រាជធានីភ្នំពេញ ៖ ស្របពេលដែលការផ្តល់ប្រាក់ឧបត្ថម្ភពលក្រីក្រីដែលងាយរងគ្រោះដោយសារជំងឺកូវីដ១៩ កាន់តែខិតជិតមកដល់ រដ្ឋមន្ត្រីក្រសួងផែនការ លោក ឆាយ ថន បានអំពាវនាវឲ្យអាជ្ញាធរបិទផ្សាយបញ្ជីឈ្មោះពលរដ្ឋដែលមានប័ណ្ណសមធម៌ និងបានសំណូមពរឲ្យពលរដ្ឋទៅផ្ទៀងផ្ទាត់ឈ្មោះនៅតាមសាលាឃុំ សង្កាត់ ដើម្បីទទួលបានប្រាក់ពីរដ្ឋាភិបាលក្នុងពេលឆាប់ៗនេះ ។
លោករដ្ឋមន្ត្រីបានមានប្រសាសន៍បញ្ជាក់ថា «គ្រួសារពលរដ្ឋក្រីក្រដែលមានប័ណ្ណសមធម៌មានសុពលភាព និងប័ណ្ណសមធម៌ ដែលទើបផ្តល់ជូននាពេលនេះ ទៅផ្ទៀងផ្ទាត់ និងចុះឈ្មោះនៅសាលាឃុំ សង្កាត់ ដើម្បីទទួលបានប្រាក់ឧបត្ថម្ភពីរាជរដ្ឋាភិបាលក្នុងអំឡុងពេលកូវីដ-១៩» ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី២២ មិថុនា ម្សិលមិញ បានប្រកាសថា រដ្ឋាភិបាលនឹងចំណាយថវិការដ្ឋប្រមាណ២៥លានដុល្លារក្នុងមួយខែៗ ដើម្បីជួយដល់ជីវភាពពលរដ្ឋជាង ៦០ម៉ឺនគ្រួសារ អំឡុងវិបត្តិជំងឺកូវីដ១៩នេះ ។ អនុក្រិត្យស្តីពីការអនុវត្តកម្មវិធីឧបត្ថម្ភប្រាក់ដល់ពលរដ្ឋក្រីក្រ បញ្ជាក់ថា ពលរដ្ឋដែលមានប័ណ្ណសមធម៌ និងទទួលបានប្រាក់ឧបត្ថម្ភពីរដ្ឋចន្លោះពី១៦ ០០០ រៀលទៅ ១២០ ០០០រៀលក្នុងមួយខែ តាមប្រភេទក្រ ដែលមានក្រ១និងក្រ២ ។
សម្តេចនឹងប្រកាសកម្មវិធីផ្តល់ប្រាក់ដល់ពលរដ្ឋក្រីក្រជាផ្លូវការ នៅថ្ងៃទី២៤ មិថុនាស្អែកនេះ ។
នៅក្នុងពិធីសំណេះសំណាលជាមួយពលរដ្ឋនៅខេត្តតាកែវ ចុងសប្តាហ៍មុនលោកឆាយ ថន បានប្រាប់ពលរដ្ឋថា ប្រសិនជាប្រជាជនក្រីក្រ មិនបានយកប័ណ្ណសមធម៌ទៅចុះឈ្មោះនៅសាលាឃុំ សង្កាត់ នឹងមិនទទួលបានប្រាក់ឧបត្ថម្ភទេ ។
ចំពោះប្រជាជនក្រីក្រដែលបានសម្ភាស និងកំណត់ជាគ្រួសារក្រីក្រក្រោយ ថ្ងៃទី១ ខែមិថុនា ឆ្នាំ២០២០ នឹងត្រូវទួលបានសមធម៌ និងប្រាក់ឧបត្ថម្ភនៅពេលបន្ទាប់ ។ លោកអះអាងថា «ជាគោលការណ៍រាជរដ្ឋាភិបាលមិនបោះបង់ចោលនរណាម្នាក់ឱ្យនៅឯការនោះទេ » ៕
ចែករំលែកព័តមាននេះ