ខេត្តសៀមរាប ៖ ប្រជាពលរដ្ឋខេត្តសៀមរាបចំនួន២២នាក់ដែលឆ្លងដែនខុសច្បាប់ ត្រូវបានសមត្ថកិច្ចការពារព្រំដែនប្រទេសថៃ ចាប់បញ្ជូនឲ្យសមត្ថកិច្ចអាជ្ញាធរកម្ពុជានៅប្រចាំច្រកអូរបីជាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីរសៀលថ្ងៃទី២៣ ខែមិថុនា…
ខេត្តសៀមរាប ៖ ប្រជាពលរដ្ឋខេត្តសៀមរាបចំនួន២២នាក់ដែលឆ្លងដែនខុសច្បាប់ ត្រូវបានសមត្ថកិច្ចការពារព្រំដែនប្រទេសថៃ ចាប់បញ្ជូនឲ្យសមត្ថកិច្ចអាជ្ញាធរកម្ពុជានៅប្រចាំច្រកអូរបីជាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីរសៀលថ្ងៃទី២៣ ខែមិថុនា ឆ្នាំ២០២០ នេះដែរ ដោយលោកជំទាវ យូ សុភា អភិបាលរងខេត្តសៀមរាប និងជាគណៈកម្មការទទួលប្រជាពលករមកពីក្រៅប្រទេស ដឹកនាំប្រតិភូចុះទៅទទួលយកបងប្អូនដែលជាពលករទាំង២២នាក់វិលត្រឡប់មកកាន់ខេត្តសៀមរាប ក្នុងនោះក៏មានវត្តមានរបស់លោកអភិបាលស្រុកអូរជ្រៅចូលរួមផងដែរ ។
តាមការបញ្ជាក់របស់កម្លាំងសមត្ថកិច្ច និងក្រុមការងារទទួលពលករប្រចាំច្រកអូរបីជាន់បានឲ្យដឹងថា ពលករទាំង២២នាក់ខាងលើនោះ (ស្រី១០នាក់) ដែលបានលួចឆ្លងដែនដោយខុសច្បាប់តាមរយៈមេខ្យល់ ចូលតាមច្រករបៀងក្នុងភូមិសាស្ត្រ ស្រុកម៉ាឡៃ ខេត្តបន្ទាយមានជ័យ ទៅប្រទេសថៃ កាលពីយប់ថ្ងៃទី២២ មិថុនា ហើយត្រូវបានកម្លាំងសមត្ថកិច្ចការពារព្រំដែនថៃបានចាប់ និងបញ្ជូនឲ្យកម្លាំងសមត្ថកិច្ចប្រចាំការច្រកអូរបីជាន់ កាលពីព្រឹកថ្ងៃទី២៣ មិថុនានេះ ហើយក៏ត្រូវធ្វើការប្រគល់ឲ្យអាជ្ញាធរខេត្តសៀមរាបផងដែរ ។
លោកជំទាវ យូ សុភា អភិបាលរងខេត្ត ក៏បានធ្វើការថ្លែងអំណរគុណដល់អាជ្ញាធរស្រុកអូរជ្រៅ និងកម្លាំងសមត្ថកិច្ចប្រចាំច្រកអូរបីជាន់ រួមទាំងអង្គការសង្គមស៊ីវិល ដែលបានយកចិត្តទុកដាក់ពីសុវត្ថិភាពសន្តិសុខ និងផ្គត់ផ្គង់អាហារដល់បងប្អូនប្រជាពលរដ្ឋជាពលករដែលបានវិលត្រឡប់មកពីក្រៅប្រទេស រួមទាំងបងប្អូនជាពលករឆ្លងដែនដោយខុសច្បាប់ ក្នុងពេលនៅលើពិភពលោក ក៏ដូចប្រទេសជិតខាង និងនៅកម្ពុជា កំពុងជួបនូវវិបត្តិនៃជម្ងឺកូវិដ១៩ ហើយប្រទេសជិតខាងកម្ពុជាបានកំពុងតែប្រកាសដាក់ប្រទេសក្នុងគ្រាអាសន្ននៅឡើយ ។
ក្នុងនោះដែរ លោកជំទាវក៏បានណែនាំដល់បងប្អូនពលករទាំងអស់ ដែលបានចាញ់បោកមេខ្យល់ឲ្យចូលទៅធ្វើការងារនៅប្រទេសជិតខាងដោយខុសច្បាប់ ក្នុងគ្រាប្រទេសជិតខាងបានដាក់ប្រទេសក្នុងគ្រាអាសន្ននៅឡើយ ។ ម្យ៉ាងទៀតការធ្វើចំណាកស្រុករបស់បងប្អូនទៅដោយប្រថុយប្រថាន មិនបានគិតពីសុវត្ថិភាព និងសន្តិសុខរបស់ខ្លួន ហើយក៏ជាអំពើជួញដូរមនុស្សទៀតផង ។
លោកអភិបាលស្រុកអូរជ្រៅក៏បាននាំយកនូវគ្រឿង ឧបភោគបរិភោគ ប្រគល់ជូនដល់បងប្អូន កម្លាំងសមត្ថកិច្ចប្រចាំការនៅច្រកអូរបីជាន់នូវអង្ករ មី ទឹកត្រី ទឹកស៊ីអ៊ីវ និងថវិកា២លានរៀលផងដែរ ។
នារសៀលថ្ងៃដដែលនោះដែរ លោក ជំទាវ យូ សុភា ក៏បានបន្តដំណើរទៅទទួលបងប្អូននិស្សិតចំនួន១៦នាក់ ដែលបានវិលត្រឡប់មកពីការធ្វើកម្មសិក្សានៅតាមរោងចក្ររបស់ក្រុមហ៊ុននៃព្រះរាជាណាចក្រថៃ តាមច្រកអន្តរជាតិប៉ោយប៉ែត ខេត្តបន្ទាយមានជ័យ ។
តាមការបញ្ជាក់របស់លោកនាយករងនៃសាលាវិទ្យាស្ថានពហុបច្ចេកទេសភូមិភាគតេជោ សែន សៀមរាប បានឲ្យដឹងថា ក្រុមនិស្សិតទាំង១៦នាក់នេះ បានទៅធ្វើកម្មសិក្សានៅតាមរោងចក្រនៃប្រទេសថៃ តាមរយៈក្រុមហ៊ុនចាប់តាំងពីខែកុម្ភៈ ឆ្នាំ២០២០ ហើយដល់ពេលផ្ទុះនូវវិបត្តិជម្ងឺកូវិដ១៩ ត្រូវបានប្រទេសថៃប្រកាសដាក់ប្រទេសក្នុងគ្រាអាសន្ន បានធ្វើឲ្យខកខាតដល់ក្រុមនិស្សិតទាំងមិនអាចវិលត្រឡប់មកកាន់មាតុប្រទេសវិញបានឡើយ ។
តាមការបញ្ជាក់របស់លោកជំទាវ យូ សុភា បានឲ្យដឹងថា បងប្អូនដែលបានវិលត្រឡប់មកពីក្រៅប្រទេស ក៏ដូចបង ប្អូនដែលបានឆ្លងដែនខុសច្បាប់ អាជ្ញាធរខេត្តបានយករថយន្តរបស់តំបន់ប្រតិបត្តិការសឹករងសៀមរាប មកដឹកជញ្ជូនយកទៅដាក់មណ្ឌលចត្តាឡីស័ក នៅសាលាគរុកោសល្យខេត្ត ដើម្បីធ្វើការត្រួតពិនិត្យសុខភាព និងដាក់ឲ្យនៅដាច់ដោយឡែក ក្នុងរយៈពេល១៤ថ្ងៃ មុននឹងចូលទៅដល់លំនៅដ្ឋានជួបជុំក្រុមគ្រួសារ ៕ (កែសម្រួលដោយ ៖ ធីតា)
ចែករំលែកព័តមាននេះ