៉ុន្តែការបើកច្រកព្រំដែនប៉ោយប៉ែតមិនទាន់ធ្វើបានឡើយក្នុងពេលឆាប់ៗនេះ ចំពោះសំណើអាជីវករ សុំទៅមើលទំនិញរបស់ខ្លួនដោយផ្ទាល់ក្នុងផ្សាររុងក្លឿនោះ ក៏ភាគីថៃមិនអនុញ្ញាតឱ្យដែរ។
អាជីវករខ្មែរដែលធ្លាប់ចេញចូលទៅលក់ដូរទំនិញនៅក្នុងផ្សាររុងក្លឿប្រទេសថៃរាល់ថ្ងៃមុន ពេលមានវិបត្តិកូវីដ១៩ បានធ្វើបាតុកម្មជា និងដាក់ញត្តិទៅអាជ្ញាធរខេត្តបន្ទាយមានជ័យ ដើម្បីជួយជំរុញអាជាធរថៃ អនុញ្ញាតឲ្យពួកគាត់អាចចូលទៅមើលទំនិញនៅក្នុងផ្សាររុងក្លឿ។
អាជីវករខ្មែរលក់ដូរនៅក្នុងផ្សាររុងក្លឿមានចំនួនមិនតិចជាង ១ ៥០០នាក់ឡើយ ហើយថាទំនិញពួកគាត់នៅក្នុងផ្សារថៃជាប់ព្រំដែនមួយនេះ មានតម្លៃរាប់ម៉ឺនដុល្លារ។ អាជីវករបារម្ភថា ទំនិញទាំងអស់នោះអាចនឹងខូចបាត់បង់ ដោយសារពលរដ្ឋខ្មែរខានបានចូលទៅមើលច្រើនខែហើយ បន្ទាប់ពីអាជ្ញាធរថៃ បិទច្រកព្រំដែនដើម្បីការពារជំងឺកូវីដ១៩នោះ។
លោក អ៊ុំ រាត្រី អភិបាលខេត្តបន្ទាយមានជ័យ បានប្រជុំជាមួយ លោក វរ៉ាផាន់ សុវាណុន .WORAPHAN SUWANNUN អភិបាលខេត្តស្រះកែវ ប្រទេសថៃកាលពីថ្ងៃទី២៣មិថុនា តាមរយៈប្រព័ន្ធបញ្ជូនសារសម្លេង រូបភាព (Video Conference) ដើម្បីជជែកគ្នាជុំវិញបញ្ហាខាងលើនេះ។
ទោះបីជាអាជ្ញាធរថៃបានអនុញ្ញាតឲ្យកម្ពុជាយករថយន្តទៅដឹកទំនិញពលរដ្ឋខ្លួនចេញពីផ្សាររុងក្លឿក្តី តែភាគីថៃនៅមិនទាន់កំណត់ថា ពេលណា ទើបកម្ពុជាចូលទៅដឹកទំនិញទាំងនោះបាននៅឡើយទេ៕
ចែករំលែកព័តមាននេះ