រាជធានីភ្នំពេញ ៖ ក្មេងស្រី២នាក់រួមនឹងក្មេងប្រុសម្នាក់ដែលត្រូវជាបងប្អូនជីដូនមួយនឹងគ្នាបានចាកចេញពីផ្ទះតាមជីដូនទៅស្រែ ហើយក្រោយមកបានសុំជីដូនត្រឡប់មកផ្ទះមុន រួចហើយក្មេងស្រី២នាក់បាននាំគ្នាចុះទៅងូតទឹក និងបេះផ្កាឈូកនៅក្នុងស្រះមួយកន្លែងដែលមានជម្រៅ២ប្រម៉ោយអេស្ការវ៉ាទ័រ រួចក៏ផុតដៃផុតជើង ស្រាប់តែលង់និងបាត់ទៅក្នុងទឹក ។ ចំណែកឯក្មេងប្រុសមិនបានចុះងូតទឹកឡើយ ហើយនៅពេលឃើញបងស្រីទាំង២នាក់លិចបាត់ទៅក្នុងទឹកបែបនេះ ក៏រត់ត្រឡប់ក្រោយទៅប្រាប់ជីដូនឱ្យមកមើលនិងស្រែកឆោឡោបង្កការភ្ញាក់ផ្អើលដល់អ្នកភូមិជួយចុះរាវរកឃើញនិងដឹកទៅកាន់មន្ទីរពេទ្យបង្អែកស្រុកអង្គស្នួលដើម្បីសង្គ្រោះបន្ទាន់ដែរ ប៉ុន្តែក្រុមគ្រូពេទ្យបានប្រាប់ថាពួកនាងបានបាត់បង់ជីវិតទៅហើយ។
ហេតុការណ៍ខាងលើនេះបានកើតឡើងកាលពីវេលាម៉ោង១១ព្រឹកថ្ងៃទី២៤ ខែមិថុនា ឆ្នាំ២០២០ នៅក្នុងស្រះទឹក ស្ថិតនៅក្នុងភូមិតានួន សង្កាត់កំបូល ខណ្ឌកំបូល រាជធានីភ្នំពេញ។
ក្មេងស្រីដែលរងគ្រោះដល់បាត់បង់ជីវិតទាំង២នាក់ខាងលើ ម្នាក់ឈ្មោះវុទ្ធី វត្តី អាយុ១១ឆ្នាំ មានម្តាយឈ្មោះញិល ផាណា អាយុ៣៦ឆ្នាំ មុខរបរកម្មកររោងចក្រ និងម្នាក់ទៀតឈ្មោះសើ កែវរក្សា អាយុ៩ឆ្នាំមានឪពុកឈ្មោះ ញឹល សុភី អាយុ៤០ឆ្នាំ និងម្តាយឈ្មោះ បុិច អូន អាយុ៤៥ឆ្នាំ មុខរបរកម្មការិនីរោងចក្រ ។ ក្មេងស្រីរងគ្រោះជាសិស្សរៀននៅសាលាបឋមសិក្សាអង្គបឹងចក និងមានទីលំនៅក្នុងភូមិកើតហេតុខាងលើ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ ក្មេងស្រីទាំង២នាក់ខាងលើរួមជាមួយក្មេងប្រុសអាយុ៦ឆ្នាំម្នាក់ទៀតបានតាមជីដូនទៅដេញចាបនៅវាលស្រែ ដើម្បីកុំឲ្យសុីស្រូវដែលទើបនឹងសាបព្រោះ លុះក្រោយមកក្មេងទាំង៣នាក់បានសុំជីដូនត្រឡប់ទៅផ្ទះមុន ហើយជីដូនក៏បានអនុញ្ញាតឲ្យទៅមុន ។ ខណៈពេលដើរទៅដល់ស្រះទឹកខាងលើ ក្មេងស្រីទាំង២នាក់បាននាំគ្នាចុះទៅងូតទឹកនិងបេះផ្កាឈូក ហើយផុតដៃផុតជើង រួចលង់លិចបាត់ទៅក្នុងទឹកស្រះដែលមានជម្រៅ២ប្រម៉ោយអេស្ការវ៉ាទ័រស្ថិតនៅចម្ងាយប្រមាណជាង១០០ម៉ែត្រពីផ្ទះ ។ ចំណែកក្មេងប្រុសមិនបានចុះងូតទឹកឡើយ លុះនៅពេលឃើញបងស្រីទាំង២នាក់លង់ទឹកបែបនេះ ក៏បានរត់ត្រឡប់ទៅស្រែវិញនិងប្រាប់ជីដូនតាមដំណើររឿង។
តាមប្រភពដដែលបានបន្តទៀតថា បន្ទាប់ពីឮក្មេងប្រុសរៀបប្រាប់បែបនេះ ជីដូនបានរត់តាំងពីស្រែទៅមើលហើយបានស្រែកឆោឡោបង្កឲ្យមានការភ្ញាក់ផ្អើលដល់អ្នកភូមិនាំគ្នាទៅជួយរាវរករហូតឃើញ បន្ទាប់មកបានដឹកទៅកាន់មន្ទីរពេទ្យបង្អែកស្រុកអង្គស្នួលដើម្បីសង្គ្រោះបន្ទាន់ដែរ ប៉ុន្តែក្រុមគ្រូពេទ្យបានប្រាប់ថាក្មេងស្រីទាំង២នាក់បានបាត់ទៅហើយ ។ ទើបដឹកសពត្រឡប់មកផ្ទះវិញ ហើយរាយការណ៍ជូនអាជ្ញាធរនិងសមត្ថកិច្ចមូលដ្ឋានខណ្ឌកំបូលឲ្យចុះទៅពិនិត្យមើលជាក់ស្ដែង ដោយពុំមានការប្ដឹងផ្ដល់ ទើបនគរបាលប្រគល់សពជូនក្រុមគ្រួសារធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ