រាជធានីភ្នំពេញ ៖ តារាសម្តែងស្រស់ស្អាតកញ្ញា ឆាត នីតា បានសារភាពថា ខ្លួនពិតជាមានបុរសម្នាក់នៅក្នុងចិត្តរួចហើយ ប៉ុន្តែនាងបដិសេធមិនទាន់ហ៊ានបញ្ចេញអត្តសញ្ញាណពីបុរសរូបនេះឡើយ ដោយសារតែនាងត្រូវចំណាយពេលមើលចិត្តពីគ្នាទៅវិញមកមួយរយៈទៀតសិន។
ការលើកឡើងខាងលើពីស្រីស្អាតរូបនេះ បានធ្វើឡើងស្របគ្នាដែលនាងកំពុងមមាញឹកនៅក្នុងការថតរឿងភាគថ្មីមួយ ដែលត្រៀមនឹងចាក់បញ្ចាំងតាមទូរទស្សន៍នៅក្នុងពេលឆាប់ៗខាងមុខនេះ។
តារាសម្តែងជើងថ្មីកញ្ញា ឆាត នីតា បានអះអាងថា ដោយសារតែមមាញឹកនៅក្នុងការងារសិល្បៈច្រើននៅក្នុងមួយរយៈចុងក្រោយនេះ ទើបនាងមិនទាន់គិតដល់រឿងស្នេហា ប៉ុន្តែបច្ចុប្បន្ននាងក៏មានបុរសនៅក្នុងចិត្តម្នាក់រួចហើយដែរ តែនាងសុំលាក់សិន។ ដោយសារមិនបានបញ្ជាក់ពីរយៈពេលនៃការស្គាល់គ្នាជាមួយបុរសរូបនេះ ប៉ុន្តែស្រីស្រស់រូបនេះបាននិយាយដោយខ្លីថា បុរសដែលនាងកំពុងសម្លឹងឃើញនេះ គឺជាបុរសធ្វើការងារ និងរកស៊ីធម្មតា ពោលគឺមិនមែនជាអ្នកក្រៅស្រុក ឬអ្នកសិល្បៈដូចគ្នាឡើយ។
ទោះជាយ៉ាងណា ឆាយ នីតា បានអះអាងថា បើទោះបីជានាងមិនចង់បង្ហាញអត្តសញ្ញាណបុរសនោះក៏ដោយ ប៉ុន្តែទស្សនិកជនអាចនឹងឃើញមុខមាត់បាននៅក្នុងអំឡុងពេលណាមួយដែលនាង និងបុរសរូបនោះសម្រេចដឹកដៃគ្នាចូលរោងការជាផ្លូវការ។
គួររំលឹកថា តារាសម្តែង ឆាយ នីតា គឺជាអតីតជ័យលាភីលេខ៣ ក្នុងកម្មវិធី Miss Cambodia 2016។ ក្រោយមកនាងបានធ្វើជាតារាម៉ូដែល ហើយចុងក្រោយបានវិវត្តន៍មកជាតារាសម្ដែងទៀត ដោយសារនាងបានលេចមុខដំបូងក្នុងរឿង «កុំងាកក្រោយ» ក្នុងតំណែងជាតួឯកតែម្ដង។ បន្តបន្ទាប់នាងក៏បានមានវត្តមានក្នុងភាពយន្តខ្នាតធំ និងភាពយន្តភាគទូរទស្សន៍បន្ត ដោយពេលនេះ នាងកំពុងសម្ដែងក្នុងរឿង «ចំណងអាពាហ៍ពិពាហ៍» ក្នុងតំណែងជាតួឯកផងដែរ។
ឆាយ នីតា មានវ័យ២៤ឆ្នាំ ជាអ្នករស់នៅភ្នំពេញ នាងកើតក្នុងគ្រួសារដែលមានឪពុកជាគ្រូបង្រៀន និងម្ដាយជាអាជីវករ ព្រមទាំងមានបងប្អូនទាំងអស់៦នាក់ (ក្នុងនោះ ស្រី៤ ប្រុស២) ហើយនាងជាកូនទី៤ ក្នុងចំណោមបងប្អូនទាំងអស់ (ហើយក៏ជាកូនស្រីពៅក្នុងចំណោមបងប្អូនស្រីផងដែរ)។
ដោយសារមានឪពុកជាគ្រូបង្រៀន បានត្រួសត្រាយផ្លូវឲ្យកូនស្ទើរទាំងអស់ក្លាយជាគ្រូបង្រៀន រួមបញ្ចូលទាំង នីតា ផងដែរ។ តាមរយៈសមិទ្ធផលនៃការសម្តែងជាបន្តបន្ទាប់ខាងលើនេះ តារារូបនេះបានសម្តែងក្ដីសង្ឃឹមថា ទស្សនិកជនជាច្រើនទៀត នឹងបានស្គាល់នាង ក៏ដូចជាជួយឲ្យប្រជាប្រិយភាពនាងកាន់តែខ្ពស់នៅក្នុងពេលខាងមុខ៕ (កែសម្រួលដោយ ៖ បុប្ផា)
ចែករំលែកព័តមាននេះ