ចិន ៖ តាមប្រភពព័ត៌មាន Shanghaiist បានឱ្យដឹងថា ស្ត្រីចំណាស់ម្នាក់ដែលមានការប្តេជ្ញាចិត្តខ្ពស់ក្នុងការជិះឡានក្រុងឱ្យបាន ដោយស្ត្រីរូបនេះបានយកខ្លួនបុកចូលតាមមាត់បង្អួចរបស់ឡានក្រុងសាធារណៈ រួចអង្គុយធ្វើមិនដឹងតែម្តង ក្រោយពីប្រកែកមិនព្រមបង្ហាញប័ណ្ណសុខភាពឱ្យបុគ្គលិកឡានក្រុងពិនិត្យ។ ជាលទ្ធផល គាត់មិនបានជិះឡានក្រុងទេ តែបានជិះឡានប៉ូលីសទៅវិញ។
រូបភាពគួរឱ្យអស់សំណើចតាំងពីដើមខែនេះ នៅក្នុងរដ្ឋធានី Heilongjiang នៃខេត្ត Harbin បង្ហាញពីស្ត្រីចំណាស់ម្នាក់ បានឈ្លោះប្រកែកជាមួយអ្នកបើកបរឡានក្រុង ហើយសម្រុកចូលតាមមាត់បង្អួចឡានក្រុង ព្រោះតែគេហាមគាត់មិនឱ្យចូលជិះ។ មូលហេតុ គឺមកពីរូបគាត់មិនព្រមឱ្យគេពិនិត្យប័ណ្ណសុខភាព។
គាត់មិនត្រឹមតែមិនឱ្យគេពិនិត្យប័ណ្ឌសុខភាពតែប៉ុណ្ណោះទេ តែគាត់បានហាមមិនឱ្យឡានក្រុងចេញទៅណាថែមទៀត ដោយតោងជាប់នឹងទ្វារឡាន។ ដោយសារតែទាល់ច្រកហើយ គាត់ក៏បានសម្រេចចិត្តបើកបង្អួចលោតចូល ហើយអង្គុយក្នុងឡានក្រុងធ្វើមិនដឹង។ ស្របពេលនោះតៃកុងឡានក្រុងបានស្រែកថា៖ «ប្រសិនបើអ៊ីឯងដួល គ្មាននរណាគេជួយទេ។ ដឹងដែរអត់ហ្នឹងអ៊ី?»។
បន្ទាប់មកតៃកុងឡានក្រុងមិនព្រមបើកទៅមុខនោះទេ តែបានសម្រេចចិត្តទូរស័ព្ទហៅប៉ូលីសមកជួយដោះស្រាយ និងដឹកស្ត្រីបង្កបញ្ហារូបនេះទៅស្ថានីយប៉ូលីសតែប៉ុណ្ណោះ៕ ដកស្រង់ចេញពីវេបសាយ ៖ shanghaiist (មានវីដេអូ)
ចែករំលែកព័តមាននេះ