កូរ៉េ ៖ ជាករណីមួយដែលស្មុគស្មាញជុំវិញរឿងរ៉ាវរបស់ប្អូនស្រី មករា ដែលកំពុងរស់នៅប្រទេសកូរ៉េ តែនាងកំពុងប្រឈមមុខធ្ងន់ធ្ងរ ដើម្បីរកលុយសម្រាប់ការបង់ផាកពិន័យក្នុងទឹកប្រាក់ជិត ២ ម៉ឺនដុល្លារសហរដ្ឋអាមេរិក ដែលជាសងការពិន័យទៅលើច្បាប់អន្តោរប្រវេសន៍នៅកូរ៉េ សម្រាប់ការរស់នៅខុសច្បាប់ អស់រយៈពេលប្រមាណ៥ឆ្នាំ នៅទឹកដីកូរ៉េ ។
អ្វីដែលកាន់តែពិបាកសម្រាប់ស្ត្រីខ្មែររូបនេះ គឺពេលនេះនាងត្រូវតតាំងក្តីក្តាំងជាមួយអតីតប្តីជាជនជាតិកូរ៉េផង ហើយត្រូវស្វះស្វែងរកជំនួយពីស្ថានទូតខ្មែរប្រចាំនៅប្រទេសកូរ៉េខាងត្បូង ដើម្បីទទួលយកសេវាធ្វើលិខិតបើកផ្លូវ និងផ្ទេរសិទ្ធអោយគេជួយយកកូនៗមកស្រុកខ្មែរវិញ ដើម្បីខ្លួននាងអាចបន្តធ្វើការនៅកូរ៉េ រកលុយដោះស្រាយបញ្ហាដែលកំពុងកើតមានរុំកោះនោះ ។
បើតាមការឲ្យដឹងរបស់លោក ឡុង ឌីម៉ង់ ឯកអគ្គរាជទូតខ្មែរប្រចាំនៅប្រទេសកូរ៉េខាងត្បូងបានឲ្យដឹងថា ប្រវត្តិរឿងរ៉ាវរបស់ប្អូនស្រី មករា គឺវែងឆ្ងាយ និងស្មុគស្មាញខ្លាំង ដោយដំបូងឡើយគាត់បានរៀបការជាមួយប្តីជាជនជាតិកូរ៉េ និងបានរស់នៅប្រទសកូរ៉េ១០ឆ្នាំហើយ ។
អំឡុងពេលរស់នៅកូរ៉េ ដោយសារតែភាពមិនចុះសម្រុងនឹងគ្រួសារ នាងបានចាកចេញពីផ្ទះបុរសជាប្តីជនជាតិកូរ៉េ ហើយមានកូន២នាក់ជាមួយប្តីជាជនជាតិកូរ៉េ តែអ្វីដែលកាន់តែពិបាកបំផុតនោះ គឺទោះបីជានាងបានរស់នៅកូរ៉េយូរឆ្នាំក៏ពិតមែន តែនាងមិនទាន់បានទទួលសញ្ជាតិកូរ៉េសម្រាប់ការរស់នៅស្របច្បាប់នៅកូរ៉េឡើយ ។
ក្រោយបែកបាក់ប្តីជាជនជាតិកូរ៉េ គាត់ក៏ស្រលាញ់គ្នាជាមួយពលករខ្មែរបម្រើការងារនៅកូរ៉េ ហើយក៏មានកូនជាមួយគ្នា ។ ក៏ប៉ុន្តែយោងតាមច្បាប់នៅកូរ៉េ ក៏ដូចជា កិច្ចសន្យាការងារ គឺពលករបម្រើការងារនៅកូរ៉េ កាន់វីសារប្រភេទ E9 (ដែលមានថេរវេលា៤ឆ្នាំ ១០ខែ) គឺមិនត្រូវបានអនុញ្ញាតិ ឬមានសិទ្ធមានកូនបានទេ ។ តែបើសិនជាជ្រុលមានកូន អ៊ីចឹងកូននោះមិនអាចរស់ជាអចិន្ត្រៃយ៍នៅប្រទេសកូរ៉េបានទេ ដូច្នេះនៅពេលក្មេងធំធាត់ដល់វ័យត្រូវធ្វើអត្តសញ្ញាបណ្ណ គឺដាច់ខាត ឪពុក-ម្តាយដែលជាពលករជាប់ធ្វើការនៅកូរ៉េ ត្រូវតែរកសេវាធ្វើលិខិតបើកផ្លូវ និងផ្ទេរសិទ្ធិអោយគេជួយយកកូនទៅកម្ពុជា ។
លោក ឡុង ឌីម៉ង់ បានមានប្រសាសន៍បញ្ជាក់ថា «គឺកិច្ចសន្យាការងារគេបានកំណត់អ៊ីចឹងតែម្តង គឺមិនអោយមានកូនបានទេ តែបើជ្រុលជាមានហើយ កូនហ្នឹង គឺមិនអាចនៅកូរ៉េបានទេ បើទុកឲ្យនៅកូរ៉េកូនហ្នឹងនឹងក្លាយជាខុសច្បាប់ ។ បើខុសច្បាប់អត់ក្រដាស់ស្នាមទាំងក្មេងមិនទាន់ដឹងក្តី គឺមិនល្អទេ ។ អ៊ីចឹង បានជាយើងតែងតែផ្សព្វផ្សាយឲ្យបងប្អូនខ្មែរយើងឲ្យបានដឹង» ។
លោកបានបន្តថា ករណីប្អូនស្រី មករា ជាករណីស្មុគស្មាញដោយសារតែគាត់បានរត់ចេញពីផ្ទះមុនមានសាលក្រមលែងលៈប្តីកូរ៉េ អញ្ចឹងអតីតប្តីកូរ៉េបានប្តឹងធ្វើឲ្យគាត់ត្រូវរស់នៅខុសច្បាប់ប្រមាណ៥ឆ្នាំ ដែលការរស់នៅខុសច្បាប់ប្រមាណ ៥ឆ្នាំនាំឲ្យប្អូនស្រី កំពុងប្រឈមមុខនឹងការពិន័យទៅតាម ច្បាប់អន្តោរប្រវេសន៍កូរ៉េ ប្រមាណជិត២ ម៉ឺនដុល្លារ ។
លោកបានបន្តថា ប្អូនស្រីមករា បានមកកាន់ស្ថានទូតជួបរូបលោក «ដើម្បីមកទទួលសេវាធ្វើលិខិតបើកផ្លូវ និងផ្ទេរសិទ្ធិអោយគេជួយយកកូនទៅកម្ពុជា ដើម្បីខ្លួនបានបន្តនៅធ្វើការនៅកូរ៉េ រកថវិកាជួយដោះស្រាយបញ្ហាលំបាករបស់ខ្លួន។ រឿងរ៉ាវរបស់គាត់វែងឆ្ងាយណាស់ តែជាដំណោះស្រាយស្ថានទូតបានជួយសម្រួលរៀបឯកសារជូនគាត់ » ។
លោកឡុង ឌីម៉ង់ បានឲ្យដឹងហើយ សម្រាប់ពលករខ្មែរដែលជ្រុលជាមានកូនដាច់ខាតត្រូវធ្វើលិខិតផ្ទេរសិទ្ធ ពឹងពាក់អ្នកណាដែលគាត់ស្គាល់ធ្វើដំណើរមកខ្មែរ យកកូនមករបស់គាត់មកឲ្យសាច់ញាតិចិញ្ចឹមបីបាច់នៅស្រុកខ្មែរវិញ ។ លោកឯកអគ្គរាជទូតបានបន្តថា «បើសិនជាគាត់ (ករណីប្អូនស្រីមករា) សងការពិន័យទៅលើច្បាប់អន្តោរប្រវេសន៍ហើយ គឺគាត់អាចសុំសិទ្ធ ឬអាចរកមេធាវីស្ថានទូតជួយគាត់បន្ថែមទៀត ដើម្បីធ្វើឯកសារឲ្យគាត់មានសិទ្ធរស់នៅស្របច្បាប់ឡើងវិញ ក្រោយពីគាត់ទូទាត់តាមច្បាប់អន្តោរប្រវេសន៍របស់ កូរ៉េសិន »។
យ៉ាងណាមិញ ករណីស្ត្រីខ្មែររូបនេះកំពុងជួបការលំបាកខ្លាំងដោយសារតែគាត់រកចំណូលបានត្រឹមជាង ៧០០ ដុល្លារក្នុងមួយខែ ខណៈគូស្នេហ៍ដែលជាពលករខ្មែរនោះក៏កំពុងបម្រើការងារខុសច្បាប់នៅកូរ៉េផងដែរ ។
លោក ឡុង ឌឺម៉ង់ បានបន្តថា «ខ្ញុំជឿថានៅមានករណីកម្សត់បែបនេះទៀតនៅកូរ៉េសម្រាប់នារីខ្មែរ។ សូមបងប្អូនណាដែលដឹង ជួយភ្ជាប់ទំនាក់ទំនងមកឱ្យស្ថានទូតផង» ។ ដោយក្តីអាណិតអាសូរ លោកទូតបានឲ្យដឹងថា តែជាដំណោះស្រាយស្ថានទូតបានជួយសម្រួលរៀបឯកសារជូនគាត់ ផ្តល់សំភារ:សម្រាប់ទារកអាយុ៦ខែ និងថវិកាមួយចំនួនដោះស្រាយបញ្ហាចំពោះមុខ។
សង្ឃឹមថាអ្វីៗនឹងប្រសើរឡើង ហើយជូនពរក្មួយបានទៅដល់កម្ពុជាដោយសុវត្ថិភាព ។ លោកទូតបានបន្តថានេះមិនមែនជាករណីដំបូងទេ គឺកើតជាប្រចាំដែលខាងស្ថានទូតតែងតែបានជួយសម្រួលច្រើនករណីហើយដែលពលករខ្មែរកាន់វីសារ E9 បង្កើតកូននៅកូរ៉េ ហើយសុំខាងទូតសម្រួលសេវាធ្វើលិខិតបើកផ្លូវ និងផ្ទេរសិទ្ធិអោយគេជួយយកកូនមកកាន់ទឹកដីកម្ពុជាវិញ ៕
ចែករំលែកព័តមាននេះ