រាជធានីភ្នំពេញ ៖ សមាគមរោចក្រកាត់ដេរនៅកម្ពុជា ហៅកាត់ថា GMAC នៅថ្ងៃទី២៣មិថុនានេះ បានស្នើទៅក្រសួងការងារបណ្តុះបណ្តាលវិជ្ជាជីវៈថា ការចរចាប្រាក់ឈ្នួលអប្បបរមាកម្មករកាត់ដេរ សម្រាប់ឆ្នាំ២០២១ គួរពន្យារពេលសិន ។
បើតាម GMAC វិស័យកាត់ដេរកំពុងមានបញ្ហាធ្ងន់ធ្ងរពីព្រោះជំងឺកូវីដ១៩ ដែលបានធ្វើឲ្យរោងចក្រជាច្រើនបានបិទទ្វារ និងព្យួរសកម្មភាពការងារ ហើយអ្នកបញ្ជាទិញមិនបានទូទាត់ប្រាក់ និងបញ្ជាទិញទំនិញជាថ្មី ដូច្នេះការចរចាប្រាក់ឈ្នួលគួរត្រូវពន្យារ ។
ក្រសួងការងារ និងបណ្តុះបណ្តាលវិជ្ជាជីវៈ កាលពីទី១០ ខែមិថុនា ឆ្នាំ២០២០បានចេញប្រតិទិនសម្រាប់ការចរចាប្រាក់ឈ្នួលកម្មករកាត់ដេរ និងផលិតលផលស្បែងជើងឆ្នាំ២០២០១ ។
តាមការវិភាគរបស់ការងារការ ការចរចានឹងចាប់ផ្តើមពីខែកក្កដា ខាងមុខនេះ ហើយលទ្ធផលយ៉ាងណានៃកាចរចានោះនឹងផ្តើមអនុវត្តចាប់ពីខែមករា ឆ្នាំ២០២១ ។
នៅក្នុងសេចក្តីថ្លែងការណ៍របស់សមាគមកាត់ដេរនៅកម្ពុជាដែលចេញផ្សាយ នៅថ្ងៃទី២៣ មិថុនានេះ លើកឡើងថា បច្ចុប្បន្ននេះមិនថា កម្ពុជា និងបណ្តាលប្រទេសនៅលើពិភពលោកនោះទេ កំពុងរងផលប៉ះពាល់យ៉ាងធ្ងន់ធ្ងរដោយសារការរីករាលដាលជាសកលនូវជំងឺកូវីដ១៩ ដែលបណ្តាលឲ្យវិស័យមួយចំនួន ជួបវិបត្តិជាច្រើន ដែលមិនអាចប៉ាន់ស្មានជាមុន ។
GMAC បានបន្តថា ចំពោះវិស័យវាយនភណ្ឌកាត់ដេរ និងផលិតផលស្បែកជើង រោងចក្រ សហគ្រាសជាច្រើនបានផ្អាកដំណើរការសកម្មភាពផលិតកម្មបណ្តោះអាសន្ន ខណៈមួយចំនួនទៀតបានសម្រេចចិត្តឈប់ដំណើរសកម្មភាពជាស្ថាពរតែម្តង ព្រោះអ្នកបញ្ជាទិញជាច្រើនបានលុបចោលការបញ្ជាទិញ និងបដិសេធមិនទទួលយកទំនិញដែលបានផលិតរួច ក៏ដូចជា មិនបានធ្វើការទូរទាត់ប្រាក់ដែលបានព្រមព្រៀងសម្រាប់ទំនិញដែលបានផលិត និងទទួលយករួច ដោយហេតុថា នៅមានបណ្តាហាងលើកទំនិញដុំ និងរាយនៅជុំវិញពិភពលោកបានបិទទ្វារស្ទើរតែអស់ ហើយតម្រូវការនៅក្នុងសកលលោកបានធ្លាក់ចុះយ៉ាងខ្លាំង ។
GMAC លើកឡើងថា ការធ្វើឲ្យប្រសើរឡើងវិញវិស័យកាត់ដេរទំនងត្រូវប្រើពេលយូរ ខណៈរោងចក្របានបិទទ្វារបានផ្អាកសកម្មភាព «ដូច្នេះការចរចាប្រាក់ឈ្នួលថ្មីសម្រាប់ឆ្នាំ២០២១ គួរត្រូវបានពន្យារ» ។
នៅពេលក្រសួងការងារបានចេញកាលវិភាគសម្រាប់ការចរចាប្រាក់ឈ្នួលគោលកម្មករកាត់ដេរសម្រាប់ឆ្នាំ២០២១នោះ ក្រុមសហជីពក៍មានភាពមិនច្បាស់លាស់ពីចំនួនទឹកប្រាក់ដែលគួរទាមទារ នៅក្នុងការចរចារនោះដែរ ។
តំណាងសហជីពមួយចំនួនលើកឡើងថា បញ្ហាកូវីដ១៩ បានធ្វើឲ្យជីវភាពកម្មករកាត់ដេរកាន់តែលំបាកនៅពេលពួកគេបាត់បង់ការងារ ឬការងារត្រូវបានព្យួរនោះ ។ សហជីពក៏ទទួលស្គាល់ថា ថៅកែរោងចក្រក៏មានការលំបាក ។ ឆ្នាំ២០២០នេះ ប្រាក់ខែគោលកម្មករកាត់ដេរ និងផលិតផលស្បែកជើងមានចំនួន១៩០ដុល្លារ ។
អ្នកព័ន្ធបានលើកឡើងថា តាមច្បាប់ការចរចាប្រាក់ឈ្នួលប្រចាំឆ្នាំអាចលើកពេលបាន ។ ប៉ុន្តែភ្លាមៗក្រោយពីមានការលើកឡើងរបស់ GMAC បែបនេះ ក្រសួងការងារបណ្តុះបណ្តាលវិជ្ជាជីវៈ មិនទាន់ឆ្លើយតបបែបណានោះទេ៕
ចែករំលែកព័តមាននេះ