រាជធានីភ្នំពេញ ៖ អគ្គនាយកដ្ឋានពន្ធនាគារ បើកកិច្ចប្រជុំបានបង្ហាញពីសកម្មភាពផែនការណ៍ដែលសម្រេចបានតាមការគ្រោងទុក ក្នុងនោះក៏មានការចង្អៀតណែននៅក្នុងពន្ធនាគារ ហើយត្រូវបានដោះស្រាយជាបន្តបន្ទាប់ ។
យោងតាមបណ្តាញសង្គមរបស់សម្តេច ស ខេង បានឲ្យដឹងនៅក្នុងកិច្ចប្រជុំឆ្លងផែនការ សកម្មភាពឆ្នាំ២០២០ របស់អគ្គនាយកដ្ឋានពន្ធនាគារ នៅទីស្ដីការក្រសួងមហាផ្ទៃនា ព្រឹកថ្ងៃទី២៣ ខែមិថុនា ឆ្នាំ២០២០ បានលើកឡើងថាផែនការសកម្មភាព ឆ្នាំ២០២០ របស់អគ្គនាយកដ្ឋានពន្ធនាគារបានរៀបចំឡើងដោយផ្អែកលើមូលដ្ឋានសំខាន់ៗ ដូចជា យុទ្ធសាស្ត្រចតុកោណរបស់រាជរដ្ឋាភិបាល ក្របខណ្ឌគោលនយោបាយកំណែទម្រង់ពន្ធនាគារ ផែនការយុទ្ធសាស្ត្រ ២០១៩-២០២៣ របស់អគ្គនាយកដ្ឋានពន្ធនាគារ និងអនុសាសន៍ណែនាំរបស់សម្ដេចក្រឡា ហោម ស ខេង ឧបកនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
ប្រភពបន្តថា ផែនការសកម្មភាពឆ្នាំ២០២០នេះ គឺជាផែនការសកម្មភាពឆ្នាំទី២ នៃការអនុវត្តផែន ការយុទ្ធសាស្ត្ររយៈពេល៥ឆ្នាំ របស់អគ្គនាយកដ្ឋានពន្ធនាគារ ក្នុងគោលបំណង លើកកម្ពស់ ការគ្រប់គ្រងជនជាប់ឃុំតាមជំនាញវិជ្ជាជីវៈ ធានាបានសន្តិសុខ សុវត្ថិភាព សុខភាព និងសមធម៌ ព្រមទាំងផ្ដល់កម្មវិធីអប់រំកែប្រែ ស្ដារនីតិសម្បទា បណ្ដុះបណ្ដាលវិជ្ជាជីវៈ និងសមហរណកម្ម ។
លោកឧត្តមសេនីយ៍ សន្ដិបណ្ឌិត ចាន់ គឹមសេង អគ្គនាយកនៃអគ្គនាយកដ្ឋានពន្ធនាគារក៏បានបង្ហាញការកត់សម្គាល់នូវចំណុចគន្លឹះ២ ដែលធានាឱ្យការអនុវត្តផែនការសកម្មភាពនេះសម្រេច បានតាមការគ្រោងទុក ទី១ គឺការងារហេដ្ឋារចនាសម្ព័ន្ធ ដែលជាដើមចមនៃការកើតមានភាពចង្អៀតណែន ក្នុងពន្ធនាគារ ជះឥទ្ធិពលអវិជ្ជមានលើការការពារសន្តិសុខ សុវត្ថិភាពពន្ធនាគារ ការងាររៀបចំឃុំឃាំង ការអប់រំកែប្រែ ស្ដារនីតិសម្បទា និងបណ្ដុះបណ្ដាលវិជ្ជាជីវៈ និងទី២ គឺស្ថានភាពក្របខណ្ឌមន្ត្រីពន្ធនាគារ ដែលចំនួនក្របខណ្ឌមន្ត្រីនៅមិនទាន់សមាមាត្រនឹងចំនួនអ្នកជាប់ឃុំ ។
សម្តេចក្រឡាហោម ស ខេង បានមានប្រសាសន៍ថា «ថ្វីត្បិតតែយើងមិនអាច អនុវត្តតាមផែនការសកម្មភាពបានទាំងស្រុង ប៉ុន្តែផែនការសកម្មភាពនេះចាត់ទុកជាផែនទីសម្រាប់បង្ហាញផ្លូវនាឆ្នាំបន្តបន្ទាប់ ហើយសម្រាប់បញ្ហាប្រឈមនានាយើងសង្ឃឹមថា អាចដោះស្រាយបាននៅឆ្នាំក្រោយ និងឆ្នាំបន្តបន្ទាប់ខាងមុខ» ។
សម្ដេចក្រឡាហោមក៏បានបន្ថែមថា អង្គភាពពាក់ព័ន្ធនានាកំពុងយកចិត្តទុកដាក់ ដើម្បីពង្រឹងរដ្ឋបាលសាធារណៈឲ្យមានសមត្ថភាពបំពេញការងារមាន ប្រសិទ្ធភាព ។ លើសពីនេះទៀត សម្ដេចក្រឡាហោម ស្នើឲ្យស្នើអង្គភាព និងអគ្គនាយកដ្ឋានពាក់ព័ន្ធឲ្យខិតខំប្រឹងប្រែងពង្រឹងគុណភាពអង្គភាព តាមរយៈគុណភាពមន្ត្រី ដោយប្រឹងប្រែង ពង្រឹងការអនុវត្តតួនាទី និងភារកិច្ចរបស់ខ្លួន ។
ជាងនេះទៀត សម្ដេចស ខេង ក៏បានកោតសរសើរចំពោះអគ្គនាយកដ្ឋានទាំងពីរ ដែលបានខិតខំប្រឹងប្រែងរៀបចំផែនការសកម្មភាពនេះឡើង ហើយអគ្គនាយកដ្ឋានពាក់ព័ន្ធផ្សេងទៀត ត្រូវខិតខំប្រឹងប្រែងរៀបចំ និងអនុវត្តផែនការសកម្មភាពប្រចាំឆ្នាំ២០២០របស់ ខ្លួនឲ្យមានប្រសិទ្ធភាពផងដែរ ។
នាឱកាសនោះ នាយឧត្តមសេនីយ៍ ប៉ោ ភក្តិ អគ្គលេខាធិការនៃអគ្គលេខាធិការដ្ឋាននៃក្រសួងមហាផ្ទៃបានលើកឡើងថា គោលបំណង និងគោលដៅនៃផែនការសកម្មភាព អគ្គលេខាធិការដ្ឋាន ផ្ដោតសំខាន់ទៅលើការរៀបចំកែសម្រួលរបៀបរបបការងារ ការកសាងហេដ្ឋារចនាសម្ព័ន្ធចាំបាច់ ដើម្បីធានាប្រសិទ្ធភាព និងចីរភាពនៃប្រព័ន្ធប្រតិបត្តិការ ពិសេសពាក់ព័ន្ធ និងវិស័យបច្ចេកវិទ្យាទូរគមនាគមន៍ និងព័ត៌មាន ការលើកកម្ពស់គុណភាព សមត្ថភាព និងក្រមសីលធម៌វិជ្ជាជីវៈរបស់មន្ត្រីរាជការ និងការលើកកម្ពស់ទំនាក់ទំនងក៏ដូចជា កិច្ច សហប្រតិបត្តិការរវាងគ្រប់ភាគីពាក់ព័ន្ធ ៕
ចែករំលែកព័តមាននេះ