រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងឲ្យដឹងថា រាជរដ្ឋាភិបាលនឹងត្រូវចំណាយថវិកាចំនួន ១ពាន់លានរៀល ឬប្រមាណ ២៥ លានដុល្លារអាមេរិកក្នុងមួយខែសម្រាប់ការបើកផ្តល់ជូនដល់ប្រជាពលរដ្ឋក្រីក្រប្រភេទ ក្រ១ និងក្រ ២ ដែលមានចំនួន ៥៦ម៉ឺនគ្រួសារទូទាំងប្រទេស ដែលបានរងគ្រោះដោយសារតែវិបត្តិជំងឺកូវីដ ១៩ ដែលនឹងអនុវត្តចាប់ពីសប្តាហ៍ទី ៤ នៃខែមិថុនានេះតែម្តង ។
ថ្លែងនៅក្នុងពិធីប្រកាសជាផ្លូវការកម្មវិធីឧបត្ថម្ភសាច់ប្រាក់ជូនប្រជាពលរដ្ឋមានជីវភាពក្រីក្រ និងងាយរងគ្រោះក្នុងអំឡុងពេលជំងឺកូវីដ១៩ ធ្វើឡើងនៅវិមានសន្តិភាព រាជធានីភ្នំពេញ នៅព្រឹកថ្ងៃទី ២៤ មិថុនានេះ សម្តេចតេជោបានបញ្ជាក់ថា ប្រាក់ឧបត្ថម្ភនេះនឹងបើកផ្តល់ជូនគ្រួសារក្រីក្ររៀងរាល់សប្តាហ៍ទី៤ នៃខែនីមួយៗ តាមរយៈភ្នាក់ងារវីង ទូទាំងប្រទេស ដែលការបើកប្រាក់ជួយពលរដ្ឋក្រីក្រនាពេលនេះដែលការបើកជុំទី១ នឹងធ្វើនៅខែមិថុនា និងខែកក្កដា ។
សម្តេចនាយករដ្ឋមន្ត្រីបានបញ្ជាក់ផងដែរ «កម្មវិធីជំនួយសង្គមនេះមិនមែនមានលក្ខណៈជាអចិន្ត្រៃយ៍នោះទេ តែសម្រាប់អំឡុងពេលកូវីដ ១៩ » ។ ដូច្នេះនៅពេលដែលផលប៉ះពាល់កូវីដ១៩ ធូរស្បើយនោះរាជរដ្ឋាភិបាលនឹងបញ្ចប់កម្មវីធីនេះ ហើយបង្វែរសាច់ប្រាក់សម្រាប់កម្មវិធីអភិវឌ្ឍន៍ផ្សេងៗរបស់រាជរដ្ឋាភិបាល ។
សម្តេចក៏បានបន្ថែមថា កម្មវិធីឧបត្ថម្ភសាច់ប្រាក់ជូនប្រជាពលរដ្ឋមានជីវភាពក្រីក្រ និងងាយរងគ្រោះក្នុងអំឡុងពេលជំងឺកូវីដ១៩ គឺសម្រាប់សម្របសម្រួលដោះស្រាយការលំបាករបស់ប្រជាជន តែ «នេះជាជំនួយសង្គមក្នុងពេលមានវិបត្តិ មិនមែនជាការចិញ្ចឹមរបស់រដ្ឋអចិន្ត្រៃយ៍នោះទេ » ៕
ចែករំលែកព័តមាននេះ