រាជធានីភ្នំពេញ ៖ ហាងម៉ាស្សា ស្ប៉ា កន្លែងហាត់ប្រាណ និងខារ៉ាអូខេ មួយចំនួន ត្រូវបានគេមើលឃើញថា បានលួចបើកអាជីវកម្មឡើងវិញស្ងាត់ៗ ខណៈបម្រាមបិទអាជីវកម្មទាំងអស់នោះ…
រាជធានីភ្នំពេញ ៖ ហាងម៉ាស្សា ស្ប៉ា កន្លែងហាត់ប្រាណ និងខារ៉ាអូខេ មួយចំនួន ត្រូវបានគេមើលឃើញថា បានលួចបើកអាជីវកម្មឡើងវិញស្ងាត់ៗ ខណៈបម្រាមបិទអាជីវកម្មទាំងអស់នោះ ក្នុងការទប់ស្កាត់ការរីករាលដាលជំងឺកូវីដ១៩ នៅមិនទាន់លើកលែងនោះឡើយ ។
ប្រភពព័ត៌មានបានអះអាងថា នៅភ្នំពេញ មានហាងម៉ាស្សា ស្ប៉ា និងកន្លែងហាត់ប្រាណខ្លះ បានបើកអាជីវកម្មឡើងវិញ ដូចនៅក្នុងខណ្ឌទួលគោក និងឬស្សីកែវជាដើម ។
ចំណែកនៅតាមបណ្តាលខេត្តខ្លះ សេវាកម្សាន្ត ដូចជា បៀហ្គាឌេន និងហាងខារ៉ាអូខេ បានបើកអាជីវកម្មបន្តបន្ទាប់ នៅក្នុងខណៈដែលការព្រួយបារម្ភ និងវិធានការការពាររបស់សមត្ថកិច្ច នៅមានជាធរមាននៅឡើយនោះ ។ ដើម្បីទប់ស្កាត់ការចម្លងរាលដាលជំងឺកូវីដ១៩ កាល ពីថ្ងៃទី១៧ ខែមីនា ឆ្នាំ២០២០ ក្រសួងសុខាភិបាលាបានប្រកាសបិទហាងខារ៉ាអូខេនៅទូទាំងប្រទេស ។ លុះមកដល់ដើមខែមេសា គឺថ្ងៃ៧ មេសា ឆ្នាំ២០២០ ក្រសួងទេសចរណ៍បានប្រកាសបិទហាងម៉ាស្សា និងស្ប៉ាទៀត ។
មន្ត្រីសុខាភិបាលបានធ្លាប់ធ្វើការពន្យល់ថា កន្លែងប្រមូលម្តុំមនុស្សច្រើន ជាពិសេសនៅកន្លែងបិទជិតតូចចង្អៀត ប្រើម៉ាស៊ីនត្រជាក់ ដូចជា បន្ទប់ខារ៉ាអូខេជាដើម ជាកន្លែងមានហានិភ័យខ្ពស់ណាស់ ក្នុងការចម្លងជំងឺកូវីដ១៩ ។
លោកស្រី ឱ វណ្ណឌីន អ្នកនាំពាក្យ និងជារដ្ឋលេខាធិការក្រសួងសុខាភិបាលបានលើកឡើងថា បន្ទប់ខារ៉ាអូខេ ដែលមានសម្ភារៈជាក្រណាត់ដូចជា កម្រាល សាឡុង កម្រាលឥដ្ឋ គឺប្រភពឲ្យមេរោគកូវីដ១៩ រស់នៅបានស្រួល និងងាយចម្លងទៅអ្នកដទៃ ប្រសិនមនុស្សនៅក្នុងបន្ទប់នោះមានផ្ទុកជំងឺកូវីដ១៩ ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាថា លោកនឹងសរសសរលិខិតទៅអាជ្ញាធរខេត្តទូទាំងប្រទសឲ្យពិនិត្យពង្រឹងសុវត្ថិភាពក្នុងការទប់ស្កាត់បង្ការការរីករាលដាលជំងឺកូវីដ១៩នេះ ពិសេសពិនិត្យលើសេវាកម្សាន្តនានាក្នុងមូលដ្ឋានខ្លួនឡើងវិញ ។
នៅព្រឹកថ្ងៃទី២២ ខែមិថុនា ឆ្នាំ២០២០ ពេលចុះពិនិត្យមន្ទីរពេទ្យអង្គដួង លោករដ្ឋមន្ត្រីបានមានប្រសាសន៍ថា «ខ្ញុំនឹងស្នើទៅអភិបាលរាជធានីខេត្តទាំងអស់ត្រូវត្រួតពិនិត្យអោយបានហ្មត់ចត់ និងមិនត្រូវអនុញ្ញាតអោយមានបើកសេវាកម្មការ៉ាអូខា និងកម្សាន្តនៅតាមមូលដ្ឋានរបស់ខ្លួនឡើយ ដោយរង់ចាំស្ថានភាពជំងឺកូវីដ២៩ មានភាពធូរស្បើយសិន ទើបអាចបើកឡើងវិញបាន» ។
ជុំវិញព័ត៌មានថា មានការលួចបើកដំណើរខ្លះៗនូវអាជីវកម្មខាងលើនេះ សម្រាប់រាជធានីភ្នំពេញ លោក ម៉េត មាសភក្តី អ្នកនាំពាក្យសាលារាជធានីភ្នំពេញ អះអាងមិនមានការលួចបើកសេវាកម្សាន្តណាមួយនោះឡើយ ៕ កែសម្រួលដោយ ៖សុឃាក់
ចែករំលែកព័តមាននេះ