អ្នកស្រី ចេន ហ្គូតដល (Jane Goodall) ជានរវិទូដែលត្រូវបានទទួលស្គាល់ជុំវិញពិភពលោកបាននិយាយថា ក្មេងៗគួរតែព្យាយាមសម្រេចបានភាពជោគជ័យដែលមិនផ្តោតសំខាន់លើលុយ និងកេរ្តិ៍ឈ្មោះ ។ លើសពីនេះទៅទៀត អ្នកស្រីបានប្រាប់ដល់ CNBC Make It ថា ក្មេងៗមិនគួរព្យាយាមក្លាយជាលោកមហាសេដ្ឋី ប៊ីល ហ្គេតស៍ (Bill Gates) ទីពីរទេ ។
អ្នកស្រីបានប្រាប់មកថា មិនមាននរណាម្នាក់ត្រូវការលុយច្រើនដល់កម្រិតដូចលោក ហ្គេតស៍ និងលោកមហាសេដ្ឋី ជេហ្វ បេសូស (Jeff Bezos) ទេ ។
គួរបញ្ជាក់ដែរថា លោក បេសូស និងលោក ហ្គេតស៍ បច្ចុប្បន្នជាបុរសដែលមានទ្រព្យសម្បត្តិច្រើនជាងគេលើលោកលេខមួយ និងលេខពីរបើយោងទៅតាម Forbes ។ ប៉ុន្តែលោកហ្គេតស៍ត្រូវបានទទួលស្គាល់ថាជាសប្បុរសជនដ៏សកម្មមួយរូប ។ ក្នុងពេលថ្មីៗនេះ មូលនិធិសប្បុរសធម៌របស់លោកបានបរិច្ចាគ ១.៦ប៊ីលានដុល្លារទៅ Gavi ដើម្បីស្រាវជ្រាវរកវ៉ាក់សាំងមស្រាប់កូវីដ ១៩ផងដែរ ។
ជាមួយគ្នានេះដែរ លោក បេសូស បានបង្កើតមូលនិធិ Bezos Earth Fund កាលពីខែកុម្ភៈដែលមានថវិកាសរុប ១០ប៊ីលានដុល្លារ ។ ក្នុងពេលថ្មីៗនេះលោកបានបរិច្ចាគ ១០០លានដុល្លារផងដែរដល់អង្គការ Feeding America ដើម្បីឆ្លើយតបនឹងកូវីដ ១៩ ។
ប៉ុន្តែអ្នកស្រី ហ្គូតដល បានប្រាប់មកថា ក្មេងៗគួរតែមានគោលដៅធ្វើអ្វីដែលខ្លួនស្រលាញ់ពិតប្រាកដ និងអនុញ្ញាតឲ្យខ្លួនកំណត់នូវស្តង់ដារសម្រាប់ភាពជោគជ័យខុសប្លែកពីអ្នកដទៃ ។ លើសពីនេះទៅទៀត អ្នកស្រីបានចែករំលែកដោយយោងតាមការតាមដានមើលសត្វស្វាអស់រយៈពេលជាច្រើនឆ្នាំមកថា ការគាំទ្រពីអាណាព្យាបាលក្នុងកំឡុងពេលប៉ុន្មានឆ្នាំដំបូង គឺពិតជាសំខាន់ណាស់សម្រាប់ភាពជោគជ័យនៅថ្ងៃអនាគត ។
អ្នកស្រីបានប្រាប់មកថា មនុស្សជាច្រើនបានប្រាប់អ្នកស្រីថាពួកគេចង់ជោគជ័យដូចអ្នកស្រីដែរ និងបានសុំដំបូន្មានពីអ្នកស្រីជាដើម ។ ប៉ុន្តែអ្នកស្រីបែរជាប្រាប់ទៅពួកគេថា វាមិនគួរជាគោលដៅក្នុងជីវិតរបស់ពួកគេទេ ។
លើសពីនេះទៅទៀតអ្នកស្រីបាននិយាយថាអ្នកស្រីប្រហែលជាបោះបង់ចោលហើយប្រសិនបើអ្នកស្រីដឹងថាអ្នកស្រីនិងល្បីឈ្មោះ និងជោគជ័យដូចសព្វថ្ងៃ ព្រោះអ្នកស្រីមិនដែលមានគោលដៅទាំងនេះទេ ។ ផ្ទុយមកវិញអ្នកស្រីគ្រាន់តែចង់សិក្សាពីសត្វស្វា ដូច្នេះទើបអ្នកស្រីព្យាយាមបន្តការសិក្សារហូតក្លាយជាបណ្ឌិតម្នាក់ទៅ ៕
ចែករំលែកព័តមាននេះ