ព្រះសម្មាសម្ពុទ្ធទ្រង់ណែនាំឱ្យអ្នកបួសនិងគ្រហស្ថប្រកបរបរចិញ្ចឹមជីវិតទៅតាមផ្លូវធម៌ ផ្លូវសុចរិតដើម្បីឱ្យជីវិតបានសុខចម្រើនដោយព្រះអង្គបានបង្ហាញផ្លូវឱ្យដើរតាមសម្មាអាជីវៈជាគោលធម៌មួយយ៉ាងសំខាន់ចង្អុលផ្លូវសុខដល់អ្នកប្រកបរបរចិញ្ចឹមជីវិត ។
សម្រាប់គ្រហស្ថបានដល់ការវៀរចាកជំនួញខុសគឺរបរណាដែលច្បាប់ហាមឃាត់មានការជួញដូរមនុស្ស ជួញដូរសត្វ ជួញដូរគ្រឿងញៀន ជួញដូរអាវុធខុសច្បាប់ជាដើម ។ លះបង់ចោលការកេងបន្លំមានការបំបាត់ភ្នែកជញ្ជីង ក្លែងរបស់កាឡៃជាដើម, លះបង់ការធ្វើជាសាក្សីកោងមួលបង្កាច់គេទាំងបំពាន, លះបង់ការល្មោភសំណូក ហើយបែរមកប្រកបអាជីវកម្មត្រឹមត្រូវដែលនាំឲ្យសេដ្ឋកិច្ចគ្រួសារ និងសេដ្ឋកិច្ចជាតិរីកចម្រើន ។
ចំណែកអ្នកបួសបានដល់ការលះបង់មិច្ឆាអាជីវៈគឺការចិញ្ចឹមជីវិតខុស ដោយអនេសនៈ២១ និងបាបធម៌៥ មានការធ្វើទូតនាំដំណឹងពីគ្រួសារមួយទៅកាន់គ្រួសារមួយ ធ្វើពេទ្យមើលជំងឺ ស្តោះព្រួសមន្តអាគមជាដើម ។
អ្នកបួសមិនគប្បីត្រាច់ទៅកាន់ទីឋានដែលហាមឃាត់ដោយវិន័យ ហើយងាកមកចិញ្ចឹមជីវិតដោយភិក្ខាចរិយធម៌ដ៏ស្មើ ឬបច្ច័យដែលកើតឡើងតាមធម៌ ទើបឈ្មោះថាជាសមណៈបរិសុទ្ធ សមជាស្រែបុណ្យរបស់ពុទ្ធបរិស័ទទាំងឡាយពិតៗ ។ សាន សារិន
ចែករំលែកព័តមាននេះ