អន្តរជាតិ ៖ កំណត់ត្រាប្រដាល់មិនស្គាល់បរាជ័យរបស់ស្តេចប្រដាល់អាមេរិក Floyd Mayweather ត្រូវបានបំបែកបានដោយកីឡាករជនជាតិថៃ Wanheng Menayothin។
បើតាមការចុះផ្សាយពីគេហទំព័រ The Sun បានឱ្យដឹងថា Wanheng Menayothin ដែលមានរហស្សនាមថា «Dwarf Giant» បានប្រកាសចូលនិវត្តន៍ពីវិស័យកីឡាប្រដាល់សកលកាលពីថ្ងៃអាទិត្យកន្លងទៅ នៅក្នុងវ័យ៣៤ឆ្នាំជាមួយនឹងកំណត់ត្រាដ៏អស្ចារ្យ បន្ទាប់ពីឆ្លងកាត់ការប្រកួតចំនួន ៥៤ដងឈ្នះទាំងអស់។ ដោយបានបំបែកកំណត់ត្រាឈ្នះចំនួន ៥០ដងរបស់ Floyd Mayweather ដែលបានប្រកាសចូលនិវត្តន៍កាលពីឆ្នាំ២០១៧ ។
សូមរំលឹកជូនថា អ្នកប្រដាល់មាឌល្អិត Wanheng Menayothin បានក្លាយជាកីឡាករប្រដាល់សកលអាជីពក្នុងឆ្នាំ ២០០៧ ដោយបានឆ្លងកាត់ការប្រកួតថ្នាក់ជាតិ និងអន្តរជាតិជាច្រើន ព្រមទាំងបានឈ្នះខ្សែក្រវ៉ាត់ WBC minimumweight ក្នុងឆ្នាំ ២០១៤ ផងដែរ។
បុរសវ័យ ៣៤ ឆ្នាំរូបនេះបានប្រកាសពីការបញ្ចប់អាជីពរបស់ខ្លួន ដោយបានលើកឡើងថា ការសម្រេចក្នុងបញ្ចប់អាជីពរបស់រូបគេ ពុំមែនដោយរឿងប្រាក់នោះទេ គឺបញ្ហាសុខភាពរបស់គេផ្ទាល់តែម្តង៕ (ដកស្រង់ចេញពី The Sun)
ចែករំលែកព័តមាននេះ