រាជធានីភ្នំពេញ ៖ មនុស្សភាគច្រើនតែងតែពោលថា ពួកគាត់មានតែគំនិតច្រើនក្នុងការរកស៊ី តែអ្វីដែលជាបញ្ហាចោទនោះ គឺ «អត់មានដើមទុន» ដើម្បីចាប់ផ្តើមនូវមុខរបរដែលខ្លួនបានគិតនោះ ខណៈបងប្អូនខ្លះទៀតនិយាយថា បើគេជាអ្នកមានមានលុយស្រាប់ដល់ពេលមានគំនិត គឺចេញរកស៊ីបានតែម្តង គឺចេះតែដុះឡើងទៅមុខ ។
យ៉ាងណាមិញអ្នកជំនាញខាងហិរញ្ញវត្ថុ និងជាទីប្រឹក្សាសេដ្ឋកិច្ចលេចធ្លោនៅកម្ពុជាបានលើកឡើងថា មានត្រឹមតែដើមទុនមិនមែនមានន័យថា គ្រប់គ្រាន់នោះទេ ។ ត្រង់នេះមានន័យថា «មានដើមទុនខ្វះបញ្ញាដូចស្វាបានដូងខ្ចី មិនដឹងធ្វើយ៉ាងណាបានឆីរបស់ឆ្ងាញ់ ។ ដូច្នេះបើចង់កសាងទ្រព្យធនត្រូវកសាងគ្រឹះ (ចំណេះ ជំនាញ) អោយរឹងមាំជាមុនសិន» ។ នេះជាការលើកឡើងរបស់លោក ង៉េត ជូ ។
នៅពេលសាកសួរថា តើគួរមានចំនេះ និងជំនាញអ្វីទើបហៅថា ជាការចាប់ផ្តើមរកស៊ីប្រកបដោយបញ្ញា និងទុនគ្រប់គ្រាន់នោះលោក ង៉ែត ជូ បានបញ្ជាក់យ៉ាងដូច្នេះថា«មានចំណេះជំនាញហ្នឹង គឺចំនេះជំនាញទាក់ទងជាមួយនឹងមុខរបរ ឬក៏ជំនួញដែលខ្លួនចង់ធ្វើ ។ ឧទាហរណ៍អ្នកចង់បើកភោជនីយដ្ឋាន ត្រូវមានចំនេះដឹងអំពីតម្រូវការ អតិថិជន ទីផ្សារ ទាក់ទងនឹងអាហារ ហើយក៏ត្រូវមានជំនាញខាងគ្រប់គ្រងធនធានមនុស្ស ជំនាញក្នុងការគ្រប់គ្រងហិរញ្ញវត្ថុ ជំនាញក្នុងការចាត់ចែងអីទូទៅជាដើម» ។
លោកបានបន្តថា បើសិនអ្នកមានទុនអាចបង្កើតរោងចក្រផលិតស្វាយចន្ទីបាន ដូច្នេះទាមទារត្រូវមានចំនេះដឹងពីទីផ្សារស្វាយចន្ទីយ៉ាងម៉េច បច្ចេកទេសផលិត និងការវេចខ្ចប់យ៉ាងម៉េចធ្វើទីផ្សារយ៉ាងម៉េច គឺត្រូវតែច្បាស់លាស់ នោះទើបមិនផុងលុងនឹងការបរាជ័យ ៕
ចែករំលែកព័តមាននេះ