រាជធានីភ្នំពេញ៖ខណៈអាជីវកម្មនិងមុខជំនួញមួយចំនួននៅកម្ពុជាហាក់កំពុងរងផលប៉ះពាល់ ដោយសារតែជំងឺកូវីដ ១៩ ទីប្រឹក្សាសេដ្ឋកិច្ចនៅកម្ពុជាបានផ្តល់ជាមតិថា ការមានចក្ខុវិស័យច្បាស់លាស់ គឺជារឿងចាំបាច់បំផុត ជាពិសេសនោះមិនគួរបង្កើតមុខរបរមួយជាលក្ខណៈឱកាសនិយមនោះទេ ។
លោក ង៉ែត ជូ អ្នកជំនាញអចលទ្រព្យ និងជាទីប្រឹក្សាសេដ្ឋកិច្ចលេចធ្លោមួយរូប បាននិយាយថា ដើម្បីឲ្យប្រាកដថា ពេលមានកូវីដ ១៩ ជាឱកាសបង្កើតមុខរបរថ្មី ឬពង្រឹងមុខរបរ ដើម្បីរកចំណូល យើងត្រូវសម្លឹងទីផ្សារអនាគត មិនមែនទីផ្សារបែបឱកាសនិយមដូចជា ពេលនេះគេត្រូវការអាល់កុល និងម៉ាស់ យើងបែរជាបង្កើតអាជីវកម្មផលិតអាល់កុល និងម៉ាស់សម្រាប់ពាក់នោះទេ ព្រោះទីផ្សារវាមិនស្ថិតស្ថេរឡើយ ព្រោះថា វិបត្តិជំងឺរលាកសួតប្រភេទថ្មីនេះ មិនស្ថិតនៅជាអចិន្ត្រៃយ៍ឡើង ដូច្នេះពេលកូវីដ ១៩ ធូរស្បើយនោះតម្រូវការនឹងធ្លាក់ចុះ ។
លោក ង៉ែត ជូ បានបន្តថា «ការបង្កើតមុខរបរថ្មីយើងត្រូវតោងយល់ថា បញ្ហាវិបត្តិកូវីដ១៩ គឺជាវិបត្តិបណ្តោះអាសន្នទេ វាមិនមែនជាវិបត្តិអចិន្ត្រៃយ៍ ឬជារៀងរហូតនោះទេ វាអាចបាត់ទៅវិញក្នុងរយៈពេលថាយូរបំផុត ២ ឬ ៣ឆ្នាំខាងមុខ» ។
«អ៊ីចឹងយើងគួរតោងថា ពេលបង្កើតមុខរបរអីមួយនុង គឺយើងត្រូវសម្លឹងទៅមើលអនាគតវែងឆ្ងាយ យើងមិនមែនបង្កើតមុខរបរមួយជាលក្ខណៈឱកាសនិយម ។ ឧទាហរណ៍ថាដល់ពេល គេត្រូវការប្រើអាល់កុល ប្រើម៉ាស់អីនុងបានយើងរិះរកវិធី ផលិតម៉ាស់ ផលិតអាល់កុលហ្នឹងទេ ព្រោះតែបន្តិចទៀត ពេលកូវីដ ចប់នោះតម្រូវការនឹងធ្លាក់ចុះ ។ អ៊ីចឹងយើងត្រូវសម្លឹងមើលទីផ្សារធម្មតាត្រូវការអី» ។ លោក ង៉ែត ជូ បន្ថែម ។
ទីប្រឹក្សាសេដ្ឋកិច្ចដែលនិយមតុបតែងកាយសាមញ្ញៗបាននិយាយបន្តថា ទីផ្សារធម្មតានៅពេលដែល កូវីដ ១៩ វាបាត់ទៅវិញ អញ្ចឹងយើងត្រូវពិនិត្យមើលទៅលើអ្វីដែលជាតម្រូវការពិតប្រាកដ ។ ទាមទារឲ្យមានចក្ខុវិស័យមិនមែនគ្រាន់តែនិយាយថា ទីផ្សារត្រូវការម៉ាស់ ត្រូវការអាល់កុល យើងត្រូវផលិតវានោះទេ ព្រោះវាត្រឹមមានទីផ្សារក្នុងពេលកើតមានវិបត្តិមួយរយៈតែប៉ុណ្ណោះ ។ ដូច្នេះនៅពេលស្ថានភាពមកជាធម្មតាវិញ តើទីផ្សារត្រូវការអី ? ឧទាហរណ៍ជាក់ស្តែង ខ្ញុំសង្កេតឃើញមានសាលារៀន ទោះបីជាសាលារៀននាពេលបច្ចុប្បន្នមានបញ្ហាក៏ពិតមែន តែសាលាមួយចំនួនគេបន្តវិនិយោគសាងសង់អាគារបន្តទៀត ដើម្បីថានៅពេលកូវីដចប់ គឺគេបម្រើសេវាអប់រំបន្តទៀត »។
លោកសង្កត់ធ្ងន់ថា «ប៉ុន្តែបញ្ហាធំនៅស្រុកខ្មែរយើងនឹងគឺថា សហគ្រិនវ័យក្មេងច្រើនចម្លងតាមគេតាមឯង ។ ឧទាហរណ៍លក់ឡេអនឡាញ កំពុងពេញនិយម ក៏ចម្លងតាមគ្នាទៅ ។ ឧទារហរណ៍ លក់ដីឡូតិ៍ច្រើន ក៏នាំគ្នាលក់ដីពុះឡូតិ៍តាមគ្នាទៅ ដោយមិនមានការច្នៃប្រឌិតប្រមើលមើលថា ឥឡូវស្ថានភាព សេដ្ឋកិច្ចមិនសូវល្អមែន ចំណូលពលរដ្ឋមិនសូវល្អពេលនេះ ។ តែ ៥ ឆ្នាំទៅមុខ តើអ្វីដែលជាតម្រូវការជាក់ស្តែង ដែលអាចជានិន្នាការនៅថ្ងៃអនាគត អ៊ីចឹង ត្រឡប់មកវិញការអប់រំនៅតែ ជាចំនុចសំខាន់ណាស់ ព្រោះជាតម្រូវការចាំបាច់ » ៕
ចែករំលែកព័តមាននេះ