ខេត្តកំពង់ឆ្នាំង ៖ សត្វពស់ថ្លាន់ចំនួន៤ក្បាលដែលប្រជាពលរដ្ឋបានយកប្រគល់ជូនលោកអុិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង ត្រូវបានមន្ត្រីជំនាញខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់និងនេសាទ យកទៅលែងនៅព្រៃធម្មជាតិចំណុចភ្នំនាងកង្រីវិញហើយកាលពីរសៀលថ្ងៃទី២៣ ខែមិថុនា ឆ្នាំ២០២០…
ខេត្តកំពង់ឆ្នាំង ៖ សត្វពស់ថ្លាន់ចំនួន៤ក្បាលដែលប្រជាពលរដ្ឋបានយកប្រគល់ជូនលោកអុិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង ត្រូវបានមន្ត្រីជំនាញខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់និងនេសាទ យកទៅលែងនៅព្រៃធម្មជាតិចំណុចភ្នំនាងកង្រីវិញហើយកាលពីរសៀលថ្ងៃទី២៣ ខែមិថុនា ឆ្នាំ២០២០ កន្លងមកនេះ។
លោក លី ឡា នាយខណ្ឌរដ្ឋបាលជលផល នៃមន្ទីរកសិកម្មរុក្ខាប្រមាញ់និងនេសាទ ខេត្តកំពង់ឆ្នាំង បានឲ្យដឹងថា សត្វពស់ថ្លាន់ទាំង៤ក្បាលនេះ ត្រូវបានប្រជាពលរដ្ឋចិញ្ចឹមតាំងពីតូចមកម៉្លេះ ប៉ុន្តែដោយសារមិនហ៊ានយកទៅលែងនៅឯណា ព្រោះខ្លាចខុសច្បាប់ ហើយបារម្ភត្រូវគេចាប់ខ្លួនទៀតនោះ ម៉្លោះហើយក៏បាន សម្រេចចិត្តយកទៅប្រគល់ជូនព្រះរាជអាជ្ញាអមសាលាដំបូងខេត្ត ដើម្បីយកទៅលែង ហើយក្នុងថ្ងៃនោះផងដែរ លោកព្រះរាជអាជ្ញាក៏បានប្រគល់សត្វពស់ថ្លាន់ទាំង៤ក្បាល ដែលក្នុង១ក្បាលមានទម្ងន់ប្រមាណជាង១៥គីឡូក្រាម ទៅឱ្យមន្ត្រីជំនាញយកទៅដោះលែងជំនួសវិញ ។
លោកបានបន្តថា នាពេលនេះផងដែរ ដោយយល់ឃើញថា នៅជើងភ្នំនាងកង្រី ដែលមានសហគមន៍ ព្រៃឈើថែរក្សា និងមានសុវត្ថិភាពច្រើន ទើបមន្ត្រីជំនាញរបស់លោកបានយកសត្វពស់ថ្លាន់ទាំង៤ក្បាលនេះ មកដោះលែងនៅទីនេះ ។ ជាចុងក្រោយ លោកសំណូមពរដល់ប្រជាពលរដ្ឋទាំងអស់ សូមមេត្តាកុំចាប់សត្វព្រៃ និងនេសាទត្រីដោយខុសច្បាប់ក្នុងរដូវបិទនេសាទផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ