រាជធានីភ្នំពេញ ៖ មន្ត្រីក្រសួងបរិស្ថាន បានឱ្យនៅថ្ងៃទី២៣ ខែមិថុនា ឆ្នាំ ២០២០ នេះថា រហូតមកទល់នឹងឆ្នាំ២០២០នេះ ប្រទេសកម្ពុជាបានលក់ឥណទានកាបូន ក្នុងទីផ្សារស្ម័គ្រចិត្តបានថវិកាចំនួន១១,៦ លានដុល្លារសហរដ្ឋអាមេរិកពីក្រុមហ៊ុន Disney ក្រុមហ៊ុន Shell និងក្រុមហ៊ុន Gucci ។
លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានប្រសារព័ត៌មានកោះសន្តិភាព នៅថ្ងៃទី២៣ មិថុនានេះថា «មកទល់បច្ចុប្បន្ននេះ រាជរដ្ឋាភិបាលបានបង្កើនផ្ទៃដីតំបន់ការពារធម្មជាតិដែលស្ថិតនៅក្រោមយុត្តាធិការរបស់ក្រសួងបរិស្ថានរហូតដល់ប្រមាណ ៤១ភាគរយនៃផ្ទៃដីប្រទេសកម្ពុជា គឺស្មើនឹងប្រមាណ៧,៣ លាន ហិកតាដែលក្នុងនោះមានឧទ្យានជាតិ ដែនជម្រកសត្វព្រៃ តំបន់ប្រើប្រាស់ច្រើនយ៉ាង តំបន់រ៉ាមសារ តំបន់ការពារបេតិកភណ្ឌធម្មជាតិ និងរបៀងអភិរក្សជីវៈចម្រុះសរុបចំនួន ៦៩កន្លែង និងមានមន្ត្រីឧទ្យានុរក្សចំនួន ១២៦០ នាក់ ដោយសហការជាមួយសហគមន៍តំបន់ការពារធម្មជាតិ និងអង្គការដៃគូនានាបាន និងកំពុងឈរជើងការពារ» ។
កម្ពុជាបានលក់ឥណទានកាបូន ដំបូងនៅឆ្នាំ ២០១៦ ។ នេះបើតាមលោក នេត្រ ភ័ក្ត្រា ។ ក្នុងប្រទេសកម្ពុជា ព្រៃឈើគ្របដណ្តប់ប្រមាណ ៥០ភាគរយ នៃផ្ទៃប្រទេសដែលជាអត្រាខ្ពស់បំផុតនៅក្នុងតំបន់អាស៊ីអាគ្នេយ៍ ។ ហើយមានតែប្រទេសកម្ពុជា និងប្រទេសឥណ្ឌូនេស៊ីប៉ុណ្ណោះ ក្នុងចំណោមប្រទេសអាស៊ាន ដែលបានលក់ឥណទានកាបូនក្នុងទីផ្សារកាបូនស្ម័គ្រចិត្តនេះ ។
លោកបានគូសបញ្ជាក់ថា ជាទីតាំងមួយ ក្នុងចំណោមទីតាំង៣ ដែលកម្ពុជាលក់កាបូនបាន ក្នុងនោះក៏មានដែនជម្រកសត្វព្រៃកែវសីមា និងឧទ្យានជាតិជួរភ្នំក្រវ៉ាញខាងត្បូង ។
លោកនេត្រ ភក្ត្រា បន្តថា «រាជរដ្ឋាភិបាលកម្ពុជាតាមរយៈក្រសួងបរិស្ថានតាមរយៈការលក់ឥណទានកាបូន ក្នុងទីផ្សារកាបូនស្ម័គ្រចិត្ត ថវិកាដែលបានមកទាំងនោះ ត្រូវបានយកទៅប្រើប្រាស់សម្រាប់គាំពារលើការងារអភិរក្ស និងការបង្កើតសេដ្ឋកិច្ចសម្រាប់ប្រជាសហគមន៍តំបន់ ការពារធម្មជាតិនៅក្នុងតំបន់នោះ ។ ទន្ទឹមនឹងនេះក្រុមមន្ត្រីជំនាញកំពុងសិក្សាបន្ថែម ដើម្បីលក់កាបូនក្នុងដែនជម្រកសត្វព្រៃព្រៃឡង់ ក្នុងភូមិសាស្ត្រខេត្តស្ទឹងត្រែងផងដែរ» ។
ប្រទេសកម្ពុជាបាន និងកំពុងស្វះស្វែងរកដៃគូផ្សេងៗទៀត ដើម្បីបន្តទិញឥណទានកាបូននេះបន្ថែមទៀត ខណៈកាបូនដែលបានបំភាយចេញពីព្រៃឈើនៅតាមតំបន់ការពារធម្មជាតិនានាដែលកម្ពុជាមាន នៅសេសសល់បរិមាណច្រើន ។ ហើយប្រទេសកម្ពុជាសង្ឃឹមថា នឹងអាចលក់ឥណទានកាបូន នបន្ថែមទៀតក្នុងឆ្នាំបន្តបន្ទាប់ ៕
ចែករំលែកព័តមាននេះ