រាជធានីភ្នំពេញ ៖ រដ្ឋមន្ត្រីការបរទេស និងសហប្រតិបត្តិការអន្តរជាតិ បានធ្វើការចុះហត្ថលេខា នៅថ្ងៃទី២៣ ខែមិថុនា ឆ្នាំ២០២០ នៅទីស្តីការក្រសួងលើកិច្ចព្រមព្រៀងស្តីពីគម្រោងកិច្ចសហប្រតិបត្តិការ សម្រាប់មូលនិធិពិសេសកិច្ចសហប្រតិបត្តិការមេគង្គ-ឡានឆាង…
រាជធានីភ្នំពេញ ៖ រដ្ឋមន្ត្រីការបរទេស និងសហប្រតិបត្តិការអន្តរជាតិ បានធ្វើការចុះហត្ថលេខា នៅថ្ងៃទី២៣ ខែមិថុនា ឆ្នាំ២០២០ នៅទីស្តីការក្រសួងលើកិច្ចព្រមព្រៀងស្តីពីគម្រោងកិច្ចសហប្រតិបត្តិការ សម្រាប់មូលនិធិពិសេសកិច្ចសហប្រតិបត្តិការមេគង្គ-ឡានឆាង ២០២០ ប្រទេសកម្ពុជា ដែលក្នុងនោះគឺ ទទួលបានថវិកាសរុបចំនួនប្រមាណជាង៧លានដុល្លារអាមេរិក សម្រាប់គម្រោងថ្មីចំនួន២០បន្ថែមទៀត ពីរដ្ឋាភិបាលសាធារណរដ្ឋប្រជាមានិតចិន ។
ក្នុងពិធីចុះហត្ថលេខានេះត្រូវបានអញ្ជើញចូលរួមដោយ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិជាមួយ លោកឯកអគ្គរដ្ឋទូត វ៉ាង វិនធាន នៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា ។
ថ្លែងក្នុងឱកាសនោះលោក ប្រាក់ សុខុន បាននិយាយថា «មូលនិធិពិសេសនៃកិច្ចសហប្រតិបត្តិការមេគង្គ-ឡានឆាងនេះបានធ្វើឡើងតាំងពីឆ្នាំ២០១៦ មកម្ល៉េះ គម្រោងទាំងនេះបានរួមចំណែកក្នុងការលើកកម្ពស់ការអភិវឌ្ឍសេដ្ឋកិច្ច សង្គមរបស់បណ្តាប្រទេសមេគង្គឡានឆាង តាមរយៈការបង្រួមគម្លាតនៃការអភិវឌ្ឍ ការពង្រឹងទំនុកចិត្តនិងការយោគយល់គ្នាទៅវិញទៅមក និងការពង្រឹងសមត្ថភាពរបស់យើងក្នុងការឆ្លើយតបឱ្យកាន់តែប្រសើរឡើង ទៅនឹងតម្រូវការរបស់ប្រជាជនយើង» ។
លោកបានបន្តថា «សម្រាប់គម្រោងថ្មីចំនួន២០បន្ថែមទៀតនេះនឹងបន្តរួមចំណែកដល់កិច្ចសហប្រតិបត្តិការក្នុងវិស័យអភិវឌ្ឍន៍ជនបទ ធនធានទឹក កសិកម្ម ការតភ្ជាប់ផ្លូវអាកាស អប់រំ បេតិកភណ្ឌវប្បធម៌ ជាដើម» ។
លោកបានបន្ថែមថា ប្រទេសកម្ពុជាបានទទួលរងផលប៉ះពាល់យ៉ាងធ្ងន់ធ្ងរពីវិបត្ដិកូវីដ-១៩ ហើយប្រទេសចិនបានចាត់ទុកប្រទេសកម្ពុជាជាអាទិភាពចម្បងក្នុងការចូលរួមចំណែកគ្រប់គ្រងការរីករាលដាលនៃជំងឺដ៏កាចសាហាវនេះ និងកាត់បន្ថយផលប៉ះពាល់សេដ្ឋកិច្ច-សង្គម ។
លោកបានបន្ថែមទៀតថា «គ្រឿងបរិក្ខារប្រឆាំងនឹងជំងឺរាតត្បាត និងអ្នកជំនាញវេជ្ជសាស្ត្រ ត្រូវបានបញ្ជូនយ៉ាងឆាប់រហ័ស ដើម្បីជួយដល់កិច្ចខិតខំប្រឹងប្រែងរបស់កម្ពុជា ហើយនាវាដឹកជញ្ជូនត្រូវបានចាត់ចែងជាពិសេស ដើម្បីធានានូវលំហូរនៃវត្ថុធាតុដើម សម្រាប់ផលិតកម្មឧស្សាហកម្មរបស់យើង» ។
លោកក៏បានរំលឹកឡើងវិញថា កាលពីខែកុម្ភៈ ឆ្នាំ២០១៩ លោកបានចុះហត្ថលេខាជាមួយ លោក វ៉ាង វិនធាន សម្រាប់គម្រោងចំនួន១៩ របស់កម្ពុជា ដែលគាំទ្រដោយមូលនិធិពិសេសកិច្ចសហប្រតិបត្តិការមេគង្គ-ឡានឆាងឆ្នាំ២០១៨ ។ គម្រោងទាំងនេះត្រូវបានអនុវត្តប្រកបដោយវឌ្ឍនភាពគួរឱ្យកត់សម្គាល់ ហើយបានបង្កើតនូវសមិទ្ធផលរូបីជាច្រើនក្នុងការលើកកម្ពស់ជីវភាព និងសុខុមាលភាពរបស់ប្រជាជនកម្ពុជា ៕
ចែករំលែកព័តមាននេះ