ខេត្តមណ្ឌលគិរី ៖ ដើម្បីជួយដោះស្រាយដល់ជីវភាពរស់នៅរបស់ប្រជាពលរដ្ឋ ជាពិសេសគ្រួសារកុមារក្រីក្រនៅតាមខ្នងផ្ទះ ក្នុងការជួយដោះស្រាយជីវភាពរបស់ពួកគាត់ក្នុងកាលៈទេសៈដែលរងផលប៉ះពាល់សេដ្ឋកិច្ចគ្រួសារ ដោយសារការផ្ទុះឡើងនៃជំងឺកូវីដ-១៩ កាលពីពេលថ្មីៗកន្លងទៅនេះ ក្រុមប្រឹក្សាជាតិកម្ពុជាដើម្បីកុមារ សហការជាមួយរដ្ឋបាលខេត្តមណ្ឌលគិរី ដឹកនាំដោយលោកជំទាវ…
ខេត្តមណ្ឌលគិរី ៖ ដើម្បីជួយដោះស្រាយដល់ជីវភាពរស់នៅរបស់ប្រជាពលរដ្ឋ ជាពិសេសគ្រួសារកុមារក្រីក្រនៅតាមខ្នងផ្ទះ ក្នុងការជួយដោះស្រាយជីវភាពរបស់ពួកគាត់ក្នុងកាលៈទេសៈដែលរងផលប៉ះពាល់សេដ្ឋកិច្ចគ្រួសារ ដោយសារការផ្ទុះឡើងនៃជំងឺកូវីដ-១៩ កាលពីពេលថ្មីៗកន្លងទៅនេះ ក្រុមប្រឹក្សាជាតិកម្ពុជាដើម្បីកុមារ សហការជាមួយរដ្ឋបាលខេត្តមណ្ឌលគិរី ដឹកនាំដោយលោកជំទាវ សម្បត្តិ សុគន្ធា អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ និងលោក ជាក់ ម៉េងហ៊ាង អភិបាលរងខេត្ត លោក ខឹម សុផុន ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត និងគណៈប្រតិភូអមដំណើរជាច្រើនរូប បានអញ្ជើញចុះសួរសុខទុក្ខគ្រួសារកុមារតាមខ្នងផ្ទះចំនួន១០០គ្រួសារ នៅក្រុង-ស្រុកចំនួន៣ ក្នុងខេត្តមណ្ឌលគិរី។
លោក ជាក់ ម៉េងហ៊ាង អភិបាលរងខេត្ត បានធ្វើការអំពាវនាវសារជាថ្មីទៀត ដល់ប្រជាពលរដ្ឋកុំភ្លេចរួមគ្នាប្រយុទ្ធប្រឆាំង និងបង្កើនការការពារជម្ងឺកូវីដ-១៩ បើទោះបីជាជំងឺដ៏កាចសាហាវនេះមានការថមថយនៅប្រទេសកម្ពុជាក៏ពិតមែន តែវាអាចមានរលកទី២នៃការរីករាលដាលខ្លាំងឡើងវិញ បើប្រជាពលរដ្ឋយើងម្នាក់ៗ មិនបន្តយកចិត្តទុកដាក់ការពារជំងឺនេះ។
លោកអភិបាលរងខេត្តបន្តថា យើងអាចភ្លេចជំងឺកូវីដ-១៩ តែជំងឺកូវីដ-១៩ មិនដែលភ្លេចយើងឡើយ។ ទន្ទឹមនឹងនោះ លោក អភិបាលរងខេត្តបានណែនាំដល់បងប្អូនប្រជាពលរដ្ឋទាំងអស់ ត្រូវខិតខំប្រឹងប្រែងប្រកបរបរចិញ្ចឹមជីវិត និងដាំដុះដំណាំរួមផ្សំនានា ជាពិសេសត្រូវរស់នៅស្អាត ហូបស្អាត មានអនាម័យ ដោយ ត្រូវពាក់ម៉ាស់ ឬប្រើប្រាស់ក្រមានៅកន្លែងសាធារណៈ និងលាងសម្អាតដៃឱ្យបានជាប់ជាប្រចាំ ក្នុងន័យចូលរួមបង្ការ និងទប់ស្កាត់ ការរីករាលដាលនៃជំងឺកូវីដ១៩។
លោកជំទាវ សម្បត្តិ សុគន្ធា អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិកម្ពុជាដើម្បីកុមារ ក៏បានណែនាំដល់បងប្អូនប្រជាពលរដ្ឋទាំងអស់ សូមអនុវត្តឱ្យមានប្រសិទ្ធភាពខ្ពស់ តាមការណែនាំរបស់ក្រសួងសុខាភិបាល ក្នុងការបង្ការ ទប់ស្កាត់ ការឆ្លងរីករាលដាលនៃជំងឺកូវីដ១៩ និងកុំប្រើប្រាស់អំពើហិង្សាលើកូនៗ។
សូមបញ្ជាក់ថា អំណោយនៅក្នុងយុទ្ធនាចុះសួរសុខទុក្ខ និងការចែកសម្ភារៈប្រើប្រាស់ និងស្បៀងដល់ប្រជាជនចំនួន១០០គ្រួសារគ្រួសារ ក្នុងនោះឃុំអរបួន ស្រុកកោះញែក ចំនួន៤០គ្រួសារ ឃុំប៊ូស្រា ស្រុកពេជ្រាដាចំនួន៣០គ្រួសារ និងនៅសង្កាត់រមនា ក្រុងសែនមនោរម្យចំនួន៣០គ្រួសារ ក្នុងមួយគ្រួសារៗ ទទួល បានអង្ករ ២០គីឡូក្រាម ត្រីខ១យួរ(១០កំប៉ុង) ប្រងឆា១ដប (ចំណុះ២លីត្រ) មី១កេះ ទឹកត្រី១យួរ (៦ដប) ទឹកស៊ីអ៊ីវ១យួរ (៦ដប) អំបិល ៤គីឡូក្រាម សាប៊ូដុំ ៤ដុំ សាប៊ូម្សៅ ១គីឡូក្រាម និងក្រមាផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ