ខេត្តកំពង់ឆ្នាំង ៖ អ្នករួមដំណើរជាជនជាតិចិនចំនួន៣នាក់ និងអ្នកបើកបរម្នាក់ជាជនជាតិខ្មែរ បានរងរបួសធ្ងន់និងស្រាល ក្នុងហេតុការណ៍គ្រោះថ្នាក់ចរាចរណ៍មួយបានកើតឡើងដោយរថយន្តមួយគ្រឿងម៉ាកឡិចស៊ីស RX300 សង្ស័យបើកវ៉ាជែងរថយន្តមួយគ្រឿងផ្សេងទៀត ក៏ជ្រុលទៅបង្គោលភ្លើង ។
ហេតុការណ៍ខាងលើនេះបានកើតឡើងកាលពីវេលាម៉ោង៣និង៣០នាទីឈានចូលព្រឹកថ្ងៃទី២១ ខែមិថុនា ឆ្នាំ២០២០ នៅតាមបណ្ដោយផ្លូវជាតិលេខ៥ ត្រង់ចំណុចមុខភោជនីយដ្ឋានលោកឪពុក ស្ថិតនៅក្នុងភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។
រថយន្តមួយគ្រឿងខាងលើម៉ាកឡិចស៊ីស RX 300 ពណ៌ស ពាក់ស្លាកលេខ ភ្នំពេញ 2AZ-9287 បើកបរដោយឈ្មោះឡុង សុភ័ស្ស ភេទប្រុស អាយុ២៧ឆ្នាំ ជាជនជាតិខ្មែរ មានទីលំនៅភូមិព្រៃបន្ទាយ ឃុំវ៉េយ៉ាល់ ស្រុកស្វាយជ្រំ ខេត្តស្វាយរៀង ចំណែកអ្នករួមដំណើរជាជនជាតិចិនចំនួន៣នាក់មិនស្គាល់អត្តសញ្ញាណ ។
សមត្ថកិច្ចនគរបាលបានឲ្យដឹងថា មុនពេលកើតហេតុ មានរថយន្តមួយគ្រឿងម៉ាកឡិចស៊ីស RX300 ជិះគ្នា៤នាក់ ធ្វើដំណើរក្នុងទិសដៅពីជើងទៅត្បូង ។ លុះមកដល់ចំណុចកើតហេតុ បានបើកវ៉ាជែងរថយន្តមួយគ្រឿងផ្សេងទៀតដោយមិនបានប្រុងប្រយ័ត្នក៏បានជ្រុលទៅបុកនឹងបង្គោលភ្លើង បណ្ដាលឱ្យអ្នករួមដំណើរទាំង៣នាក់ និងអ្នកបើកបរ បានរងរបួសធ្ងន់និងស្រាល ហើយត្រូវបានគេដឹកទៅសង្គ្រោះនៅឯមន្ទីរពេទ្យ។
ក្រោយពេលកើតហេតុ រថយន្តមួយគ្រឿងដែលរងការខូចខាតយ៉ាងដំណំខាងលើត្រូវបានសមត្ថកិច្ចអូសយកទៅរក្សាទុកដើម្បីរង់ចាំការដោះស្រាយតាមនីតិវិធី៕ (កែសម្រួលដោយ ៖ ធីតា)
ចែករំលែកព័តមាននេះ