រាជធានីភ្នំពេញ ៖ ក្រសួងអប់រំ យុវជន និងកីឡា បានអនុញ្ញាតឲ្យមជ្ឈមណ្ឌលជាតិហ្វឹកហ្វឺនកីឡា រៀបចំកម្មវិធីប្រមូលផ្ដុំជម្រើសជាតិក្រុមធំចំនួន៣៥ប្រភេទកីឡា ឡើងវិញនាដើមខែក្រោយនេះ ។ ការប្រមូលផ្ដុំធ្វើឡើងរយៈពេល៦ខែចាប់ពីថ្ងៃទី១ ខែកក្កដា រហូតដល់ថ្ងៃទី៣១ ខែធ្នូ ឆ្នាំ២០២០។
បើយោងតាមតារាងចំណត់ចំនួនអនុរក្ស គ្រូបង្វឹក គ្រូជំនួយ និងកីឡាករ-កីឡាការិនី ក្រុមជម្រើសជាតិដែលត្រូវប្រមូលផ្ដុំឡើងវិញនាដើមខែកក្កដា គឺមានក្រុមកីឡាជាតិ៣៥ប្រភេទកីឡា ស្មើនឹង៤៦៤នាក់ និងក្រុមកីឡាជនពិការចំនួន៥២នាក់ សរុប ៥១៦នាក់។
ជាមួយការត្រៀមចូលជំរំហ្វឹកហាត់ឡើងវិញនេះដែរ គឺធ្វើឡើងក្រោយ១ខែគត់ បន្ទាប់ពីក្រសួងអប់រំ អនុញ្ញាតឲ្យសព័ន្ធកីឡាជាតិ ធ្វើការប្រមូលផ្ដុំក្រុមជម្រើសជាតិថ្នាល កាលពីដើមខែមិថុនា ដែលអនុវត្តជាជំហានៗតាមការណែនាំរបស់រាជរដ្ឋាភិបាល និងក្រសួងសុខាភិបាល ដើម្បីចូលរួមការពារ និងទប់ស្កាត់រលកទី២ នៃជំងឺកូវីដ-១៩ ទោះបីកម្ពុជាមានសភាពធូរស្រាលច្រើនយ៉ាងណាក៏ដោយ។
ចំពោះប្រភេទកីឡាដែលត្រូវបានកំណត់ឲ្យធ្វើការប្រមូលផ្ដុំ គឺបែងចែកជា៥ផ្នែកមាន ៖
ទី១-កីឡាមានសក្ដានុពល រួមមានកីឡា តេក្វាន់ដូWT ប៉េតង់ ជឺជិតស៊ូ គុនល្បុក្កតោ ប្រដាល់គុនខ្មែរ ប្រដាល់សកល សីដក់ សូហ្វ
តិន្នីស ម៉ូតូទឹក និងចំបាប់ ។
ទី២-កីឡាប្រជាប្រិយ រួមមានកីឡាបាល់ទះ និងកីឡាបាល់បោះ ។
ទី៣-កីឡាចាំបាច់ រួមមានកីឡាអត្តពលកម្ម និងហែលទឹក ។
ទី៤-កីឡាកំពុងអភិវឌ្ឍ និងជំរុញដណ្តើមមេដាយ រួមមានកីឡាវាយកូនបាល់ វូស៊ូ កាយសម្ព័ន្ធ វាយសី ទ្រីយ៉ាត្លុង ទោចក្រយាន គុនដាវ ជិះសេះ ការ៉ាតេ ទូកប្រពៃណី និងអន្ដរជាតិ យូដូ ទូកក្ដោង វាយកូនគោល បាញ់កាំភ្លើង និងកីឡារាំ និង
ទី៥-កីឡាត្រៀមប្រកួតលក្ខណៈអន្តរជាតិ រួមមានកីឡាវ៉ូវីណាម តេក្វាន់ដូ ITF អុកចត្រង្គ និងកីឡាសូរីនហ្ស៊ិកាំប៉ូ ។
រីឯប្រភេទកីឡាជនពិការទាំង៥២នាក់ គឺមានកីឡាករ២៨នាក់ កីឡាការិនី១២នាក់ គ្រូបង្វឹក ១០នាក់ និងអនុរក្ស២នាក់។
ការហ្វឹកហាត់នេះ គឺដើម្បីស្ដារ និងពង្រឹងសមត្ថភាពឡើងវិញ ត្រៀមចូលរួមការប្រកួតអន្ដរជាតិនានា ពិសេសការត្រៀមប្រកួតកីឡាស៊ីហ្គេម ឆ្នាំ២០២១ នៅវៀតណាម និងដំណើរឆ្ពោះទៅស៊ីហ្គេម ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះតែម្ដង ៕ (កែសម្រួលដោយ ៖ បុប្ផា)
ចែករំលែកព័តមាននេះ